ជនខ្មាន់កាំភ្លើងទាំងពីរនាក់ បានធ្វើដំណើរ  ដោយរថយន្ដ មកដល់មុខកន្លែងកើតហេតុ ដែលជាមជ្ឈមណ្ឌលមួយ ហៅ «Curtis Culwell Center» ហើយភ្លាមៗនោះ បានបាញ់រះ ទៅលើភ្នាក់ងារសន្តិសុខមួយរូប។ នេះបើតាមការថ្លែងឲ្យដឹង ពីសំណាក់អាជ្ញាធរតំបន់ ដែលបានចេញផ្សាយ សេចក្ដីប្រកាសព័ត៌មាន នៅក្រោយហេតុការណ៍នោះ នៅលើទំព័រទ្វីសធើរ និងហ្វេសប៊ុករបស់ខ្លួន។ ហេតុការណ៍ បានកើតឡើង នៅសង្កាត់ ហ្គាឡេន (Garland) ក្បែរងនឹងក្រុង ដាឡាស របស់រដ្ឋ​តិចសាស ភាគខាងត្បូងសហរដ្ឋអាមេរិក។

នគរបាលបានមកដល់ ទីកន្លែងក្នុងពេលបន្ទាប់នោះ ហើយបានប្រតិកម្ម ដោយបាញ់តប ទៅក្រុមខ្មាន់កាំភ្លើង ដោយ​សម្លាប់​ពួកគេទាំងពីរ បានភ្លាម។ នៅក្នុងពេលភ្លាមៗ នគរបាលមិនទាន់អាចបញ្ជាក់បាននៅឡើយថា ជនទាំងពីរ អាច​ជាប់​ទាក់ទង នឹងបណ្ដាញភេវរកម្មណាមួយ។

បើតាមប្រព័ន្ធផ្សព្វផ្សាយក្នុងស្រុកជាច្រើន ពិពណ៌ស្ដីពីរូបកំប្លែង ទាក់ទងនឹងមហាមេដ ត្រូវបានរៀបចំឡើង ក្នុង​មជ្ឈ​មណ្ឌល​នេះ ដោយសមាគមអាមេរិក ការពារសិទ្ធិសេរីភាព (American Freedom Defense Initiative - Afdi) ដែល​គេ​ស្គាល់ថា ជាក្រុមអភិរក្សអាមេរិក មាននិន្នាការប្រឆាំង អ៊ីស្លាម។ នៅក្នុងការរៀបចំតាំងពិពណ៌នេះ នឹងរផ្ដល់រង្វាន់ ទៅឲ្យ​ម្ចាស់​គំនូរណា ដែលទទួលជ័យជំនះ ពីគំនូរបស់ខ្លួន ក្នុងចំនួនទឹកប្រាក់ ១០ ០០០ដុល្លារ។

នៅមុនព្រឹត្តិការណ៍នេះបន្តិច លោក ហ្សែរ វីលដ័រ (Geert Wilders) អ្នកនយោបាយជាតិ ហូឡង់ មួយរូប បានមានវត្តមាន​នៅទីនោះ។ លោកឡើងថ្លែងសុន្ទរកថា រួចបានចាកចេញទៅវិញ មុនការបាញ់បោះបានកើតឡើង។

សេចក្ដីប្រកាសព័ត៌មានរបស់នគរបាល បានបញ្ជាក់បន្ថែមថា រថយន្ដរបស់ខ្មាន់កាំភ្លើង ជាមានគ្រាប់បែក។ ក្រុមអ្នក​ជំនាញ ខាងដោះមីន និងដោះគ្រាប់បែក កំពុងធ្វើការរបស់ពួកគេ នៅនឹងកន្លែង។ ដើម្បីបញ្ជៀស នូវគ្រោះថ្នាក់ ដែល​អាច​កើត​ដោយ​យថាហេតុ អ្នកចូលរួមក្នុងពិពណ៌ទាំងអស់ ព្រមទាំងអ្នកលក់ដូរ និងអ្នកធ្វើការ នៅជុំវិញមជ្ឈមណ្ឌល ត្រូវបាន​ជម្លៀស​ខ្លួន​ចេញ ទៅ​រក​ទីកន្លែងមានសុវត្ថិភាព៕