នៅចំពោះមុខទុក្ខកង្វល់ របស់អាជីវករ ទាក់ទងនឹងគម្រោងអភិវឌ្ឍន៍ផ្សារ របស់សាលារាជធានី លោក ឯក ឃុនឌឿន អភិបាលនៃគណៈអភិបាល ខណ្ឌទួលគោក បានមានប្រសាសន៍ដំបូងគេ នៅក្នុងអង្គប្រជុំ ដោយ​បាន​ធានា​​ទៅ​កាន់​​ប្រជាពលរដ្ឋថា គម្រោងធ្វើផ្សារដើមគរថ្មី មិនមានផលប៉ះពាល់ ដល់អជីវករនោះទេ។

ថ្លែងក្នុងសាលាសង្កាត់ផ្សារដើមគរ កាលពីថ្ងៃទី៧ ខែសីហានេះ លោក ឯក ឃុនឌឿន បានលើកឧទាហរណ៍ ពីផ្សារធំថ្មីថា អាជីវករនៅទីនោះ មានការស្រុះស្រួលគ្នា ដើម្បីគម្រោងអភិវឌ្ឍន៍ថ្មី ឲ្យដំណើរការផ្សាររលូនល្អ។ លោកបញ្ជាក់ថា៖ «បងប្អូនកុំភ័យ យើងធ្វើមិនឲ្យប៉ះពាល់ ប្រយោជន៍បងប្អូនទេ ថ្នាក់ដឹកនាំគម្រោង បានគិត​ល្អិត​ល្អន់ណាស់»។

អភិបាលនៃគណៈអភិបាល ខណ្ឌទួលគោក បានស្រង់សម្ដីនាពេលកន្លងមក របស់អភិបាល រាជធានី​ភ្នំពេញ​លោក ប៉ា សុជាតិវង្ស មកបញ្ជាក់ថា បើមិនមានការយល់ព្រម ពីអាជីវករណាមួយ គម្រោងនេះ នឹងមិនអាច​អនុវត្តន៍​បានឡើយ។ ម្យ៉ាងវិញទៀតលោកថា អ្នកលក់ដូរភាគច្រើន ខ្លាចបាត់បង់អតិថិជន (ម៉ូយ) នៅពេល​ផ្លាស់​ទីកន្លែង តែបើធ្វើថ្មីទាំងប្រព័ន្ធលូ ការៀបចំផ្សារនោះ អ្នករស់នៅជុំវិញផ្សារ និងអាជីវករ នឹងឈប់មាន​ក្លិន​ស្អុយ និងបញ្ហាបរិស្ថានមិនស្អាត ខួបប្រាំង ខួបវស្សាទៀតហើយ។

ចំពោះលោក ទិត្យ សាមឿន ចៅសង្កាត់រងទីមួយ ក្នុងសង្កាត់ផ្សារដើមគរ បានបញ្ជាក់ថា លោកគាំទ្រចំពោះ​គម្រោង របស់សាលារាជធានីភ្នំពេញ ក្នុងការដាក់ប្រព័ន្ធលូថ្មីនេះ។ លោកថា ផ្សារដើមគរ ហាក់ដូចជាកន្លែង​ផ្ទុក​ទឹកមួយអញ្ចឹង ព្រោះវានៅកណ្តាលរាជធានីភ្នំពេញ ទឹកស្ទើគ្រប់កន្លែង បុកទម្លុះចូលក្នុងផ្សារនេះ។ ចៅ​សង្កាត់​រង​រូបនេះ បានបញ្ជាក់ទៀតថា បញ្ហាធំគឺបរិស្ថាននៅក្នុងផ្សារ ដែលជះក្លិន ដល់អ្នករស់នៅជាប់ក្បែរផ្សារ​ជា​ខ្លាំង។ លោកលើកឡើងថា៖ «ខ្ញុំគាំទ្រ នូវគម្រោងរបស់សាលារាជធានីភ្នំពេញ ខ្ញុំសង្ឃឹមថា បងប្អូននឹងគិត​ពី​ផល​ប្រយោជន៍​វែង​ឆ្ងាយ»។

ចំពោះការលើកឡើង របស់ប្រជាពលរដ្ឋ ដែលចូលរួមកិច្ចពិភាក្សា ជាមួយអាជ្ញាធរនៅថ្ងៃដដែលនេះ បានលើកឡើង ពីផលវិបាករបស់ពួកគេ រៀងៗខ្លូនដូចគ្នា ថាពលរដ្ឋជួបការពិបាកណាស់ ក្នុងការពឹងពាក់ទៅអាជ្ញាធរមូលដ្ឋាន នៅពេលមានបញ្ហា ជាពិសេស គឺនៅលើផ្លូវ ៣៣៦ មិនអាចបើកបរ ឬធ្វើដំណើរបានស្ទើររាល់ថ្ងៃ ពេលមានភ្លៀងលិច ពេលគ្មានភ្លៀងស្ទះ។ ជាការលើកបញ្ហា ដាក់គ្នាទៅវិញទៅមក ដែលមិនបានធ្វើឲ្យការពិភាក្សាលើកនេះ ទទួលបានលទ្ធផល ជាផ្លូវការអ្វីឡើយ៕