ជាសវនាការជំនុំជម្រះ លើសំណុំរឿងក្តីដាច់ដោយឡែកពីគ្នា ទាក់ទងករណីអ្នកស្រីយ៉ោម បុប្ផា ពីសំនុំរឿងបឹងកក់ និង​អ្នកស្រី ទឹម សាក់មុន្នី ពីសំនុំរឿងបុរីកីឡា ដោយតុលាការសាលាដំបូងរាជធានីភ្នំពេញ កាលពីរសៀលថ្ងៃពុធទី២៦ ខែធ្នូ កន្លងទៅ និងបានអូសបន្លាយបន្តរ រហូតដល់ព្រឹកថ្ងៃទី២៧ ខែធ្នូ ឆ្នាំ២០១២ ។

ក្រុមអ្នកគាំទ្រជនជោប់ចោទទាំងពីរ បានធ្វើការទាមទារ នៅពីមុខតុលាការសាលាដំបូងរាជធានីភ្នំពេញ
កាលពីថ្ងៃទី២៦ធ្នូកន្លងទៅ។ រូបថត MONOROOM.info/ O.Vary។

ចៅក្រមតុលាការសាលាដំបូងរាជធានីភ្នំពេញ បានប្រកាសសាលក្រម សម្រេចផ្តន្ទាទោស អ្នកស្រី យ៉ោម បុប្ផា អ្នកតវ៉ា​ដីធ្លីដ៏លេចធ្លោម្នាក់ នៅតំបន់បឹងកក់ ឲ្យជាប់ពន្ធនាគារ៣ឆ្នាំ ពីបទ«ប្រើអំពើហឹង្សាដោយចេតនា» វាយទៅលើបុរស ជា​អ្នករត់ម៉ូតូឌុបពីរនាក់ ឲ្យរងរបួសកាលពីដើមខែសីហា ដែលទំនងជាទំនាស់ រវាងអ្នកនៅភូមិផងរបងជាមួយ។ តុលាការ​ក៏បានសម្រេចផ្តន្ទាទោស ដោយកំបាំងមុខ ប្អូនប្រុសពីរនាក់ របស់អ្នកស្រីគឺលោក យ៉ោម កន្លង់ និង យ៉ោម សិទ្ធិ ក្នុង​ម្នាក់ៗឲ្យជាប់ពន្ធនាគារបីឆ្នាំផងដែរ។ រីឯលោក លួស សាខន ដែលជាប្តីរបស់អ្នកស្រី យ៉ោម បុប្ផា ក៏ត្រូវបានផ្តន្ទាទោស​ចំពោះមុខ ដាក់ពន្ធនាគារបីឆ្នាំដូចគ្នា តែទោសនេះត្រូវបានព្យួរ អោយនៅ«ក្រៅឃុំ»។

លោក សួស សំអាត ចៅក្រមជំនុំជម្រះសាលាដំបូងរាជធានីភ្នំពេញ បានបង្គាប់ឲ្យជនជាប់ចោទទាំងអស់ ត្រូវរួមគ្នាផ្តល់​ជាសំណង ដល់ជនរងគ្រោះឈ្មោះ ង៉ែត ចិត្រ និង វ៉ាត ថៃសេង ក្នុងម្នាក់ៗ នូវទឹកប្រាក់ចំនួន៣០លានរៀល។ ហើយ​តុលាការក៏បានអោយរយៈពេល៣០ថ្ងៃ ក្នុងការបើកផ្លូវ«ប្តឹងឧទ្ទរណ៍» សម្រាប់ជនជាប់ចោទពីររូប ដែលមានវត្តមានក្នុង​សវនាការ និងការបើកផ្លូវ«ប្តឹងតវ៉ា» សម្រាប់ពីរ​នាក់ទៀត ដែលត្រូវបានផ្ទន្ទាទោសកំបាំងមុខនោះ។

រីឯករណីអ្នកស្រី ទឹម សាក់មុន្នី អ្នកតវ៉ាដីធ្លីនៅបុរីកីឡា អាយុ ៦៤ឆ្នាំ ក៏ត្រូវបានចៅក្រមសាលាដំបូងរាជធានីភ្នំពេញ ផ្តន្ទាទោស ដាក់ពន្ធនាគារចំនួនប្រាំមួយខែដែរ គិតចាប់ពីថ្ងៃចាប់ខ្លួនមក។ តែដោយអ្នកស្រីបានជាប់ឃុំឃាំង ជិតបួនខែ​មកហើយ ក្នុងពន្ធនាគារ ដូច្នេះទោសដែលនៅសល់ ជាងពីរខែទៀត ត្រូវសាលក្រមប្រកាសថា «បានព្យួរ»។ ជារួមមក អ្នកស្រី ទឹម សាក់មុន្នី ត្រូវបាន«ដោះលែងពីពន្ធនាគារ» អោយមានសេរីភាព បន្ទាប់ពីសាលក្រមនេះទៅ។

