បន្ទាប់ពីឃើញវត្តមាន លោក រ៉ុង ឈុន សមាជិកថ្មី គ.ជ.ប ក្នុងទិវាពលកម្មអន្តរជាតិ ថ្ងៃទី១ ខែឧសភានេះ គណបក្ស​ប្រជាជន​កម្ពុជា ចេញសេចក្តីថ្លែងការណ៍ ថ្កោលទោស ចំពោះលោក រ៉ុង ឈុន។ បន្តិចក្រោយមក លោក ស៊ិក ប៊ុនហុក ប្រធាន​ថ្មី​របស់ គ.ជ.ប បានធ្វើប្រតិកម្ម តាមក្រោយភ្លាមៗ នៅតាមបណ្តាញសារព័ត៌មាន ទាំងស្ថាប័ន គ.ជ.ប នៅមិន​ទាន់​មាន​បទបញ្ញតិ្តត្រឹមត្រូវ ក្នុងការហាមឃាត់ ឬយ៉ាងណា ចំពោះសមាជិកទាំង៩របស់ខ្លួន នៅឡើយនោះ។

ឆ្លើយតបនឹងប្រតិកម្មខាងលើ សកម្មជនគណបក្សសង្គ្រោះជាតិ ដ៏ល្បីឈ្មោះ និងស្ថាបនិកវិទ្យុខ្មែរប៉ុស្តិ៍ លោក មាជ សុវណ្ណរ៉ា បានលើកឡើង ប្រាប់ទស្សនាវដ្ដីមនោរម្យ.អាំងហ្វូថា នោះមិនមែនជាកំហុសអ្វី របស់លោក រ៉ុង ឈុន ឡើយ ព្រោះ​ថ្ងៃនោះ ជាទិវាពលកម្មអន្តរជាតិ ដែលពលរដ្ឋគ្រប់រូប មានសិទ្ធិក្នុងពេលឈប់សំរាក ពីការងារ និងអាចចូលរួម ក្នុង​ពិធី​នោះ (សង្គម) បានគ្រប់ៗគ្នា ដោយមិនគិត ពីនិន្នាការនយោបាយ។

ផ្ទុយទៅវិញ លោក សុវណ្ណារ៉ា បានអះអាងថា ប្រតិកម្មរបស់ប្រធាន គ.ជ.ប. អាចទទួលយកបាន បើ គ.ជ.ប ថ្មី ដែលមាន​សមាជិក ត្រឹមតែ៩រូបនេះ បានបង្កើតឡើង នូវបទបញ្ជាផ្ទៃក្នុង ឬក្នុងលក្ខខន្តិកៈរបស់ខ្លួន ធ្វើការដាក់កំហិត ឬហាមឃាត់ ចំពោះសមាជិកទាំង៩រូប របស់ខ្លួន មិនឲ្យចូលរួម ក្នុងកម្មវិធីសង្គមណាមួយនោះ។ លោកបន្តថា ករណីនេះ លោក ស៊ិក ប៊ុនហុក អាចធ្វើការព្រមាន ការដាក់ទោស ការពិន័យ ឬក្រើនរំលឹក បានត្រឹមកិច្ចការផ្ទៃក្នុងរបស់ខ្លួន។

តែនេះ មិនទាន់ទាំងមានច្បាប់ផង ក៏បានប្រើប្រាស់ នូវអំណាច ក្នុងនាមខ្លួន ជាអតីតមន្រ្តី មកពីគណបក្សកាន់អំណាច យក​មកគម្រាមកំហែងគេ ទៅវិញ។ លោក សុវណ្ណារ៉ា បានបន្ថែមទៀតថា៖ «នេះ យើងមិនទាន់ដំណើរការ បានស្រួលបួល​ផង យើងទៅថា គេហ្នឹងអត់ឯករាជ្យ ទៅចូលរួមអញ្ចឹង (ទិវាពលកម្មអន្តរជាតិ) អត់បាន វាអត់ត្រូវ! ព្រោះការចូលរួមនោះ ចំថ្ងៃកណ្តាល ថ្ងៃឯករាជ្យ ថ្ងៃឈប់សំរាក ពីការងារ អ្នកណា ក៏អាចចូលរួមបាន ក្នុងនាមជាពលរដ្ឋខ្មែរម្នាក់។»

ទង្វើរបស់លោក ស៊ិក ប៊ុនហុក ដែលប្រកាសជាសាធារណៈ តាមសារព័ត៌មាន ក្នុងការព្រមាន និងក្រើនរំលឹកដល់លោក រ៉ុង ឈុន នាដំណាក់កាលនេះ វាហាក់ដូចជាជ្រុល និងមានសភាពអាក្រក់មើលណាស់។ លោក សុវណ្ណារ៉ា ដែលទើបនឹង​រួច​ពី​ពន្ធនាគារ តែស្ថិតនៅក្រោមការឃ្លាំមើល របស់តុលាការនៅឡើយនេះ បានយល់ឃើញថា ត្រឹមសមាជិក​តែ៩នាក់​ប៉ុណ្ណោះ តើមានអ្វី ដែលមិនអាចធ្វើការនិយាយ ដោះស្រាយ ឬសម្រុះសម្រួលគ្នាបាន?

លោក បានពន្យល់ទៀតថា៖ «កុំឲ្យយើងបង្ហាញភាពសំញែង ជាប្រធាន គ.ជ.ប និងជាអតីតមន្រ្តីជាន់ខ្ពស់ គណបក្ស​ប្រជាជន​កម្ពុជា និងជាអ្នកតំណាងរាស្រ្ត ទៅទៀតនោះ មិនបានយកការដោះស្រាយ ដោយសន្តិវិធី ឬផ្លូវច្បាប់មកជជែកគ្នា បែរជាទៅបរិហារតាមបណ្តាញសារព័ត៌មានជាតិ និងអន្តរជាតិ នោះជាការខុសឆ្គងគន្លងសីលធម៌ក្នុងភាពជាអ្នកដឹកនាំ។ (...) សំខាន់នៅត្រង់ថា យើងចេះធ្វើការជាមួយគ្នា ឲ្យតម្លៃគ្នា និងមានបញ្ញត្តិច្បាប់ ជាគោលសម្រាក់ការអនុវត្ត និងការដាក់​ពិន័យទាំងអស់គ្នា។»

មិនអាចទាក់ទងមន្រ្តីនាំពាក្យ គ.ជ.ប លោក ហង្ស ពុទ្ធា ដើម្បីពន្យល់ពីហេតុការណ៍ទាំងនេះ និងឆ្លើយតបទល់ នឹងការ​លើក​ឡើងខាងលើ បានទេ នៅពេលនេះ៕