ជនសង្ស័យឈ្មោះ ថោង សារ៉ាត់ ក្នុងសម្លៀកបំពាក់ពណ៌ទឹកក្រូច បានបន្តរដំណើររបស់ខ្លួន ដោយមិនខ្វល់នឹង​ការចោទ​សួរ ពីអ្នកសារព័ត៌មានណាម្នាក់ ដូចឪពុកម្តាយ របស់លោកឡើយ។ លោកក៏ត្រូវបានសមត្ថកិច្ច នាំបញ្ចូលក្នុងឡាន ស្លាក​លេខ «ន.ប» ដែលឈប់រង់ចាំ ក្បែរជណ្តើរតុលាការស្រាប់ និងបញ្ជូនទៅឃុំខ្លួន បន្តទៀត នៅពន្ធនាគារ​ព្រៃស​វិញ​ភ្លាម។

ដោយឡែកមេធាវី ការពារក្ដីរបស់លោក ថោង សារ៉ាត់ ដែលមានវត្តមានក្នុងការសាកសួរនោះ ក៏បានព្យាយាមគេចចេញ ពីអ្នកសារព័ត៌មាន និងមិនបានធ្វើអត្ថាធិប្បាយ នៃការសួរដេញដោល របស់តុលាការឡើយ ហើយក៏មិនបានបញ្ជាក់ ពី​ការ​ចោទប្រកាន់ថា យ៉ាងណានោះដែរ។ តែមេធាវីម្នាក់ បានត្រឹមនិយាយថា តុលាការសាកសួរព័ត៌មានបន្ថែម លើ​ព័ត៌មាន​ចាស់ ដែលនៅសេសសល់ប៉ុណ្ណោះ។ សូមបញ្ជាក់ថា មេធាវីការពារលោក ថោង សារ៉ាត់ មានប្រាំរូប រួមមាន លោក គា អ៊ាវ, លោក ឈុន វីនីតា, លោក ស៊ី សត្យា, លោក លឹម វណ្ណា ដែលមានវត្តមាន ក្នុងការសាកសួរ នាថ្ងៃទី២៣ ខែ​មេសា ម្សិលម៉ិញនេះ រីឯមេធាវី អ៊ុំ ប៊ុនធឿន បានអវត្តមាន។

តែក្នុងកិច្ចសម្ភាស ជាមួយទស្សនាវដ្តីមនោរម្យ.អាំងហ្វូ ក្នុងព្រឹកថ្ងៃទី២៤ ខេមេសា នេះ លោក មេធាវី គា អ៊ាវ បានបញ្ជាក់​ប្រាប់ថា លោក ថោង សារ៉ាត់ នៅចំពោះមុខតុលាការ នៅតែបង្ហាញ ពីគោលជំហររបស់ខ្លួន និងបដិសេធ នូវការ​ចោទ​ប្រកាន់របស់តុលការ ដូចពេលមុនៗដដែល។ ប៉ុន្តែចំពោះនីតិវិធីរបស់តុលាការ យ៉ាងណានោះ លោកសុំមិនបញ្ជាក់​ជូន​ឡើយ ដោយលោកសំអាងហេតុថា សំណុំរឿងកុំពុងស្ថិតក្នុងការអង្កេត និងនីតិធីធ្វើការ របស់តុលាការ។ យ៉ាងណា លោក​គ្រាន់តែបង្ហើបឲ្យដឹងថា ការសាកសួរថ្ងៃម្សិលម៉ិញនេះ គ្រាន់តែបន្ថែមលើការសាកសួរ កាលពីថ្ងៃទី១៧ ខែមេសា ដែល​ជា​ការ​សាកសួរ​លើកទីមួយ។

លោកមេធាវី គា អ៊ាវ បានបន្ថែមទៀតថា៖ «ធម្មតារឿងវាធំ ការសារសួរ វាមិនទាន់អស់ទេ។ តុលាការយល់ថា ត្រូវតែ​បំពេញ​តាមតួនាទីខ្លួន ត្រូវតែអង្កេត និងសួរឲ្យអស់នូវចំងល់ទាំងឡាយ ដែលឆ្ងល់ និងសួរបន្ថែមអ្វី ដែលនៅចន្លោះ​ប្រហោង។»

យ៉ាងណា លោកមេធាវី បានបញ្ជាក់ថា ពេលកន្លងមក ជាគំនិតរបស់លោក ចង់ស្នើឲ្យតុលាការ បញ្ជូនអង្គរក្សទាំងបួន​របស់លោក ថោង សារ៉ាត់ មកឆ្លើយតទល់ នៅចំពោះមុខគ្នា ជាមួយនឹងកូនក្តីរបស់លោក ថោង សារ៉ាត់។ លោកបាន​បន្តថា តែនេះ គ្រាន់តែជាគំនិត កាលពីពេលមុនប៉ុណ្ណោះ។ សម្រាប់បច្ចុប្បន្ន និងទៅអនាគត លោកនៅមិនទាន់​មាន​ការ​រៀបចំ​ឯកសារ ឬនីតិវិធីយ៉ាងណាឡើយ តែលោកនឹងគិតពិភាក្សា ជាមួយសហភាពមេធាវីដទៃទៀត នាពេលក្រោយ ថា​នឹង​ត្រូវ​បន្ត តាមនីតិវិធីណា?

ចំណែកមេធាវីបីរូបផ្សេងទៀត និងលោកចៅក្រមស៊ើបសួរ ដែលកាន់សំណុំរឿងនេះ លោក លី សុខលេង ទស្សនាវដ្តី​មនោរម្យ.អាំងហ្វូ មិនអាចសុំការបញ្ជាក់បន្ថែម បានឡើយ ដោយគ្មានអ្នកទទួលទូរស័ព្ទ និងការសុំមិនធ្វើអត្ថាធិប្បាយ ព្រោះសំអាងថា ស្ថិតនៅក្នុងនីវិវិធីស៊ើបអង្កេត។

សូមរំលឹកថា ព្រោះតែករណីរឿងឃាតកម្មនេះ អតីតប្រធានសាលាដំបូងរាជធានីភ្នំពេញ លោក អាំង មាលតី ត្រូវបាន​ដកហូតដំណែង បន្ទាប់ពីចៅក្រមស៊ើបអង្កេមួយរូប បានធ្វើការដោះលែង ឪពុកម្ដាយ លោក ថោង សារ៉ាត់ ឲ្យនៅ​ក្រៅ​ឃុំ​បណ្តោះអាសន្ន ក្នុងរឿងព្រហ្មទណ្ឌនោះ។ ការដោះលែងនេះ ត្រូវបានលោកនាយករដ្ឋមន្រ្តី ហ៊ុន សែន ប្រតិកម្ម និងមិន​សុខ​ចិត្ត ព្រមទាំងបានបញ្ជា ឲ្យអាជ្ញាធរពាក់ព័ន្ធ តាមចាប់ខ្លួនមកឃុំបន្តវិញ៕

សូមទស្សនាវីដេងូខាងក្រោម៖