ភ្លុកដំរីដែលមានចំនួន ៧៣៩ ត្រូវបានរឹបអូស ដោយអាជ្ញាធរថៃ កាលពីថ្ងៃសៅរ៍ ខណៈពេលដែលភ្លុកដំរីទាំងនេះ មក​ដល់កំពង់ផែ នៃរាជធានីបាងកក ហើយត្រៀមបំរុង ឆ្លងកាត់ទៅប្រទេសឡាវ។ អាជ្ញាធរគយរបស់ប្រទេសថៃ បាន​បញ្ជាក់​ថា នេះជាការរឹបអូស ភ្លុកដំរី ដែលមានចំនួនច្រើន ជាងពេលណាទាំងអស់ នៅក្នុងប្រវត្តិសាស្ត្រ។

នាវាដែលដឹកភ្លុកដំរីទាំងនោះ បានចេញពីប្រទេសកុងហ្គោ កាលពីខែកុម្ភះ ហើយបានឆ្លងកាត់ប្រទេសម៉ាឡេស៊ី មុននឹង​មកដល់ប្រទេសថៃ។

ថៃជាទិសដៅមួយ ក្នុងចំណោមទិសដៅ ដ៏សំខាន់ផ្សេងទៀត នៃការរត់ពន្ធភ្លុកដំវី ឬផលិតផលស្នែងមានតម្លៃ ពីទ្វីប​អាហ្វ្រិក ទៅកាន់ទ្វីបអាស៊ី។ ប្រទេសនេះ អាចនឹងរងការដាក់ទណ្ឌកម្ម ប្រសិនបើមិនបាន បង្ហាញឲ្យឃើញ ពីការខិតខំ​ប្រឹងប្រែង ឬការរីចម្រើនទៅមុខ ក្នុងការប្រឆាំងការជួញដូរ ផលិតផលស្នែង ឬភ្លុកដូច្នេះទេ។

ភ្លុកដំវី ដ៏សន្ធឹកសន្ទាប់ ទាំងជាង៤តោន ដែលមានតម្លៃស្មើនឹង ៦លានដុល្លា ទំនងជានឹងត្រូវបែងចែក ទៅឲ្យបណ្ដាញ​ជួញដូរ ផលិតផល​ស្នែង នៅក្នុងប្រទេសចិន វៀតណាម ឬប្រទេសជុំវិញ ផ្សេងទៀត ប្រសិនបើវាត្រូវបាននាំចូល ទៅ​ដល់​ប្រទេស​ឡាវ។

កម្ពុជា ធ្លាប់ចាប់បានភ្លុក ជាង៣តោន

កាលពីដើមខែឧសភា ឆ្នាំកន្លងទៅ ប្រទេសកម្ពុជា ក៏ចាប់បានភ្លុកដំវី ប្រមាណជាង ៣តោន លាក់ក្នុង កុងទឺន័រ ផ្ទុក​សណ្ដែក។ អាជ្ញាធរ​គយកម្ពុជា នាកំពង់ផែក្រុងព្រះសីហនុ ដែលបានឆែករកឃើញ ភ្លុកដំរីទាំងនេះ បានថ្លែងឲ្យដឹងថា ភ្លុកដំរីទាំង​នោះ មានប្រភពដើម មកពីប្រទេសកេនយ៉ា ទ្វីបអាហ្វ្រិក ហើយបានឆ្លងកាត់ប្រទេសម៉ាឡេស៊ី ចូលមកកម្ពុជា ឆ្ពោះទៅ​ទីផ្សារ នៅបណ្តាប្រទេសផ្សេងទៀត នៅទ្វីបអាស៊ី។

សូមបញ្ជាក់ដែរថា ព្រានប្រមាញ់ បានសម្លាប់ដំរីរាប់សិបក្បាល នៅក្នុងទ្វីបអាហ្វ្រិក ក្នុងរយៈពេល ប៉ុន្មានឆ្នាំចុង​ក្រោយ​នេះ ដើម្បីបំពេញតម្រូវការ ទីផ្សារងងឹក នៅក្នុងប្រទេសនានា ក្នុងទ្វីបអាស៊ី។ កាលពីពេលថ្មីៗនេះ ប្រទេសចិន​បានបង្ខំ​ចិត្ត បិទទ្វាប្រទេស ហាមការនាំចូល នូវផលិតផលភ្លុក សម្រាប់រយៈពេល១ឆ្នាំ បន្ទាប់ពីបានរង នូវការរិះគន់យ៉ាងខ្លាំងក្លា ពីសំណាក់សហគមន៍អន្តរជាតិ៕