ហ៊ុន សែន ពន្យល់​ពី​ពាក្យ​«ផ្លាស់​ប្តូរ»

ការ«ផ្លាស់ប្តូរ» ដែលោកនាយករដ្ឋមន្រ្តីកម្ពុជា បានលើកឡើង មិនមែនជាការផ្លាស់ប្តូរលោក ចេញពី​នាយក​រដ្ឋមន្រ្តី​ទេ។ តែ​ជា​ការ​ផ្លាស់​ប្តូរ នៃស្ថានភាពជីវភាព និងការរស់នៅរបស់ប្រជាពលរដ្ឋ ចាប់ពីការធ្វើស្រែស្រូវ ដី​មួយ​ហិកតា ដែល​អាច​ចញ្ចឹម​ជីវិត​មនុស្ស បានត្រឹម៥នាក់ មកជាអាគារអាជីវកម្ម/ ពាណិជ្ជកម្មដ៏ធំស្គឹមស្កៃ អាច​ចឹញ្ចឹម​វីវិត​ពី​មនុស្ស រហូត​ដល់​ប្រាំពាន់នាក់។ លោកហៅការផ្លាស់ប្តូរ នៃការអភិវឌ្ឍន៍នេះថា ជា​ច្រក​នៃ​កំណើន​សេដ្ឋកិច្ច របស់​ប្រជា​ពលរដ្ឋ​កម្ពុជា។
Loading...
  • ដោយ: អ៊ុម វ៉ារី អត្ថបទ៖ អ៊ុម វ៉ារី ([email protected]) - យកការណ៍៖ស្រ៊ុន ទិត្យ - ភ្នំពេញថ្ងៃទី២៦ សីហា ២០១៥
  • កែប្រែចុងក្រោយ: September 01, 2015
  • ប្រធានបទ: នយោបាយ
  • អត្ថបទ: មានបញ្ហា?
  • មតិ-យោបល់

ថ្លែងក្នុងកម្មវិធីផ្សព្វផ្សាយ អំពីគោលនយោបាយ អភិវឌ្ឍន៍ឧស្សាហកម្មនៅកម្ពុជា ឆ្នាំ២០១៥-២០២៥ នាវិមាន​រដ្ឋសភា លោកនាយករដ្ឋមន្រ្តី ហ៊ុន សែន បានច្រានចោល នូរអ្វីដែលជាការលើកឡើង របស់គណបក្សប្រឆាំង​ពាក់ព័ន្ធ នឹងការ«ផ្លាស់ប្តូរ»នៅកម្ពុជា។ លោកបន្តថា កម្ពុជាក្រោយសង្គ្រាមស៊ីវិល គឺមានការផ្លាស់ប្តូរជា​បន្ត​បន្ទាប់ ដែលក្រុមមនុស្សលើកឡើងទាំងនោះ មិនដែលទទួលស្គាល់ និងមើលឃើញទេ។

ពាក្យ«ផ្លាស់ប្តូរ»នេះ លោកនាយករដ្ឋមន្រ្តីអះអាងថា ត្រូវបានប្រើប្រាស់ជាទូទៅ ដោយក្រុមមនុស្ស មកពីក្រៅ​ប្រទេស ដែលមានចេតនាមួយ ប្រៀនប្រដៅដល់ប្រទេសកម្ពុជា យ៉ាងក្រាស់ក្រែល។ នាព្រឹកថ្ងៃទី២៦ ខែសីហា ឆ្នាំ២០១៥ នៅវិមានសន្តិភាព នាយករដ្ឋមន្ត្រីកម្ពុជា ដែលកាន់អំណាចជាង៣០ឆ្នាំ បានធ្ចើការពន្យល់ទៅវិញថា ការផ្លាស់ប្តូរនេះ ត្រូវបានលោកស្គាល់យ៉ាងច្បាស់ នៅកម្ពុជា។ លោកបានអះអាងថា៖ «បើខ្ញុំមិនយល់ពី​ការផ្លាស់​ប្តូរ និងគ្រប់គ្រងបានដំណើរការ នៃការផ្លាស់ប្តូរ តើខ្ញុំមានលទ្ថភាពអង្គុយបាន នៅហ្នឹងដែរឬទេ? នៅហ្នឹងបាន​៣០ឆ្នាំ។»

