រូបភាពដ៏តក់ស្លុត កាលពីសប្ដាហ៍កន្លងទៅ បង្ហាញពីម្ដាយវ័យក្មេងម្នាក់ បន្ទាប់ពីបានសង្គ្រោះ កូនប្រុស​របស់​ខ្លួនរួច ត្រូវបានជណ្ដើរយន្ដ​ទាញយកទៅ រមូរខ្លួនរហូតស្លាប់នោះ នៅមិនទាន់ផុតរលត់​នៅឡើយ។ ប៉ុន្តែ​រូបភាព​ថ្មីមួយ ទើបនឹងកើតឡើងទៀត នៅចុងសប្ដាហ៍កន្លងទៅនេះ ក្នុងទីក្រុងសៀងហៃ ប្រទេសចិន បណ្ដាល​ឲ្យ​បណ្ដា​ជនចិន បានសម្ដែង​ប្រតិកម្ម​សារជាថ្មី។

លោក ហ្សាង ស៊ីសេង (Zhang Shisheng) បុគ្គលិកបោសជូនមួយរូប ក្នុងមជ្ឈមណ្ឌលពាណិជ្ជកម្ម ដ៏ធំរបស់​ទីក្រុងភាគខាងកើត នៃប្រទេសចិន បានធ្លាក់ទៅក្នុងចន្លោះជណ្ដើរយន្ដ កាលពីថ្ងៃអាទិត្យទី២ ខែសីហានេះ។ ដូចអ្វីដែលបានបង្ហាញឲ្យឃើញ នៅក្នុងរូបភាពវីដេអូសុវត្ថិភាព សន្ទះបិទម៉ាស៊ីន នៃជណ្ដើរយន្ដ​បានរបើក​ឡើង បានធ្វើឲ្យលោក ស៊ីសេង អាយុ៣៥ឆ្នាំ ធ្លាក់ចូលទៅក្នុងនោះ។

ភ្លាមៗនោះ បុរសអ្នកបោសជូត បានប្រតិកកម្មភ្លាម ដោយឈោងទៅចុច ប៊ូតុង ដើម្បីបញ្ឈប់​ជណ្ដើរយន្ដ​ជា​បន្ទាន់... តែយឺតពេលទៅហើយ។ បើជើងមួយចំហៀងរបស់លោក ស៊ីសេង បានលើកផុត រួចផុតពីគ្រោះថ្នាក់​នោះ ជើងមួយចំហៀងទៀតវិញ មិនមានសំណាងដូច្នេះឡើយ ដោយបានជាប់គាំង នៅក្នុងជណ្ដើរយន្ដ អស់​ជាច្រើននាទី រហូតដល់ក្រុមអ្នកជួយសង្គ្រោះ បានមកដល់ ដើម្បីទាញលោកចេញ ពីចន្លោះមរណៈនោះ។

ទៅដល់មន្ទីរពេទ្យ ស្ថានភាពរបស់លោក ស៊ីសេង មិនប៉ះពាល់ដល់ជីវិតទេ តែជើងខាងឆ្វេងរបស់លោក ត្រូវ​បានគ្រូពេទ្យកាត់ផ្ដាច់។

គ្រាន់តែរំលងគ្នា ត្រឹមតែ២សប្ដាហ៍ប៉ុណ្ណោះ គ្រោះថ្នាក់បណ្ដាលមកពី សន្ទះជណ្ដើរយន្ដ ដែលមិនត្រូវបានបិត ចាប់ខ្ចៅឲ្យល្អនោះ បានកើតឡើងដល់ទៅពីរករណី។ កាលពីឆ្នាំកន្លងទៅ នៅប្រទេសចិន គ្រោះថ្នាក់​ប្រហាក់​ប្រហែលគ្នា បានបណ្ដាលឲ្យមានមនុស្សស្លាប់ ៣៧នាក់។ អ្នកជំនាញជាច្រើននាក់ បានបរិហារថា ហេតុ​ការណ៍​ដដែលៗនេះ បានកើតឡើង ដោយមូលហេតុ ការត្រួតពិនិត្យ ទៅលើជណ្ដើរយន្ដទាំងនោះ មាន​សភាព​មិនហ្មត់ចត់ មិនគ្រប់គ្រាន់ និងសម្ភារៈបំពាក់ ឲ្យជណ្ដើរយន្ដទាំងនោះ មានលក្ខណៈមិនរឹងមាំ៕