ពលរដ្ឋ​«ព្រមាន»​បង្កើន​ការ​តវ៉ា​ឲ្យ​ដោះ​លែង​សកម្មជន​ដីធ្លី ខណៈ​តុលាការ​បន្ត​ហៅ​អ្នក​ពាក់ព័ន្ធ

ក្រោយពីការបដិសេធ របស់សាលាដំបូងរាជធានីភ្នំពេញ ក៏ដូចជាសាលាឧទ្ធរណ៍ នូវការស្នើសុំឲ្យសកម្មជនសិទ្ធិដីធ្លី និង​សកម្មជនគណបក្សសង្គ្រោះជាតិ នៅក្រៅឃុំជាបណ្តោះអាសន្ននោះ ក្រុមអ្នកតវ៉ាព្រមាននឹងបង្កើនការតវ៉ានេះ ទាមទារ​ឲ្យ​មាន​ការ​ដោះលែង​ជាដាច់ខាត។
Loading...
  • ដោយ: អ៊ុម វ៉ារី អត្ថបទ និងយកការណ៍៖ អ៊ុម វ៉ារី ([email protected]) - ភ្នំពេញ ថ្ងៃទី១៥ ធ្នូ ២០១៤
  • កែប្រែចុងក្រោយ: December 16, 2014
  • ប្រធានបទ: សិទ្ធិ
  • អត្ថបទ: មានបញ្ហា?
  • មតិ-យោបល់

សកម្មជនដីធ្លី សកម្មជន​សិទ្ធិ​មនុស្ស និង​ព្រះ​សង្ឃ ប្រមាណ​ជា​ជាង​៤០០​នាក់ កាល​ពី​ថ្ងៃ​ទី១៤ ខែ​ធ្នូ នៅ​មុខ​ពន្ធនាគារ​ព្រៃ​ស បាន​ព្រមាន​ជា​ថ្មី នឹង​ធ្វើ​សកម្មភាព​តវ៉ា​កាន់​តែ​ខ្លាំង​ជាង​នេះ បើ​គ្មាន​ការ​ដោះ​លែង អ្នក​ជាប់​ឃុំ​ឃាំង​ទាំង​១៨​នាក់​នោះ​ទេ។ អ្នក​ចូល​រួម​ការ​តវ៉ា សុទ្ធ​តែ​បាន​ចាត់​ទុក​ថា ការ​ចាប់​ខ្លួន និង​ឃុំ​ខ្លួន​នេះ កំពុង​បង្កើន​នូវ​«នីទណ្ឌភាព»​នៅ​កម្ពុជា ដោយ​មន្រ្តី​សាធារណៈ និង​បង្ក​ភាព​«អយុត្តិធម៌»​ដល់​អ្នក​ជាប់​ឃុំ​ទាំង​នោះ។

ក្នុង​ពិធីដែលមានការ​បង្ហោះ​​ប៉ោងៗ មន្ត្រី​ស៊ើប​អង្កេត​ជាន់​ខ្ពស់ នៃ​អង្គការ​​ការពារ​សិទ្ធិ​មនុស្ស​លីកាដូ (Licadho) លោក អំ សំអាត បាន​លើក​ឡើង​ថា ពួក​គាត់​ទាំង​អស់​បាន​តាំង​ចិត្ត​រួច​ជា​ស្រេច បង្កើន​ការ​តស៊ូ​មតិ​ដោយ​អហិង្សា ទៅ​តាម​លទ្ធភាព ធ្វើ​យ៉ាង​ណា​ត្រូវ​ដោះ​លែង​អ្នក​ទាំង​១៨​នាក់ ឲ្យ​មាន​សេរីភាព​កាន់​តែ​ឆាប់​នា​ពេល​ខាង​មុខ។

មន្ត្រីឃ្លាំមើលសិទ្ធិមនុស្ស នៃសមាគមអាដហុក (Adhoc) លោក ណៃ វ៉ង់ដា បានលើកឡើងដែរថា បើ​ដំណោះ​ស្រាយនៃការតវ៉ាដោយ«អហិង្សា»នេះ នៅតែមិនអាចមានលទ្ធផលនោះ វាអាចនឹងកើតមានចលនាតវ៉ាថ្មីមួយ ដោយសន្តិវិធី ពីអង្គការ សមាគម រួមជាមយយនឹងកម្លាំងប្រជាពលរដ្ឋនេះ។ លោកបានបន្ថែមទៀតថា៖ «ស្ថាប័ន​មិនមែនរដ្ឋាភិបាលទាំងនោះ នឹងធ្វើយុទ្ធនាការប្រហាក់ប្រហែលគ្នា ក្នុងពេលឆាប់ៗនេះ​ប្រឆាំងការ​ឃុំខ្លួន»។

