ករណីគ្រោះថ្នាក់នេះ បានកើតឡើង កាលពីវេលាម៉ោង ២ និង ៥០នាទី រសៀលថ្ងៃទី ២៧ ខែកក្កដា ឆ្នាំ២០១៥ នៅចំណុចគល់ស្ពាន ព្រែកតាមាក់ ទៅតាមបណ្តោផ្លូវជាតិ លេខ៦A ស្ថិតក្នុងភូមិកោះកោ ឃុំព្រែកអញ្ចាញ ស្រុក​មុខកំពូល ខេត្តកណ្តាល។ សាក្សីនៅកន្លែងកើតហេតុ បានប្រាប់អ្នកសារព័ត៌មានថា ហេតុការណ៍នេះ បង្ក​ពី​​រថយន្ត​មួយគ្រឿង មិនស្គាល់ម៉ាក បានបើកកបុក រ៉ឺម៉កកង់បីដែលដឹកឈើ យ៉ាងពេញទំហឹងពីក្រោយ នៅ​ជម្រាល​ចុះពីលើស្ពាន បណ្តាលឲ្យ ក្រឡាប់រ៉ឺម៉ក ធ្លាក់ម្ចាស់អ្នកបើក រួចកិនស្លាប់ភ្លាមៗ នៅកន្លែងកើតហេតុ។

ជនរងគ្រោះ ត្រូវបានគេស្គាល់ថា ឈ្មោះ រឿន សារ៉េត អាយុ៤០ ឆ្នាំ មានបុខរបរ ជាអ្នកដឹកឈើដាក់ នៅតាម​ដេប៉ូសព្វថ្ងៃ មានទីលំនៅ ក្នុងភូមិស្វាយអាត់កណ្តាល ឃុំព្រែកតាម៉ាក ស្រុកមុខកំពូល ខេត្តកណ្តាល។ ជន​រងគ្រោះបានស្លាប់ ខណៈដែលកំពុងដឹកឈើ ទៅដាក់តាមដេប៉ូមួយចំនួន នៅក្នុងខេត្តកណ្តាល ដែលក្នុង​រ៉ឺម៉កនោះ ពោរពេញទៅដោយឈើ។

ដោយឡែកឡានបង្ក ត្រូវបានមន្រ្តីមានសមត្ថកិច្ច ធ្វើការឃាត់ទុក បានសម្រេច ខណៈជនជាម្ចាស់រថយន្ដ បាន​ព្យាយាមបើកគេចខ្លូន។ បន្ទាប់ពីការវាស់វែង និងធ្វើកោសល្យវិច័យ របស់មន្រ្តីជំនាញ ទៅលើសាកសពរួច ក្រុម​មន្រ្តីសមត្ថកិច្ច បានប្រគល់សាកសព ទៅគ្រួសារជនរងគ្រោះ យកទៅធ្វើបុណ្យ។ ចំណែកឯវត្ថុតាង និង​ឡានភាគីម្ចាងទៀត ត្រូវបញ្ជូនទៅកាន់អធិការដ្ឋាន ស្រុកមុខកំពូល ខេត្តកណ្តាល ដើម្បីដោះស្រាយ ទៅតាម​ផ្លូវច្បាប់៕