អាជ្ញាធរខាងយុត្តិធម៌ របស់សហរដ្ឋអាមេរិក បានប្រកាសអោយដឹងថា បុរសម្នាក់ ដែលអួតថា ខ្លួនមានជាប់ទាក់ទង នឹង​បណ្ដាញភេវរកម្មអាល-កៃដា ហើយចង់ដាក់ បំផ្ទុះគ្រាប់បែកទំងន់៤៥គីឡូ នៅពីមុខអាគារឯកសារមួយរបស់សហព័ន្ធ នៅទីក្រុងញ៉ូយកនោះ ត្រូវបានគេឃាត់ខ្លួន កាលពីថ្ងៃពុធទី១៧តុលាព្រឹក។

កាហ្សី មូហាមេដ និងអាគារដែលគេចង់ដាក់គ្រាប់បែបបំផ្ទុះ។

បុរសនោះអាយុ២១ឆ្នាំ មានដើមកំណើតមកពីបង់ក្លាដេស ត្រូវបានគេចាប់ឃាត់ខ្លួន ក្រោយពីជននេះបានខិតខំ បំផ្ទុះ​គ្រាប់​បែក​របស់ខ្លួន តែមិនបានសំរេច ដោយហេតុជននេះ ត្រូវភ្នាក់ងារស៊ើបអង្កេតសហព័ន្ធ អេហ្វប៊ីអាយ (FBI) តាមដាន​តាំង​ពីច្រើនខែមកហើយ។ កាហ្សី មូហាមេដ រេហ្សវាណុល អាសាន់ ណាហ្វីស (Quazi Mohammad Rezwanul Ahsan Nafis) មានបំណង់ចង់ដាក់អោយផ្ទុះអាគារមួយ ដែលនៅមិនឆ្ងាយប៉ុន្មានពី អតីតអាគារពាណិជ្ជកម្មភ្លោះ (World Trade Center) ក្នុងផ្នែកខាងត្បូងនៃសង្កាត់ ម៉ាណាតាន់។

លោករដ្ឋអាជ្ញាសហព័ន្ធ នៅសង្កាត់ប្រូកគ្លីន (Brooklyn) បានបញ្ជាក់អះអាងក្នុងសេចក្ដីប្រកាសពត៌មានថា​ បុរសវ័យក្មេង​រូបនេះ បានមកដល់សហរដ្ឋអាមេរិក នៅខែមករា ឆ្នាំ២០១២ ក្នុងគោលបំណងចង់ធ្វើភេវរកម្ម។ ដោយធ្លាប់មានទំនាក់ទំនង ជាមួយ​នឹងបណ្ដាញភេវរកម្មអាល-កៃដា (Al-Qaïda) ជននេះបានស្វែងរក បង្កើតប្រព័ន្ធភេវរករមួយនៅសហរដ្ឋអាមេរិក។

តែមនុស្សម្នាក់ ក្នុងចំណោមមនុស្សជាច្រើន ដែលជននេះស្វែងរកនោះ ជាភ្នាក់ងារសម្ងាត់របស់ អេហ្វប៊ីអាយ ហើយបាន​ចូលរួមក្នុងការត្រៀមរៀបចំរបស់ជននេះ។ គឺភ្នាក់ងារនេះហើយ ដែលបានប្រគល់ទៅអោយជននេះ ទៅតាមការចង់បាន គឺម្សៅបំផ្ទុះទំងន់២២,៥គីឡូក្រាម ចំនួន២០កញ្ចប់។ បុរសវ័យក្មេងបានទិញម៉ាស៊ីនដាក់បញ្ជាអោយផ្ទុះមួយទៀត ដោយ​និយាយជាច្រើនដងពីកន្លែងដែល គេចង់ធ្វើសកម្មភាព។

នៅក្នុងសេចក្ដីថ្លែងការណ៍សរសេរដោយដៃ បាននិយាយថា កាហ្សី មូហាមេដ ​បានត្រៀមធ្វើសកម្មភាព​នេះ ក្នុងនាម អាល-កៃដា ដោយ​អះអាងពីបំណងចង់បំផ្លាញសហរដ្ឋអាមេរិក ហើយអ្វីដែលត្រូវធ្វើអោយមានប្រសិទ្ធិភាព គឺត្រូវ​បំផ្លាញ​អោយចំគោលដៅ «សេដ្ឋកិច្ចអាមេរិកាំង»។ លោករដ្ឋអាជ្ញាបានបន្តថា ជននេះបានបញ្ជាក់ហើយបញ្ជាក់​ទៀតថា «ខ្លួនស្រឡាញ់ អ៊ូសាម៉ា ប៊ែនឡាដែន យ៉ាងជ្រាលជ្រៅ»។

នៅថ្ងៃពុធព្រលឹមឡើងស្រាងៗ ជននេះបានជួបម្ដងទៀត ភ្នាក់ងារសម្ងាត់របស់ អេហ្វប៊ីអាយ ជាថ្មីទៀត ហើយបានធ្វើ​ដំណើរ​ទៅជាមួយគ្នា នៅក្នុងឃ្លាំងមួយ ដើម្បីផ្គុំគ្រឿងផ្ទុះ ដែលជននេះគិតថា នឹងអាចប្រើបាន។  តែគ្រឿងម៉ាស៊ីនទាំងនេះ សុទ្ធតែមិនដំណើរការទាំងអស់  តែជននេះមិនបានគិតដល់នោះទេ។ បន្ទាប់មកជននេះ បានចេញដំណើរទៅកាន់ អាគារឯកសាររបស់សហព័ន្ធ កន្លែងដែលខ្លួនបានចតឡានជិតនោះ។ ជននេះបានឆ្លៀតថតវីដេអូមួយ នៅក្នុងសណ្ឋាគារ​ជិតនោះ ដោយបាននិយាយថា «យើងនឹងមិនបឈ្ឈប់ទេ បើមិនទាន់ទទួលបានជ័យជំនះ» បន្ទាប់មក បានសាកល្បង នឹងបំផ្ទុះគ្រាប់បែកឡើង ជាមួយនឹងទូរស័ព្ទដៃ។

កងកម្លាំងនគរបាល បានធ្វើការឃាត់ខ្លួនជននេះ ដោយបានចោទ ពីបទខិតខំប្រើប្រាស់អាវុធបំផ្លិចបំផ្លាញ និងខិតខំផ្ដល់ ទៅអោយបណ្ដាញអាល-កៃដា នូវការគាំទ្រជាសម្ភារះ។ ជនដ៏ក្មេងនេះ អាចនឹងមានទោសជាប់ពន្ធនាគា មួយជីវិត៕

--------------------------------------------------
ដោយ សេក មនោរកុមារ - ប៉ារីស​ ថ្ងៃទី១៧ ខែតុលា ឆ្នាំ២០១២
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