លោកនាយករដ្ឋមន្រ្តី ហ៊ុន សែន បានលើកឡើងថា លោកធ្លាប់ធ្វើការឆ្លងកាត់ ពីជីវិតជាយុវជន លោកយល់ និងដឹងថាតើយុវជនទាំងអស់ ចង់បានអ្វី។ ឆ្លងកាត់ការគ្រប់គ្រងរបស់លោក ក្នុងរយៈកាលកន្លងមកនេះ មាន​ភាពបត់បែន ទៅតាមតម្រូវការរបស់មនុស្សគ្រប់រូប ដែលត្រូវការការផ្លាស់ប្តូរទាំងនោះ។ លោកបានធ្វើការ​ក្រើន​រំលឹកថា ការផ្លាស់ប្តូរនៅកម្ពុជា មិនអាចមើលត្រឹមតែមួយជ្រុង នៃការផ្លាស់ប្តូររូបលោកនោះឡើយ។ លោក ហ៊ុន សែន និយាយថា៖ «ការដែលពួកគេមើលឃើញនោះ គឺការផ្លាស់ប្តូរលោក ហ៊ុន សែន ឈប់ឲ្យធ្វើជា​នាយក​រដ្ឋ​មន្រ្តី ឲ្យអញធ្វើម្តង។ សូមប្រជាពលរដ្ឋ និងយុវជនយល់ឲ្យច្បាស់ តំណែងនាយករដ្ឋមន្រ្តី មានតែមួយគត់ មិន​មែនអស់លោកមួយប្រទេសហ្នឹង បានធ្វើទេ។»

លោកបានលើកជាសំនួរថា តើការផ្លាស់ប្តូរមានត្រឹម តែប្តូរមេដឹកនាំ ឬយ៉ាងណា? លោកបានធ្វើការពន្យល់ នូវ​ការផ្លាស់ប្តូរ ពីអតីតកាលយ៉ាងដូច្នេះថា៖ «ប្រយ័ត្ន! ប្រយ័ត្នអាផ្លាស់ប្តូរ ពីសម្តេច សីហនុ មក លន់ នល់ កើត​សង្គ្រាមគ្រឹប។ (ផ្លាស់) ប្តូរពី លន់ នល់ មក ប៉ុល ពត ប្រល័យពូជសាសន៍! (...) វាមាននិន្នាការទៅបែបនេះ។ (...) និយាយច្រើនពេក និយាយពាក្យផ្លាស់ប្តូរជាមួយខ្ញុំ ខ្ញុំមិនមែន (ប្រៀន)ប្រដៅអ្នកណាម្នាក់ទេ តែជាការដាស់​តឿន។»

លោកហ៊ុន សែន បានបន្ថែមថា ការ«ផ្លាស់ប្តូរ»នេះ មិនត្រឹមតែប្តូរថ្នាក់ដឹកនាំប៉ុណ្ណោះទេ តែបានប្តូរនូវអ្វីៗ ដែល​ពីមុនមកគ្មាន ឲ្យកើតមានឡើង។ លោកពន្យល់បន្ថែមថា៖ «ផ្លាស់ប្តូរតាំងពីទីក្រុងមិនមានអ្វី... សូម្បីអាយុ ផ្លាស់​ប្តូរពីជាង២០ ឥឡូវឡើងជាង៦០ហើយ។ ខ្ញុំតាំងពីកូនមួយ ឥឡូវរហូតដល់កូនប្រាំ ថែមកូនប្រសារ៥ទៀត រួម​ទាំង​ចៅ១៧ តើអាហ្នឹងមិនមែនជាការផ្លាស់ប្តូរទេ? អ៊ួន ព័ន្ធមុន្នីរត្ន ពីសិស្សវិទ្យាល័យ រហូតបញ្ចប់ថ្នាក់បណ្ឌិត​នៅ​រុស្សី ឡើងជារដ្ឋមន្រ្តីក្រសួងសេដ្ឋកិច្ចនិងហិរញ្ញវត្ថុ តើនេះក៏មិនមែនជាការផ្លាស់ប្តូរដែរ ឬយ៉ាងណា?»៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...