លោក ប៉ា ងួនទៀត បានសរសេរផ្ដល់ ជាអនុសាសន៍មួយចំនួន ទៅឲ្យលោក ហ៊ុន សែន ក្នុងលិខិតចំហរមួយ ដែល​បាន​ផ្សព្វផ្សាយ ក្នុងគណនីហ្វេសប៊ុក ទៀង ប៉ា (Teang Pa ) របស់លោក និងដែលបានដាក់ទៅ កាន់ទីស្តីការគណរដ្ឋមន្រ្តី កាលពីថ្ងៃទី២២ ខែមេសា ឆ្នាំ២០១៥នេះ។

ក្នុងនាមជាប្រជាពលរដ្ឋខ្មែរ និងជាម្ចាស់ឆ្នោតម្នាក់ លោក ប៉ា ងួនទៀត នាយកប្រតិបត្តិមជ្ឃមណ្ឌលកម្ពុជា ដើម្បីប្រព័ន្ធ​ផ្សព្វផ្សាយឯករាជ្យ បានលើកឡើងក្នុងលិខិតរបស់ខ្លួនថា បើសិនជាលោក ហ៊ុន សែន ចង់ក្លាយខ្លួនជាវីរបុរស សម្រាប់​កម្ពុជា ក្នុងឱកាសដែលលោក កំពុងមានសិទ្ធិ និងអំណាចគ្រប់គ្រាន់ នាពេលនេះ តោងធ្វើយ៉ាងណា ជម្រុញ​ឲ្យ​កម្ពុជា មានការអនុវត្តច្បាប់ ដ៏មានប្រសិទ្ធិភាព និងពិតប្រាកដ ដើម្បីទទួលបានការគាំទ្រជាថ្មី ពីប្រជាពលរដ្ឋ ក្នុងអាណត្តិ​បោះ​ឆ្នោត ឆ្នាំ២០១៨ខាងមុខ ជៀសជាងធ្វើឲ្យប្រជាពលរដ្ឋ ដែលជាម្ចាស់ឆ្នោត រងទុក្ខវេទនា និងមានទុក្ខលំបាក ក្រោម​ការ​ដឹកនាំ​របស់ខ្លួន។

លោក ប៉ាង ងួនទៀង ដែលជានាយកវិទ្យុ សម្លេងប្រជាធិបតេយ្យផងនោះ បានស្នើដល់នាយករដ្ឋមន្រ្តី ត្រូវធ្វើយ៉ាងណា ដោះ​ស្រាយបញ្ហា មន្រ្តីខិលខូច ដែលជាដង្កូវចេញពីសាច់ និងស្ថិតក្រោមការគ្រប់គ្រង នៃអំណាចរដ្ឋាភិបាល នាពេល​បច្ចុប្បន្ន​នេះ «ចោល» ដើម្បីកំចាច់ នូវការគិតប្រយោជបុគ្គល បក្សពួកនិយម និងងាកមកគិត ពីប្រយោជន៍ជាតិ សង្គម ប្រជាពលរដ្ឋ និងប្រយោជន៍សាធារណៈវិញ។

មេដឹកនាំអង្គការសង្គមស៊ីវិល បានបង្ហាញការអង្កេតរបស់ខ្លួន យ៉ាងដូច្នេះថា៖ «មន្រ្តីខិលខូច និងឧកញ៉ាមួយចំនួន ត្រូវ​បាន​មើលឃើញថា ជាអ្នកធំក្រោមការដឹកនាំរបស់រដ្ឋាភិបាល។ ហើយក្រុមនេះ បាននឹងកំពុងធ្វើអាជីវកម្ម ដោយប្រើ​ប្រាស់​មុខងារ តួនាទី ដើម្បីលាភសក្ការៈផ្ទាល់ខ្លួន ដែលជាបុព្វហេតុ នៃការប្រព្រឹត្តិអំពើពុករលួយ រំលោភសិទ្ធិមនុស្ស និង​អយុត្តិធម៌​សង្គម ស្ទើពាសពេញប្រទេស។ អំពើទាំងនេះ បានបង្កើតឲ្យមាននូវការឈឺចាប់ ដល់ប្រជាពលរដ្ឋ និងប៉ះពាល់​កិត្តិយសជាតិ មន្រ្តី និងឧកញ៉ាស្អាតស្អំមួយចំនួន រួមទាំងតម្លៃ របស់អាជ្ញាធរសាធារណៈទាំងមូល។»

នៅមិនទាន់ មានការឆ្លើយតប ពីរដ្ឋាភិបាល ឬពីខុទ្ទកាល័យនាយករដ្ឋមន្ត្រី មកវិញនៅឡើយ រហូតមកទល់ពេលនេះ។

ទស្សនាវដ្តីមនោរម្យ.អាំងហ្វូ សូមដាក់ជូននូវខ្លឹមសារ នៃលិខិតចំហររបស់លោក ប៉ាង ងួនទៀង ជូនមិត្តអ្នកអាន​ទាំង​ស្រុង​ដូច​ខាង​ក្រោម៖