ថ្លើមធំហ៊ានឆក់ទូរស័ព្ទដៃ ពីលោកអភិបាលរងខណ្ឌទួលគោក ពិបាកនឹងរកវាសនាបានរួចខ្លួន ពីសំណាញ់​តាមរក​ចាប់ខ្លួន យ៉ាងមានប្រសិទ្ធិភាព របស់កងកម្លាំងអាជ្ញាធរ នោះណាស់។ ដូចករណីជនពីរនាក់នេះអញ្ចឹង ដែល​ជាប់សឹង្ស័យថា បានធ្វើសកម្មភាពឆក់ទូរស័ព្ទដៃ ពីលោក ប៉ាង លីដា កាលពីសប្ដាហ៍មុន ត្រូវបានក្រុម​នគរបាល​ចាប់ខ្លួនបាន នៅថ្ងៃទី៧ ខែសីហា ឆ្នាំ២០១៥ ម្សិលម៉ិញ។

ការចាប់ខ្លួននេះ ត្រូវបានធ្វើឡើង ក្រោមការសហការ រវាងកម្លំាងនគរបាលខណ្ឌ ជាមួយកម្លំាងនគរបាល ការិយាល័យព្រហ្មទណ្ឌកំរិតធ្ងន់ ដែលបានចុះតាមដាន និងស្រាវជ្រាវ ហើយឈានដល់ការចាប់ខ្លួន និងត្រៀម​បញ្ជូន​ជនសង្ស័យទាំងពីរ ទៅសាលាដំបូងរាជធានីភ្នំពេញ។

តាមការឲ្យដឹងពីសមត្ថកិច្ចថា ជនសង្ស័យទី១ ឈ្មោះ គង់ ភារម្យ ហៅ ខ្មៅ មានអាយុ ២១ឆ្នំា ស្នាក់នៅផ្ទះលេខ ៣៧ ផ្លូវលេខ ៦០៨ សង្កាត់បឹងកក់ ២ ខណ្ឌទួលគោក និងជនសង្ស័យទី២ ឈ្មោះ ចេង គឹមឆេង ហៅ ជាំ មាន​អាយុ ១៩ឆ្នំា ស្នាក់នៅផ្ទះលេខ៨០ ផ្លូវលេខ៥៩៨ ភូមិទួលគោក សង្កាត់ទួលសង្កែ ខណ្ឌឬស្សីកែវ។ ក្រោយ​ចាប់​ខ្លួនជនទាំងពីរ សមត្ថកិច្ចបានដកហូត ម៉ូតូ១គ្រឿងម៉ាក Suzuki Nek ពណ៍សរ ស៊េរី ២០១៤ ស្លាកលេខភ្នំពេញ 1FE-3775។

គួររំលឹកថា ហេតុការណ៍ឆក់ទូរស័ព្ទ របស់លោកអភិបាលរង ខណ្ឌទួលគោកនេះ កើតឡីងនៅថ្ងៃសៅរ៍ ទី ០១ ខែ សីហា ឆ្នាំ២០១៥ វេលាម៉ោង ១១ ព្រឹក។ លោក ប៉ាង លីដា បាននិយាយថា លោកបានជិះម៉ូតូ Akano របស់​លោក ចេញពីប្រជុំ មកដល់នៅខាងក្រោយសណ្ឋាគារ រ៉េស៊ីដង់ នៅតាមបណ្តោយផ្លូវ ២៣៣ ក្នុងសង្កាត់​ផ្សារ​ដេប៉ូ ២ ក្នុង​ខណ្ឌទួលគោក ស្រាប់តែក្រុមចោរគ្នាពីរនាក់ បានធ្វើសកម្មភាព ឆក់ទូរសព្ទដៃរបស់លោក បាន​សម្រេច​រួច​ជិះ​គេចខ្លួនបាត់។ គាត់បានបន្ថែមទៀថា គាត់បានប្តឹងទៅសមត្ថកិច្ច អំពីករណីនេះ ដើម្បីធ្វើយ៉ាង​ណា ត្រូវ​ចាត់​ការ​តាមនិតិវិធីច្បាប់។

បច្ចុប្បន្នជនសង្ស័យទាំងពីរ កំពុងត្រូវឃាត់ខ្លួន នៅអធិការដ្ឋាននគរបាល ខណ្ឌទួលគោក ដើម្បីរង់ចាំការ​កសាង​សំនុំរឿងបញ្ជូនបន្តទៅតុលារ៕