បន្ទាប់ពីបញ្ចេញរូបនាង នៅក្នុងវីដេអូមួយ ដែលមានលក្ខណៈបណ្ដុះបង្អាប់ ហើយត្រូវបានបង្ហោះ ធ្វើឲ្យដឹងអស់ទាំង​មនុស្ស​ម្នា នៅក្នុងសង្កាត់របស់នាងនោះ យុវតីជំទង់អាយុ១៥ឆ្នាំមួយរូប  បានសម្រេចចិត្តធ្វើអត្តឃាត កាលពីយប់ថ្ងៃអង្គារ កន្លងមកនេះ ដោយបានលោតតាមបង្អួច ពីផ្ទះរបស់នាង ដែលស្ថិតនៅក្នុងក្រុង ស្តាំង (Stains នៃតំបន់ Seine-Saint-Denis) ភាគខាងជើង នៃតំបន់ជាយរដ្ឋធានី ប៉ារីស។ នេះបើតាមប្រភព ពីសមត្ថកិច្ចនគរបាលបារាំង បញ្ជាក់ប្រាប់​ទី​ភ្នាក់​ងារ សារព័ត៌មាន​បារាំង អាអេហ្វប៉េ។

ប្រភពនោះ បានថ្លែងបញ្ជាក់ថា យុវតីជំទង់ បានលោតតាមបង្អួច ពីផ្ទះរបស់នាង ដែលស្ថិតនៅជាន់ទី៤ នៃអាគារស្នាក់នៅ កណ្ដាលសង្កាត់មួយ សម្បូរទៅដោយមនុស្ស។ឪពុកម្ដាយ និងបងប្អូនប្រុស របស់យុវតី បានស្ថិតក្នុងផ្ទះនោះ នៅពេល​ដែល​ហេតុការណ៍កើតឡើង។ ប៉ុន្តែពួកគេ មិនបានចាប់អ្វីប្លែក នៅមុនពេលកើតហេតុ រហូតមកដល់ពេល ដែលឮស្នូរ បោក​ដ៏ខ្លាំងមួយ ទៅលើដី។

បើតាមប្រភពពីនគរបាល បានបញ្ជាក់ទៀតថា ក្មេងស្រីជំទង់ ទទួលរងនូវបញ្ហាជាច្រើន ដែល​បណ្ដាល មកពីរូបភាព​របស់​នាង នៅក្នុងវីដេអូមួយ ដែលមានលក្ខណៈបរិហារកេរ្តិ៍ បណ្ដុះបង្អាប់ ដល់រូបនេះ។ វីដេអូនោះ ត្រូវ​បានបង្ហោះ នៅលើ​បណ្ដាញ​សង្គម ហើយមានមនុស្សជាច្រើន រយពាន់នាក់ ជាពិសេសអ្នករស់នៅ ក្នុងសង្កាត់ជាមួយ បានចូលទៅទស្សនា។ បន្ទាប់​ពី​ការផ្សាយ របស់វីដេអូនោះ នាងតូចទំនងជាបានរង នូវសម្ពាធផ្លូវចិត្ត និងការប្រមាថជេរផ្ដាសារ ដែលមិនអាច​ទ្រាំទ្រ​បាន ពីសំណាក់អ្នកនៅជុំវិញនោះ ថែមទៀត។

យ៉ាងណាក៏ដោយ សាកសពរបស់យុវតី ត្រូវបានបញ្ជូនទៅធ្វើកោសល្យវិច័យ នៅក្នុងវិទ្យាស្ថាន វេជ្ជសាស្ត្រ និងច្បាប់ របស់​រដ្ឋធានី ប៉ារីស ហើយការស៊ើបអង្កេត ត្រូវបានបើកធ្វើ ដោយអាជ្ញាធរតំបន់ «Seine-Saint-Denis» ដើម្បីស្វែងរក ពីមូលហេតុ​ពិតប្រាកដ នៃមរណភាពដ៏រន្ធត់នេះ។

នេះ ចាត់ទុកជាការព្រមានមួយ សម្រាប់ឪពុកម្ដាយ ឬអាណា​ព្យាបាល​ទាំងអស់ ដែលមានកូនចៅ ចូលដល់វ័យជំទង់ ត្រូវ​តែធ្វើការប្រុងប្រយ័ត្ន ចំពោះការផ្សព្វផ្សាយទាំងឡាយ ដែលបាន​ធ្វើ​តាម​បណ្ដាញផ្សព្វផ្សាយនានា ដូចយ៉ាងទូរទស្សន៍ និង​បណ្ដាញ​សង្គមជាដើម៕