គឺនៅថ្ងៃទី៣០ ខែមេសា កាលពី៧០ឆ្នាំមុន នេះហើយ ដែលមហាជនផ្ដាច់ការ នៅក្នុងប្រវត្តិសាស្ត្រមនុស្សជាតិ អាដុហ្វ៍ ហ៊ីត្លែ ត្រូវបានគេដឹងថា បានធ្វើអត្តឃាត ក្នុងរដ្ឋធានីប៊ែឡាំង មាតុភូមិអាល្លឺម៉ង់របស់ខ្លួន នៅមុនកងទ័ពរបស់ប្រទេសរ៉ូស្សី បានវាយលុកចូលមកដល់។ រហូតមកដល់ពេលនេះ បណ្ដាអ្នកស្រាវជ្រាវទាំងឡាយ នៅមិនទាន់បាន បញ្ចប់ទាំង​ស្រុង​នៅ​ឡើយ ពីអាថ៌កំបាំងនានា នៅក្នុងជីវិតរបស់ ហ៊ីត្លែ និងការដឹកនាំរបស់គាត់ ដែលសម្បូរហូរហៀ ទៅដោយសំណួរចោទសួរ រាប់​មិន​អស់។

ខាងក្រោមនេះ ជាអាថ៌កំបាំងទាំងបួន នៃជីវិតរបស់ អាដុហ្វ៍ ហ៊ីត្លែ ដែលលោកអ្នកមិនដឹង ឬអាចមិនដឹង។

១) ហ៊ីត្លែ ញៀនថ្នាំ មេតាហ្វេតាមីន

ក្នុងរបាយការណ៍សម្ងាត់មួយ របស់កងទ័ពអាមេរិក កម្រាស់៤៧ទំព័រ បានឲ្យដឹងថា អាដុហ្វ៍ ហ៊ីត្លែ ជាមនុស្សមានអារម្មណ៍ មិននឹងនរម្នាក់។ អតីតមេដឹកនាំរូបនេះ តែងលេបថ្នាំងងុយគេង ដើម្បីឲ្យខ្លួនឯង បានគេងលក់ និងតែងបានលេបថ្នាំ ជំនួយ​កម្លាំង ដើម្បីអាចនៅស្វាង រហូតពេញមួយថ្ងៃបាន។ នៅចុងសង្គ្រាមលោកលើកទីពីរ មហាជនផ្ដាច់ការ បានធ្លាក់​ខ្លួន ញៀន​ថ្នាំ មេតាហ្វេតាមីន យ៉ាងក្រាស់ក្រែល។ ហើយថ្នាំនេះទៀតសោធ ក៏ត្រូវបានទាហាអាល្លឺម៉ង់ នៅខ្សែរត្រៀម​ជួរ​មុន យក​មក​ប្រើ​ប្រាស់​ដែរ។

២) លិង្គ មានប្លោកតែម្ខាង

ក្នុងឆ្នាំ១៩៦៨ អ្នកកាសែតរ៉ូស្សីម្នាក់ បានយករបាយការណ៍ ធ្វើកោសល្យវិច័យ របស់ក្រុមគ្រូពេទ្យរ៉ូស្សី ដែលបានពិនិត្យ​សាកសព ធ្វើអត្តឃាតរបស់ ហ៊ីត្លែ បានផ្សាយថា ក្រុមគ្រូពេទ្យទាំងនោះ មិនបានរកឃើញ ប្លោកខាងឆ្វេង នៃលិង្គរបស់ អតីតមេដឹកនាំផ្ដាច់ការ នេះឡើយ។ ប៉ុន្តែសម្រាប់ប្រវត្តិវិទូបារាំង លោក ហ្វ្រង់ស៊័រ ដែលហ្វា (François Delpla) ដែលមាន​ជំនាញខាងសិក្សាស្រាវជ្រាវ ពីប្រវត្តិរបស់ ហ៊ីត្លែ បាននិយាយថា៖ «ការសរសេរនោះ មានលក្ខណៈបំបាក់ បុគ្គលិក​លក្ខណៈ​របស់ ហ៊ីត្លែ។ ហើយបើទោះជា វាមានតែម្ខាងក៏ដោយ ក៏មិនមានអ្វី អាចរំខានការដឹកនាំ ដ៏ខ្លាំងក្លារបស់ ហ៊ីត្លៃ ក្នុង​សម័យ​នោះ​បាន​ដែរ។»

៣) ហ៊ីត្លែ មានគ្រួសារនៅអាមេរិក

ជាផ្លូវការ ហ៊ីត្លែ មិនមានកូនទេ។ តែនៅមាន ពាក្យចចាមអារាម ថាអតីតមេដឹកនាំរូបនេះ មានកូនប្រុស ជាជាតិបារាំង​ម្នាក់។ ផ្ទុយទៅវិញ រឿងដែលច្បាស់នោះ គឺ ហ៊ីត្លែ មានសាច់ឈាមបង្កើត កំពុងរស់នៅលើ ទឹកដីសហរដ្ឋអាមេរិក។

ឪពុក ហ៊ីត្លែ លោក អាល័រ ហ៊ីត្លែ (Alois Hitler) មានកូនប្រុសម្នាក់ ជាមួយប្រពន្ធមុន ដែលត្រូវជាម្ដាយដើម របស់ ហ៊ីត្លែ។ ហើយកូនប្រុស ដែលត្រូវជាបងប្រុស ម្ដាយដោយខ្លួន របស់ ហ៊ីត្លែ ត្រូវបានប្រព័ន្ធផ្សព្វផ្សាយ រកឃើញថា មានកូន​ប្រុស​បី​នាក់ បើទោះជាពួកគេ បានផ្លាស់ប្ដូរឈ្មោះក៏ដោយ។ ក្មួយបង្កើត របស់ ហ៊ីត្លែ ទាំងបីនេះ សព្វថ្ងៃកំពុងរស់នៅឯ «Long Island» ក្បែរនឹងទីក្រុងញ៉ូយក។

៤) តមចំណីយ៉ាងខ្លាំងក្លា

អ្នកភ្លក្សចំណីរបស់ ហ៊ីត្លែ អ្នកស្រី ម៉ាហ្គូ វ៉ូអែល (Margot Woelk) ដែលនៅរស់រហូតដល់សព្វថ្ងៃ ទើបនឹងថ្លែងប្រាប់ សារព័ត៌មាន​អង់គ្លេស «Daily Mail» ថា អ្នកស្រីបានបម្រើការ ឲ្យ ហ៊ីត្លែ អស់រយៈពេល២ឆ្នាំ សម្រាប់តួនាទី ជាអ្នក​ភ្លក្ស​ចំណី របស់ ហ៊ីត្លែ នៅមុនអតីតមេដឹកនាំរូបនេះ បរិភោគចូលទៅក្នុងពោះ។ នៅក្នុងរយៈពេលនោះ ហ៊ីត្លែ បានកំណត់ខ្លួន ពីការតមចំណីយ៉ាងខ្លាំងក្លា ដូចជាទទួលទាន តែម្ហូបបួស (គ្មានសាច់គ្មានត្រី) និងមិនមានបារី និងគ្មានសុរាឡើយ៕