ពលរដ្ឋរងដែលបានចូលរួម ក្នុងការតវ៉ានោះ មានដូចជា សហគមន៍បឹងកក់ បុរីកីឡា ថ្មគោលជាដើម តែក៏​មាន​ការចូលរួមផងដែរ ពីខាងអង្គការសមាគម កម្មករកម្មការិនីរោងចក្រ និងព្រះសង្ឃ។

រាប់តាំងពីថ្ងៃទី២៩ខែកញ្ញា ដល់១៣ខែវិច្ឆិកា មានពលរដ្ឋចំនួន១៨នាក់ហើយ ដែលត្រូវបានអាជ្ញាធរចាប់ខ្លួន ជាបន្តបន្ទាប់ ក្នុងនោះមានស្ត្រីក្នុងរឿងដីធ្លី១០នាក់ សកម្មជនគណបក្សនយោបាយ៥នាក់ និងព្រះសង្ឃ​៣​អង្គ។ ពលរដ្ឋដែលត្រូវបានចាប់ខ្លួនទាំងនោះ មាន១១នាក់ ត្រូវបានផ្តន្ទាទោស និងកំពុងជាប់ពន្ធនាគារព្រៃសរ រីឯ៧ នាក់ទៀត ស្ថិតក្នុងការឃុំខ្លួនបណ្តោះអាសន្ន រង់ចាំសវនាការ។

នៅមានបន្តទៀត...

ការចាប់ចង នៅមិនទាន់ចប់នៅឡើយទេ ព្រោះសាលាដំបូងរាជធានីភ្នំពេញ ទើបនឹងចេញដីការថ្មីមួយទៀត កោះហៅមន្រ្តីគណបក្សសង្គ្រោះជាតិម្នាក់ទៀត ឲ្យចូលទៅបំភ្លឺ នៅថ្ងៃទី២៥ ខែធ្នូ ឆ្នាំ២០១៤នេះ។ ដីកាដែល​ចុះថ្ងៃទី៨ ធ្នូ ដោយតំណាងអយ្យការ លោក កែវ សុវជាតិ បានកោះហៅលោក សាន សីហៈ អាយុ ២៦ឆ្នាំ មាន​តួនាទីលេខាធិការគណបក្សសង្គ្រោះជាតិ ឲ្យចូលទៅបង្ហាញខ្លួន ពីបទចូលរួមចលនាកុប្បកម្ម កាល​ពី​ថ្ងៃ​ទី១៥ ខែកក្កដា ឆ្នាំ២០១៤ នាទីលានប្រជាធិបតេយ្យ។ មន្ត្រីគណបក្សប្រឆាំងរូបនេះ អាច​នឹង​ត្រូវ​ផ្តន្ទាទោស​​ដាក់​ពន្ធនាគារពី៧ឆ្នាំ ទៅ១៥ឆ្នាំ តាមមាត្រា៤៥៦ និង ៤៥៧ នៃ​ក្រម​ព្រហ្មទណ្ឌ។

ការចាប់ និងការឃុំខ្លួនជាបន្តបន្តាប់នេះ ត្រូវបានអង្គកាសង្គមស៊ីវិលជាតិ និងអន្តរជាតិ ចាត់ទុកថា ជាការ​រំលោភ​បំពានសិទ្ធិមនុស្សធ្ងន់ធ្ងរ និងរំលោភបំពានលើប្រព័ន្ធតុលាការ។

