កញ្ញា អេមីលី រ៉ៃយ៍ (Emily Reay) ជាតិអង់គ្លេស អាយុ ១៧ឆ្នាំ ទើបនឹងត្រូវបាន សាលារបស់នាងបង្ក្រាប យ៉ាងចាស់ដៃ ពីករណី«ពណ៌សក់»របស់នាង។ មូលហេតុសំខាន់ បណ្ដាលមកពីសក់ក្បាល ដែលមានពណ៌ក្រហមឆេះ របស់នាង ត្រូវ​បានគណៈគ្រប់គ្រងសាលា Trinity School  នៃក្រុង Carlisle (ភាគកណ្ដាល នៃចក្រភពអង់គ្លេស) វិន្និច្ឆ័យថា មាន​សភាព ដូចសក់ក្បាលជនជាតិរ៉ូស្សី ជ្រុលពេក។ ប្រសិនជា អេមីលី ចង់បន្ដការសិក្សាទៅទៀត នាងចាំបាច់ត្រូវធ្វើតាម ការ​បង្គាប់​របស់​សាលា ហើយនាងគ្មានជម្រើសអ្វីឡើយ។

នាងបានរអ៊ូរទាំ ដាក់សារព័ត៌មាន «Metro» របស់អង់គ្លេសថា៖ «ខ្ញុំធ្វើពណ៌សក់បែបនេះ តាំងពី៣ឆ្នាំមកហើយ (...) តែ​គ្មាននរណានិយាយអ្វីសោះ។ សម្រាប់ខ្ញុំ ពណ៌សក់ដូច្នេះ ជាការបង្ហាញ នូវភាពទុកចិត្តដល់ខ្លួនឯង។» ប៉ុន្តែនៅពេល​ដែល​នាងបានត្រឡប់ ពីវិស្សមកាលនៃបុណ្យប៉ាក (បុណ្យរបស់សាសនាគ្រឹស្ទ៍) វិញ ស្រាប់តែលោកគ្រូអ្នកគ្រូ ក្នុង​សាលា​បានប្រាប់ ពីដំណឹងដ៏អាក្រក់នេះ ដល់នាង។ ពួកគេបានចាត់ទុកថា ពណ៌សក់ក្បាលរបស់នាង មានសភាព«ខុសទំនង» និងបង្គាប់ឲ្យធ្វើការផ្លាស់ប្ដូរ នៅក្នុងរយៈពេលមួយសប្ដាហ៍។

កញ្ញា អេមីលី បានថ្លែងទាំងមួរម៉ៅទៀតថា៖ «នៅពេលពួកគេនិយាយប្រាប់ខ្ញុំ ពីរឿងនេះ ខ្ញុំស្រក់ទឹកភ្នែក ដោយ​មិនដឹង​ខ្លួន។ ខ្ញុំខឹងក្នុងចិត្តខ្លាំងណាស់។»

យ៉ាងណាក៏ដោយ នាងត្រូវធ្វើតាមសាលា ព្រោះនាងមិនចង់ខកខាន ការប្រលងនៅចុងឆ្នាំ ដែលនឹងមកដល់ ក្នុង​ប៉ុន្មាន​ខែ​នេះ​ឡើយ។ តែនាងបានឆ្លៀតតថ្លៃ ទៅកាន់សាលាថា នាងអាចយកកន្សែង គ្រប់ខ្ចប់ពីលើសក់ ដើម្បីបិទ​បាំងកុំឲ្យ​ឃើញ។ តែការតវ៉ានេះ ឥតប្រយោជន៍ទេ ព្រោះគណៈកម្មការវិន័យ របស់សាលាមួយនេះ មានសភាពរឹងដូចថ្ម ហើយ​នាង​បានសម្រេចប្ដូរពណ៌សក់របស់ខ្លួន នៅទីបញ្ចប់។

នាងបាននិយាយលេងក្អាកក្អាយថា៖ «អ្វីដែលគួរឲ្យអស្ចារ្យនោះ គឺសក់​ក្បាល​របស់ខ្ញុំនេះ មានសភាពរលោងល្អណាស់ នៅក្នុងរាត្រីកំសាន្ដមួយ ហើយខ្ញុំថែមទាំងទទួលបាន ពានរង្វាន់ស្ដីពីម៉ូដសក់ ដែលល្អជាងគេនោះទៀតផង»៕