គេរកគិតមិនយល់ថា ហេតុអ្វីក៏យន្ដហោះ ប៊ូអីង (Boeing 777) មួយទាំងមូល ដែលមានបណ្ដោយដល់ទៅ ជិត១០០ម៉ែត្រ (ប្រវែងពិត ពី៦៣ ទៅ៧៤ម៉ែត្រ) របស់ក្រុមហ៊ុនអាកាសចរណ៍ ម៉ាឡេស៊ីអ៊ែរឡាញ ត្រូវបានបាត់ខ្លួនទៅ ដោយមិនបាន​ទុក ស្លាកស្នាមអ្វីសោះអញ្ចឹង? នេះហើយជាចំងល់ របស់បណ្ដាលអ្នកស្រាវជ្រាវ ខាងសុវត្ថិភាពអាកាសចរណ៍ នានា​ក្នុង​ពិភពលោក ហើយខិតខំធ្វើយ៉ាងណា ដើម្បីរកឲ្យបាននូវដំណោះស្រាយដ៏ប្រសើរមួយ។

ក្រុមហ៊ុន ស៊ីតា (Sita) ដែលជំនាញខាងការផ្គត់ផ្គង់ និងបំពាក់ ផ្នែកបច្ចេកវិទ្យា បានចេញផ្សាយនៅសប្ដាហ៍មុន ពីប្រព័ន្ធ​ចាប់រលក របស់យន្ដហោះ មួយប្រភេទ ដែលអាចតាមដាមយន្ដហោះ នៅរៀងរាល់១៥នាទីម្ដង។ ប្រព័ន្ធនេះ មាន​ឈ្មោះ​ហៅ​ថា៖ AIRCOM® FlightTracker។

តាមពិតទៅ ប្រព័ន្ធនេះ មិនមានអ្វីត្រូវមកបំពាក់បន្ថែម ឲ្យតួយន្ដហោះ នោះទេ ព្រោះវាបានប្រើប្រាស់ សម្ភារៈ​ដែល​មាន​រួច​ជាស្រេច នៅក្នុងយន្ដហោះ។ ប៉ុន្តែផ្ទុយទៅវិញ ប្រព័ន្ធ AIRCOM® FlightTracker នឹងជួយបន្ថែមគុណភាព ខាង​ការ​បញ្ជូន និងទទួលទិន្នន័យដ៏ច្រើន ទាក់ទងជាមួយមណ្ឌលផ្ទុក (serveurs) ACARS។ គឺសញ្ញាជាទិន្នន័យទាំងនេះហើយ ដែល​បាន​ខ្វះ នៅ​ក្នុងការស្រាវជ្រាវ តាមរកយន្ដហោះបាត់ខ្លួន MH370។

រហូតមកដល់ពេលនេះ ក្រុមហ៊ុនអាកាសចរណ៍ចំនួនពីរ ដំបូងគេ គឺ ម៉ាឡេស៊ីអ៊ែរឡាញ និងសាំងហ្គាពួរអ៊ែរឡាញ បាន​ទិញបច្ចេកវិទ្យានេះ ពីក្រុមហ៊ុន ស៊ីតា។ ប៉ុន្តែក្រុមហ៊ុនជំនាញមួយនេះ នៅមិនទាន់បញ្ចប់ត្រឹមនេះទេ តែចង់បង្កើឲ្យ​ប្រព័ន្ធ​ចាប់​ស្រមោលយន្ដហោះមួយទៀត ដែលស្ថិតនៅជាឯករាជ្យ ពីក្រុមហ៊ុនម្ចាស់យន្ដហោះ និងមិនមានបំពាក់ នៅក្នុង​យន្ដហោះ។ ដំណោះស្រាយនេះ នៅស្ថិតជាគម្រោងនៅឡើយ ដោយក្រុមហ៊ុន ស៊ីតា កំពុងជជែកជាមួយ អង្គការ​អាកាស​ចរណ៍​ស៊ីវិល​អន្តរជាតិ (OACI) អំពីចំណុចមួយចំនួន ទាក់ទងនឹងការប្រកាសអាសន្ន នៅពេលយន្ដហោះ ជួប​បញ្ហា​មិន​ស្រួល៕