ក្នុងសេចក្តីថ្លែងការណ៍មួយ ចុះថ្ងៃ៨ ខែធ្នូ ឆ្នាំ២០១៤ របស់អង្គការលីកាដូ បានបង្ហាញនូវការសោក​ស្ដាយ​របស់ខ្លួន ចំពោះទង្វើរបស់អាជ្ញាធរ និងចាត់ទុកថាការចាប់ និងឃុំខ្លួននេះ«មិនត្រឹមត្រូវ» ព្រោះវាជាបញ្ហា​បន្តិចបន្ទួចប៉ុណ្ណោះ។ នាយិកាអង្គការសម្ព័ន្ធខ្មែរជំរឿន និងការពារសិទិ្ធមនុស្ស លីកាដូ កញ្ញា ណាលី ពីឡូក បានថ្លែងបញ្ជាក់ថា៖ «ការចាប់ខ្លួន និងការផ្តន្ទាទោសថ្មីៗទាំងនេះ បង្ហាញថាប្រព័ន្ធយុត្តាធិកា នៅតែស្ថិត​ក្នុង​ការគ្រប់គ្រងទាំងស្រុងពីអាជ្ញាធររដ្ឋ។ អ្នកណាក៏ដោយ ដែលមិនពេញចិត្តនឹងអាជ្ញាធររដ្ឋ ឬមិនគាំទ្រនឹងអ្នក​ដែលមានអំណាច និងមានលុយ នោះអ្នកនោះនឹងមានគ្រោះថ្នាក់ អាចជាប់ពន្ធនាគារ។»

រីឯលោក សួន ប៊ុនស័ក្ដិ លេខាធិការដ្ឋាននៃគណៈកម្មាធិការប្រព្រឹត្តកម្ម នៃអង្គការ-សមាគម​ការពារសិទ្ធិ​មនុស្ស (CHHRAC) បានចាត់ទុកសកម្មភាព របស់មន្រ្តីអាជ្ញាធរសារធារណៈនេះថា ជារូបភាពមួយ ដែល​មន្ត្រី​អនុវត្ត​ច្បាប់របស់រដ្ឋាភិបាលកំពុង«រំលោភសិទ្ធិមនុស្សធ្ងន់ធ្ងរ»។ លោកបានថ្លែងឲ្យដឹងទៀតថា៖ «រដ្ឋាភិបាល​គប្បី​ពិនិត្យ​ឡើង​វិញពីវិធីសារនានា ស្ដីពីសិទ្ធិមនុស្ស ដែលខ្លួនបានទទួលស្គាល់»។

ចាប់ចង ដើម្បីបម្រើនយោបាយ?

សម្រាប់អាជ្ញាធរ និងរដ្ឋាភិបាលវិញ បានហៅចំណាត់ការទាំងនេះ ថាជាការអនុវត្តន៍ច្បាប់របស់កម្ពុជា។ មេបញ្ជាការរងកងទ័ពជើងគោក លោក ហ៊ុន ម៉ាណែត ដែលជាកូនប្រុសច្បងរបស់លោកនាយករដ្ឋមន្រ្តី ហ៊ុន សែន បានថ្លែងពីប្រទេសកូរ៉េខាងត្បូងថា ការចាប់ខ្លួនអ្នកទាំង១៨នាក់ ដើម្បីតែការពារសណ្តាប់ធ្នាប់​សន្តិសុខ​ជាតិ។ លោក ហ៊ុន ម៉ាណែត បានបញ្ជាក់ឲ្យដឹងថា៖ «ជាងមួយឆ្នាំហើយ ដែលគាត់ធ្វើសកម្មភាពទាំងអស់ ដែលយើងមិនធ្វើអីទេ យើងយោគយល់ខ្លាំងណាស់។ សាកធ្វើនៅកូរ៉េមើល អត់ច្បាប់ ចេញទៅរញ៉េរញ៉ៃអត់​ច្បាប់មើល បើគាត់វ៉ៃខ្នោះឡើងឡាន!»

យ៉ាងណាក៏ដោយ ក៏ការជជែកទៅជជែកមកខាងលើ បានត្រឹមតែជាភាសាមួយ ដែលស្ដាប់គ្នាមិនសូវ​ឮ​ប៉ុណ្ណោះ ព្រោះហេតុការណ៍ទាំងនេះ អាចជាកិច្ចកលឧបាយនៅក្នុងនយោបាយ។ ដូចមន្ត្រីអង្គការលីកាដូ លោក អំ សំអាត បានថ្លែងថា អ្នកដែលបានចាប់ខ្លួនទាំងនោះ គ្រាន់តែជាកូនអុក ឬគ្រាប់ឡុកឡាក់ នៃអ្នក​នយោបាយ​ប៉ុណ្ណោះ។ លោកស្នើដល់អ្នកនយោបាយទាំងអស់ ឈប់ប្រើប្រាស់ប្រជាពលរដ្ឋ ដើម្បីផល​ប្រយោជន៍​«នយោបាយ»​របស់ខ្លួនតទៅទៀត៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...