ក្រុមយុវជននៃសភាត្រាប់ ប្រមាណជិត៥០នាក់ មកពីតាមសកលវិទ្យាល័យ និងបណ្តាខេត្តក្រុងនានា បាន​បង្ហាញ​ពីក្តីកង្វល់របស់ខ្លួនថា នឹងបាត់បង់អ្វីៗច្រើន សម្រាប់យុវជន ក្រោយសេចក្ដីព្រាងច្បាប់ គ្រប់គ្រងអង្គការ​សង្គមស៊ីវិល នៅក្នុងដៃសភា នឹងត្រូវអនុម័ត ដោយគ្មានការទទួលយកអនុសាសន៍ ពីសង្គមស៊ីវិល។ ក្ដី​កង្វល់​ទាំងនោះ បានធ្វើឡើងនៅក្នុងសន្និសីទសារព័ត៌មានមួយ ស្តីពីការព្រួយបារម្ភរបស់ក្រុមយុវជន ដែលនឹង​ត្រូវ​បាត់បង់ នូវឱកាសជាច្រើន តាមរយៈអង្គការសង្គមស៊ីវិល ប្រសិនជាសេចក្តីព្រាងច្បាប់ខាងលើ ត្រូវរដ្ឋសភា​អនុម័ត។

យុវជន ហេង កឹមហុង ជាប្រធានគណកម្មការច្បាប់ នៃក្រុមយុវជនសភាត្រាប់ បានលើកឡើងថា សេចក្តី​ព្រាង​ច្បាប់ស្តីពីសមាគម និងអង្គការក្រៅរដ្ឋាភិបាលនោះ មានការប៉ះពាល់យ៉ាងខ្លាំង ចំពោះយុវជន។ លោកបាន​បង្ហាញ នូវហេតុផលមួយចំនួន ដូចជាក្នុងមាត្រា៣២ នៃសេចក្តីព្រាងច្បាប់នោះ ថាបានបិទសិទ្ធិ សេរីភាពរបស់​យុវជន ក្នុងការចុះជួយតាមសហគម និងមូលដ្ឋាន។ ពិសេសរាល់សកម្មភាព ដែលដឹកនាំដោយក្រុមយុវជន ដើម្បីសង្គម និងជាតិ ត្រូវបានហាមឃាត់។

កញ្ញា កុប ចំណាំ ជានិស្សិតមកពី សកលវិទ្យាល័យភូមិន្ទភ្នំពេញ ផ្នែកទស្សនវិជ្ជា និងជាយុវជនស្មគ្រ័ចិត្ត នៃ​សភាយុវជនត្រាប់ បានលើកឡើងថា គ្រប់មាត្រាទាំងអស់ នៃសេចក្តីព្រាងច្បាប់នោះ សុទ្ធសឹងជាការកង្វល់ សម្រាប់ក្រុមយុវជន។ កញ្ញាបានលើកឡើងថា មានមាត្រាសំខាន់ៗ ដូចជាមាត្រា៥ មាត្រា៨ មាត្រា១០ មាត្រា​២៤ មាត្រា២៥ មាត្រា២៦ មាត្រា៣០ និងមាត្រា៣២ជាដើម សុទ្ធតែបានធ្វើការគាបសង្កត់ មកលើក្រុមយុវជន ក្នុងសកម្មភាពសង្គមទាំងអស់ និងសិទ្ធិសេរីភាពនៃការបញ្ចេញមតិ។

យុវជន ពុធ កល្លិការ ជាសមាជិកនៃសភាយុវជនត្រាប់ បានលើកឡើងថា យុវជនកម្ពុជាភាគច្រើន បាននឹង​កំពុង​ឈឺឆ្អាល និងការងារសង្គមច្រើន។ ហើយពួកគាត់បានរួបរួមគ្នា និងចងក្រងជាសម្ព័ន្ធ អង្គការ សមាគម ឬសហគមន៍នានា ដើម្បីចូលរួមចំណែកជួយសង្គមជាតិ និងសហគមន៍របស់ពួកគាត់។ យុវជនរូបនេះបន្តថា ដូច្នេះសេចក្តីព្រាងច្បាប់ខាងលើ ត្រូវបានបិទ និងហាមឃាត់នូវអ្វីទាំងអស់ ដែលពួកគាត់ចង់ចូលរួម ជួយ​សង្គមជាតិរបស់ខ្លួន ពិសេសសិទ្ធិ និងសេរីភាពក្នុងការបញ្ចេញមតិ។

ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាពលោក យ៉ង់ គឹមអេង បានថ្លែងដែរថា ផលប៉ះ​ពាល់នានា សម្រាប់យុវជន ក្រោយច្បាប់នោះ ត្រូវបានសភាអនុម័តនោះ គឺសេរីភាពក្នុងការចូលរួមក្នុងសង្គម និងសិទ្ធិអភិវឌ្ឍន៍ របស់យុវជនផ្ទាល់តែម្តង។ លោកបានបន្តថា បើច្បាប់នៅមានការរិតបន្តឹងនោះ សង្គម​ស៊ីវិល នឹងមិនអាចជួយខ្លួនឯងបានទេ មិនអាចជួយយុវជនបានឡើយ និងក៏មិនអាចជួយសហគមន៍បានដែរ។