«មិនមែនមាន័យថា ឲ្យតែលួចរបស់ស្រីៗ គេមិនហ៊ានជិះតាម ហើយលួចបានសម្រេចរហូតនោះទេ គឺគង់តែ​មានថ្ងៃ​អស់​លក័្ខ មិនខាន» នេះជាលើកឡើង របស់យុវជនអ្នកចូលរួមចាប់ចោរ ឆក់ទូរស័ព្ទស្ត្រីរងគ្រោះម្នាក់ ដែលមិនបាន​សម្រេច តែបែរជាត្រូវម្ចាស់គេជិះដេញទាន់ ចាប់បាន ជាមួយប្រជាពលរដ្ឋ ជាច្រើននាក់ទៀត។

ជនដៃដល់ ដែលបានធ្វើសកម្មភាពឆក់ នៅពេលកំពុងជិះម៉ូតូនេះ ឈ្មោះ ហេង មករា អាយុ៣០ឆ្នាំ គ្មានមុខរបរ​ពិត​ប្រាកដ រស់នៅភូមិបប្រ៉កខាងជើង សង្កាត់កាកាប ខណ្ឌពោធ៍សែនជ័យរាជធានីភ្នំពេញ បានឆក់ទូរស័ព្ទដៃ ម៉ាក អាយហ្វូន​៥ របស់ស្រ្តីរងគ្រោះម្នាក់ ដែលកំពុងជិះម៉ូតូ មានគ្នា៣នាក់ ក្នុងទិសដៅស្របគ្នា តាមបណ្តោយផ្លូវ ហាណូយ។ អ្នក​ឃើញហេតុការណ៍ បានប្រាប់ឲ្យដឹងថា មុនពេលកើតហេតុ គេឃើញនារីរងគ្រោះជិះ ម៉ូតូម៉ាកនិច ពណ៍​លឿង​ស្លាក​លេខភ្នំពេញ១BQ-៤០០៥ ស្រាប់តែមកដល់កន្លែងកើតហេតុ បុរសម្នាក់បើកម៉ូតូសង់ ឌ្រីម ពណ៍ខ្មៅ ស្លាកលេខ​ភ្នំពេញ ១CS-៨៩៥០ តាមពីក្រោយ ហើយធ្វើសកម្មភាពឆក់ទូរស័ព្ទ ពីជនរងគ្រោះភ្លាមៗ។

ហេតុការណ៍ឆក់ទូរស័ព្ទដៃនេះ បង្ករការភ្ញាក់ផ្អើល កាលពីវេលាម៉ោង២ និង៣០នាទីរសៀល ថ្ងៃទី០១ ខែមិថុនា ឆ្នាំ​២០១៥ នៅតាមបណ្តោយ ផ្លូវហាណូយ ក្នុងភូមិទឹកថ្លា សង្កាត់ទឹកថ្លា ខណ្ឌសែនសុខ រាជធានីភ្នំពេញ។ ស្រ្តីរងគ្រោះ​ឈ្មោះ សៀវ ហ្វង អាយុ២១ឆ្នាំបានឲ្យដឹងថា នៅពេលដែលចោរម្នាក់នេះ បានឆក់ទូរស័ព្ទនាង មិត្តភក្កិនាង បានបើក​ម៉ូតូ​តាម​ចោរនោះយ៉ាងលឿន ហើយព្យាយាមស្រែករកជំនួយ ពីអ្នកជិតខាងឲ្យជួយចាប់ បន្តិចក្រោយមក ក៏ក្របួចបាន​ចោរឆក់​ខាងលើ ប្រគល់ឲ្យសមត្ថកិច្ច។ នារីជាជនរងគ្រោះខាងលើ ជាជាងអ៊ុតសក់ម្នាក់ រស់នៅ (លេខផ្ទះ និងផ្លូវ មិន​ដាក់ផ្សាយនៅទីនេះទេ ដើម្បីសុវត្ថិភាពជនរងគ្រោះ) សង្កាត់អូឬស្សីទី១ ខណ្ឌ៧មករា រាជធានីភ្នំពេញ។

បច្ចុប្បន្ន ជនជាប់ចោទត្រូវបានឃុំខ្លួន ជាបណ្តោះអាសន្ន នៅប៉ុស្តិ៍នគរបាលទឹកថ្លា ដើម្បីកសាងសំនុំរឿង បញ្ជូន​ទៅ​កាន់​អធិការដ្ឋាន នគរបាលខណ្ឌសែនសុខ ធ្វើការដោះស្រាយទៅតាមផ្លូវច្បាប់៕