ឆ្លើយនឹងកិច្ចសម្ភាស របស់​មនោរម្យព័ងអាំងហ្វូ លោក អំ សំអាត មន្ត្រីបច្ចេកទេស ឃ្លាំមើលការរំលោភសិទ្ធិ​មនុស្ស របស់អង្គការលីកាដូ បាននិយាយថា ការសម្រេចនេះ ជាឆន្ទានុសិទ្ធិរបស់តុលាការ ។ តែលោកបានសង្កេតទៅ​លើអង្គ​សវនាការទាំងមូល ថាមិនមានចំណុចណាមួយ ដែលបញ្ជាក់ថាអ្នកស្រីយ៉ោម បុប្ផា ជាអ្នកផ្តើមគំនិត ឲ្យមាន​បទ​ល្មើស​ប្រើប្រាស់ហឹង្សា សម្រាប់ជាស្ថានទំងន់ទោសទេ ។ លោកបញ្ជក់ថា ទាំងសាក្សី ទាំងជនរងគ្រោះ បានឃើញអ្នកស្រី នៅក្រោយពេលកើតហេតុនោះ។ លោកសន្និដ្ឋាន យ៉ាងដូច្នេះថា «កុំតែអ្នកស្រីយ៉ោម បុប្ផា គឺជាសកម្មជន​តំណាង​អ្នក​បឹងកក់ ការពារដីធ្លី និងផ្ទះសម្បែង កន្លងមកយ៉ាងសកម្មនោះ ប្រហែលជាអ្នកស្រី យ៉ោម បុប្ផា មិនមានវាសនា​ដូច​ថ្ងៃ​នេះទេ»។

សម្រាប់ករណីរបស់អ្នកស្រី ទឹម សាក់មុន្នី ដែលតុលាការបានព្យូរទោស និងបានដោះលែងនោះ លោកអំ សំអាត បាន​ស្វាគមន៍ចំពោះ ការកាត់តម្រឹមទោសរបស់តុលាការ តែលោកនៅតែមានការសោកស្តាយ ព្រោះតែការចាប់ខ្លួនដាក់​ទោសនេះ បានធ្វើឡើង ដោយសារតែអ្នកស្រី ក៏ជាសកម្មជនតវ៉ាដីធ្លីដ៏សំខាន់ នៅតំបន់បុរីកីឡាដែរ។ អ្នកបច្ចេកទេស​រូបនេះ បានបញ្ជាក់ថា «ករណីទាំងពីរនេះជាការគំរាមកំហែង បំភិតបំភ័យ សំរាប់សកម្មជនការពារដីធ្លីដ៏ទៃៗទៀត»។

គួរបញ្ជាក់ថា កាលពីរសៀលថ្ងៃពុធទី២៦ ខែធ្នូ ឆ្នាំ២០១២ នៅខាងភ្លើងស្តុបនាងគង្ហីង មានក្រុមប្រជាពលរដ្ឋ​ខាង​តំបន់​បឹងកក់ និងតំបន់បូរីកីឡា ដែលភាគច្រើនជាស្រ្តី និងកូនក្មេង បានប្រមូលផ្តុំលើកបដា និងរូបជញ្ជីងធំ តំណាងឲ្យយុត្តិធម៌ ស្រែកហ៊ោកញ្រៀវទាមទារឲ្យតុលាករ ធ្វើការ«ដោះលែងអ្នកស្រី យ៉ោម បុប្ផា និងអ្នកស្រី ទឹម សាក់មុនី» ។ តែដោយ​ឡែក​នៅខាងភ្លើងស្តុបអាងទឹកវិញ មានក្រុមអ្នករត់ម៉ូតូឌុបជាច្រើននាក់ សុទ្ធតែជាបុរស និងមនុស្សពេញវ័យ ក៏បានប្រមូល​ផ្តុំ​គ្នាលើកបដាដែរ ប៉ុន្តែពួកគេទាមទារឲ្យតុលាការ«ផ្តន្ទាទោស លើអ្នកស្រី យ៉ោម បុប្ផា» ព្រោះពួកគេទាំងនោះយល់ថា អ្នកស្រីជាអ្នកទទួលខុសត្រូវ លើការវាយដំទៅលើអ្នករត់ម៉ូតូទាំងពីរនាក់។

តាមប្រភពពីមន្ត្រីនគរបាលក្នុងតំបន់ បាននិយាយថា ក្រុមគ្រួសាររបស់អ្នកស្រី យ៉ោម បុប្ផា បានធ្វើការវាយដំទៅលើ អ្នករត់ម៉ូតូឌុបទាំងពីរនាក់ ដោយខឹងនឹងបាត់កញ្ចក់រថយន្ដ ជាញឹកញាប់ពេក ហើយពួកគេទាំងនេះ បានដាក់ការសង្ស័យ ទៅលើអ្នករត់ម៉ូតូឌុបទាំងពីរនាក់ ដែលរស់នៅក្នុងភូមិផងរបងជាមួយ។ អ្នកស្រីយ៉ោម បុប្ផា និងលោក លួស សាខន ជា​ស្វាមី ត្រូវបាននគរបាលចាប់ឃាត់ខ្លួន នៅថ្ងៃទី៤ ខែកញ្ញា ឆ្នាំ២០១២កន្លងមក។ ស្វាមីរបស់អ្នកស្រី ត្រូវបានតុលាការ​លែងអោយនៅក្រៅឃុំវិញ ក្នុងថ្ងៃជាមួយគ្នានោះ តែបានដាក់លោក អោយស្ថិតនៅក្រោមការឃ្លាំមើល របស់តុលាការ​ដដែល៕

---------------------------------------------------------
ដោយ៖ អ៊ុម វ៉ារី ភ្នំពេញ ថ្ងៃទី២៧ ខែធ្នូ ឆ្នាំ២០១២
រក្សាសិទ្ធិគ្រប់យ៉ាងដោយ មនោរម្យព័ងអាំងហ្វូ