វៀតណាម​ថា បញ្ហា​ព្រំដែន​កើត​ឡើង​ដោយ​ពួកជ្រុល​និយម​កម្ពុជា

បញ្ហាព្រំដែនកម្ពុជា-វៀតណាម កំពុងឡើងកំដៅបន្ថែមទៀត ក្រោយមានការប៉ះទង្គិចគ្នាមួយ រវាងពលរដ្ឋកម្ពុជា និង​ពលរដ្ឋ​វៀតណាម កាលពីថ្ងៃទី២៨ ខែមិថុនា ឆ្នាំ២០១៥។ ខណៈនេះ មន្រ្តីរដ្ឋាភិបាលវៀតណាម បាន​ចាត់​ទុក​ថា អំពើ​ហិង្សា​ទាំង​នោះ ត្រូវ​បាន​ប្រព្រឹត្តិឡើង ដោយពួកជ្រុលនិយមកម្ពុជា។
Loading...
  • ដោយ: អ៊ុម វ៉ារី អត្ថបទ និងយកការណ៍៖ អ៊ុម វ៉ារី ([email protected]) - ភ្នំពេញថ្ងៃទី១ កក្កដា ២០១៥
  • កែប្រែចុងក្រោយ: July 01, 2015
  • ប្រធានបទ: ព្រំដែន
  • អត្ថបទ: មានបញ្ហា?
  • មតិ-យោបល់

ក្នុងថ្ងៃទី៣០ ខែមិថុនាម្សិលម៉ិញនេះ ក្រសួងការបរទេសវៀតណាម បានចេញលិខិតថ្កោលទោសមួយ ចំពោះ​ការប៉ះទង្គិចគ្នារ វាងប្រជាពលរដ្ឋកម្ពុជា និងវៀតណាម កាលពីថ្ងៃទី២៨ ខែមិថុនា ខណៈប្រទេសមួយនេះ មិន​បានឆ្លើយតប នូវកំណត់ទូតទាំង១២ របស់កម្ពុជានៅឡើយនោះ។

សារព័ត៌មានក្នុងស្រុកមួយ បានធ្វើការចុះផ្សាយថា អ្នកនាំពាក្យក្រសួងការបរទេសវៀតណាម លោក ឡេ ហាយប៊ិញ (Le hai binh) បញ្ជាក់ដូច្នេះថា «យើងខ្ញុំសូមរិះគន់យ៉ាងខ្លាំង ចំពោះសកម្មភាពហិង្សា ដែលប្រព្រឹត្ត​ដោយជនជ្រុលនិយមកម្ពុជា។ (…) ល្មើសច្បាប់ប្រទេសទាំងពីរ, សន្ធិសញ្ញា, អនុសញ្ញា និងកិច្ចព្រមព្រៀង រវាង​ប្រទេសវៀតណាម និងកម្ពុជា។ ធ្វើឲ្យប៉ះពាល់ដល់ដំណើរការ បោះបង្គោលព្រំដែន និងទំនាក់ទំនងដ៏ល្អ រវាង​វៀតណាម និងកម្ពុជា។ (…) សូមអំពាវនាវ ឲ្យស្ថាប័នពាក់ព័ន្ធរបស់កម្ពុជា ត្រូវមានវិធានការទប់ស្កាត់ កុំឲ្យ​សកម្មភាពដដែលនេះ កើតឡើងជាថ្មីទៀត។»

លោក ខៀវ សុភ័គ អ្នកនាំពាក្យក្រសួងមហាផ្ទៃ កាលពីថ្ងៃទី២៩ ខែមិថុនានេះ បានបង្ហាញការសោកស្តាយ និង​ថ្កោលទោស ដល់ការប្រើអំពើហិង្សានោះថា កំពុងបង្កនូវភាពកាន់តែស្មុគស្មាញ និងមិនអាចដោះស្រាយបាន នៃចំណងព្រំដែនរបស់ប្រទេសទាំងពីរ។ លោកអះអាងថា ចង់បញ្ចប់បញ្ហានេះ លុះណាតែមានការចរចា រវាង​រដ្ឋាភិបាល នៃប្រទេសទាំងពីរ ទៅតាមច្បាប់អន្តរជាតិ។ យ៉ាងណា លោកបង្ហាញការគាំទ្រ នូវស្មារតី​ស្នេហា​ជាតិ របស់ប្រជាពលរដ្ឋខ្មែរ ដែលចង់ការពារព្រំដែន និងបូរណភាពទឹកដីនោះ តែសុំយកច្បាប់មកដោះ​សា្រយ។

តំណាងរាជរដ្ឋាភិបាល បាននឹងកំពុងស្វែងរក ដំណោះស្រាយលើបញ្ហានេះ។ អ្នកនាំពាក្យទីស្តីការ​គណៈ​រដ្ឋ​មន្រ្តី​ លោក ផៃ ស៊ីផានក្នុងកិច្ចសម្ភាស ជាមួយទស្សនាវដ្តីមនោរម្យ.អាំងហ្វូ កន្លងមកបានលើកឡើងថា រដ្ឋាភិបាល​នឹងស្វែងរកដើមហេតុដំបូង ដែលនាំឲ្យកើតនូវអំពើហិង្សានោះ។ យ៉ាងណា លោកថា បញ្ហានេះ​អាចបញ្ចប់ទៅបាន ត្រូវឆ្លងកាត់ការជួបគ្នា រវាងរដ្ឋាភិបាលទាំងពីរ ដោយអនុវត្តតាមច្បាប់។

ដោយឡែកលោក សម រង្ស៊ី ប្រធានគណបក្សសង្គ្រោះជាតិ បានលើកឡើងថា ប្រទេសជិតខាងកម្ពុជា (វៀតណាម) មានឆន្ទះក្នុងការវាទទឹកដី។ លោកក៏ចង់ឲ្យរដ្ឋាភិបាលកម្ពុជា យកចិត្តទុកដាក់ពីបញ្ហាទឹកដីនេះ ដើម្បីការពារនូវការវាតទី ដោយគ្មានច្បាប់ទម្លាប់នោះ។ នាវិមានរដ្ឋសភា កាលពីថ្ងៃទី២៩ ខែមិថុនា លោក​បាន​បន្តថា ចង់ឲ្យខ្មែររួមគ្នា ដើម្បីជៀសវាងការម៉ាក់ងាយ ពីជនបរទេស។ លោកទំនងជាចង់បង្ហាញថា ហិង្សា​នោះ បង្កឡើងដោយភាគីវៀតណាម ព្រោះតែចង់ជំទាស់ មិនឲ្យមានការចូលមើលព្រំដែនខ្មែរ របស់​ពលរដ្ឋ​កម្ពុជា៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...