មើលទៅ ការបណ្ដេញអ្នកសារព័ត៌មាន ចេញពីរដ្ឋសភា កាលពីថ្ងៃទី១ ខែកក្កដា ឆ្នាំ២០១៥ ដូចជានៅមិនទាន់​ដាច់ស្រឡះ ពីលោក ឈាង វុន តំណាងរាស្ត្រ មកពីគណបក្សប្រជាជនកម្ពុជា និងជាអ្នកនាំពាក្យរដ្ឋសភា នៅ​ឡើយ។ មិនដាច់ស្រេច ព្រោះរដ្ឋមន្ត្រីក្រសួងព័ត៌មាន លោក ខៀវ កាញារីទ្ធ ទើបនឹងលើកឡើង ថាការ​បណ្ដេញ​អ្នកសារព័ត៌មាន ចេញពីទីសាធារណៈ និងមិនឲ្យអ្នកសារព័ត៌មាន ធ្វើការងាររបស់ខ្លួននោះ ជាការ​រំលោភ​សិទ្ធិ​អ្នកសារព័ត៌មាន។

តែរឿងដែលសំខាន់នោះ នៅត្រង់សំដី របស់លោករដ្ឋមន្ត្រី ក្រសួងព័ត៌មានថា៖ «កន្លែងរដ្ឋសភា ជាកន្លែង​សាធារណៈ លើកលែងតែមានការប្រជុំ ដែលប្រកាសថាបិទទ្វារ»។

ការថ្លែងរបស់លោក ខៀវ កាញារីទ្ធ ចាំបាច់តម្រូវឲ្យលោក ឈាង វុន ដែលជាអ្នកដេញ អ្នកសារព័ត៌មាន​ចេញ ពីបរិវេណរដ្ឋសភានោះ សម្ដែងជាប្រតិកម្មភ្លាម។ ថ្លែង​នៅ​ក្នុង​សន្និសីទ​កាសែត ​នៅ​រដ្ឋសភា ថ្ងៃ​ទី​១៧ ខែកក្កដា​នេះ លោក ឈាង វុន បានបញ្ជាក់​ថា រដ្ឋសភា​មិន​មែន​ជា ​តំបន់សាធារណៈ ដូច​ទីលាន​ប្រជាធិបតេយ្យ ដែល​មនុស្ស​អាច​ចេញ​ចូល ​បានតាម​ចិត្ត​នោះ​ទេ ព្រោះ​រដ្ឋសភា​មាន​សន្តិសុខ​យាម​ត្រឹមត្រូវ និង​មាន​បទបញ្ជា​ផ្ទៃក្នុង ដោយ​តម្រូវ​ឲ្យ​សាធារណជន ឬ​អ្នក​កាសែត ចូល​រដ្ឋសភា ​ត្រូវ​សុំ​ការ​អនុញ្ញាត​ពី​សន្តិសុខ​ជាមុន។

ដើម្បីឲ្យកាន់តែច្បាស់ លោក ឈាង វុន បានអះអាងទៀតថា លោក​នឹង​ឲ្យ​ក្រុម​ការងារ ​ផ្ញើ​លិខិត និង​បទ​បញ្ជា​ផ្ទៃ​​ក្នុង នៃ​រដ្ឋសភា ឲ្យ​លោក ខៀវ កាញារីទ្ធ បានអាន។ យ៉ាងណាក៏ដោយ លោកថា លោក​មិន​ចង់​ឆ្លើយ​តប​ច្រើន​​ជា​មួយ​លោក ខៀវ កាញារីទ្ធ ទេ ​ព្រោះ​លោក និង​លោក ខៀវ កាញារីទ្ធ ជា​មន្ត្រី​នៅក្នុង គណបក្ស​ប្រជាជន​កម្ពុជា​​តែ​មួយ។

កាល​ពី​ថ្ងៃ​ទី​១៥ កក្កដា លោក ខៀវ កាញារីទ្ធ បាន​ឆ្លើយ​តប​ នឹង​អ្នក​កាសែត ​ក្រោយ​ចប់​កិច្ច​ពិភាក្សា​ ស្ដីពី «រួម​គ្នា​ ជំរុញ​ការ​ពាក់​មួក​សុវត្ថិភាព ​នៅ​កម្ពុជា» ថា៖ «អ្នកការសែត មានសិទ្ធិចេញចូលកន្លែងណា ដែលជាកន្លែង​សាធារណៈ។ កន្លែងរដ្ឋសភា ជាកន្លែងសាធារណៈ លើកលែងតែមានការប្រជុំ ដែលប្រកាសថាបិទទ្វារ។ (...) ការហាមឃាត់នេះ មានការប៉ះពាល់ ដល់សិទ្ធិអ្នកសារព័ត៌មាន។» សូមអានអត្ថបទ ដែលទាក់ទងឡើងវិញ ដោយចុចនៅលើទីនេះ៕