កាលពីចុងឆ្នាំ២០១៤ ការដាក់ការចោទប្រកាន់ ទៅលើមូលដ្ឋានយោធាអាមេរិក ថាបានជាប់ពាក់ព័ន្ធ ទៅនឹងការបាត់ខ្លួន របស់យន្ដហោះ MH370 របស់ក្រុមហ៊ុន ម៉ាឡេស៊ីអ៊ែរឡាញ ដែលបានបាត់ខ្លួន យ៉ាងអាថ៌កំបាំង កាលពីថ្ងៃទី៨ ខែមីនា ឆ្នាំ២០១៤នោះ ត្រូវបានលោក ម៉ាក ឌុយហ្គាំង (Marc Dugain) អតីត​នាយក​ក្រុមហ៊ុន​ អាកាសចរណ៍​បារាំង​មួយ​ ឈ្មោះ ប្រូស្ទ័រ (Proteus) យកមកសរសេរ នៅក្នុងសៀវភៅដ៏វែងអន្លាយមួយ។ លោកបានលើកយកសាក្សី ជាអ្នកភូមិមួយចំនួន និងភស្ដុតាងដ៏សំខាន់ គឺប្រដាប់ពន្លត់អគ្គិភ័យ របស់យន្ដហោះប៊ូអីង (Boeing 777) ដែលត្រូវបានរកឃើញ មកទើរ​នៅ​លើ​ឆ្នេរ របស់កោះមួយ នៃប្រជុំកោះម៉ាឌីវ កណ្ដាលមហាសមុទ្រ និងនៅខាងត្បូងប្រទេសឥណ្ឌា។

ប៉ុន្តែការរកឃើញរបស់លោក មិនសូវជាមាននរណាម្នាក់ វាយតម្លៃថាជាការពិតនោះទេ​ ដោយសារមតិមួយចំនួន បាន​ចាត់​ទុក​ថា​ ការលើកឡើងរបស់លោក ឌុយហ្គាំង មានលក្ខណៈពាណិជ្ជកម្ម ចង់ឲ្យសៀវភៅរបស់គាត់លក់ដាច់។ សូម​អាន​អត្ថបទ​នេះ​ឡើង​វិញ ដោយចុចនៅលើនេះ។

រហូតមកដល់ថ្ងៃសៅរ៍ទី ៤ ខែមេសានេះ សារព័ត៌មាន «The Australian» របស់ប្រទេសអូស្ត្រាលី បានត្រឡប់មក​បញ្ជាក់​ឡើងវិញ ពី​ការសង្ស័យនេះ ហើយបានវាយតម្លៃថា ជាការអះអាងមួយ ដែលអាចយកជាការបាន។ ក្រុមអ្នកភូមិ ដែល​រស់​នៅ​​លើ​កោះ គូដាហូវ៉ាដូ (Kudahuvadhoo មើលផៃនទីខាងក្រោម) នៃប្រជុំកោះម៉ាឌីវ បានបញ្ជាក់​ប្រាប់​សារព័ត៌មាន​មួយនេះ ដែលបានចុះទៅ​អង្កេត​ផ្ទាល់ ថាពួកគេបានឃើញ យន្ដហោះមួយ ដែលហោះនៅកំពស់ដ៏ទាប នាព្រឹក​ព្រលឹម​ថ្ងៃ ដែល​​យន្ដហោះ​​បាន​​បាត់​ខ្លួន។ ពួកគេបានបញ្ជាក់ច្បាស់ៗថា ថ្ងៃនោះ គឺថ្ងៃទី៨ ខែមីនា ឆ្នាំ២០១៤។

ក្រុមអ្នកភូមិ ដែលអះអាងថា ពួកគេមិនដែលស្គាល់យន្ដហោះ របស់ក្រុមហ៊ុនម៉ាឡេស៊ីនោះ បាននិយាយថា បានឃើញ​ស្លាកសញ្ញា ក្រហម ខៀវ នៃក្រុមហ៊ុន ម៉ាឡេស៊ីអ៊ែរឡាញ ដោយហេតុមកពីយន្ដហោះ បានហោះនៅទាប រហូតពួកគេ​មើលឃើញ​នឹង​ភ្នែក​បាន។ អ្នកភូមិមួយចំនួនទៀត ថែមទាំងបានបញ្ជាក់ថា ពួកគេបានឮស្នូរ សម្លេងផ្ទុះដ៏ខ្លាំងមួយ ចេញ​ពី​កណ្ដាល​សមុទ្រនោះផង។

សូមបញ្ជាក់ថា ក្រុមអ្នកស៊ើបអង្កេត រុករកយន្ដហោះ មិនដែលបានកំណត់ មុខព្រួញរុករករបស់ពួកគេ ឆ្ពោះមកប្រជុំកោះ ម៉ាឌីវ នេះឡើយ។​ តែផ្ទុយទៅវិញ ពួកគេបែរជានាំគ្នារុករុក នៅតំបន់លំហខាងត្បូង នៃមហាសមុទ្រឥណ្ឌា ខាងលិច​ក្បែរ​នឹង​កោះអូស្ត្រាលីទៅវិញ។ កន្លែងរុករក របស់ក្រុមអ្នកស៊ើបអង្កេត ចម្រុះជាតិសាសន៍នោះ មានចំងាយប្រមាណជា ៥០០០​គីឡូម៉ែត្រ ពីកោះ គូដាហូវ៉ាដូ ហើយមិនបាននាំមក នូវលទ្ធផលអ្វី គួរឲ្យមានសង្ឃឹមនោះទេ។

រីឯបរិមាណ នៃប្រេងឥន្ទនៈ ដែលមាននៅលើយន្ដហោះវិញ ត្រូវបានគេគណនាឃើញថា យន្ដហោះអាចហោះ ពី​ប្រទេស​ម៉ាឡេស៊ី ទៅហួសប្រជុំកោះ ម៉ាឌីវ នោះបាន។

កាលពីខែមីនាកន្លងទៅ អាជ្ញាធរនៃកោះ ម៉ាឌីវ បានចេញ​មក​អះអាង​ថា គ្មានយន្ដហោះណាមួយ បានហោះកាត់ ពីលើ​លំហអាកាសរបស់ខ្លួន ក្នុងថ្ងៃដែលយន្ដហោះ MH370 បាន​បាត់​ខ្លួន​នោះ​ទេ។ ប៉ុន្តែសម្រាប់ក្រុមអ្នកភូមិ បានបរិហារ​ការ​អះអាងនេះថា ជាវិធីសាស្ត្រមួយ ក្នុងការបិទបាំង ពី​សមត្ថភាព​របស់អាជ្ញាធរ ក្នុងការចាប់ប្រព័ន្ធហោះហើរ នៅលើលំហ​អាកាស​របស់ខ្លួន ដែលអាជ្ញាធរធ្វើមិនបាន។ អ្នកភូមិថែមទាំងបាន សុំ​ឲ្យ​ក្រុម​អ្នក​ស៊ើប​អង្កេត ធ្វើដំណើរមកជួបពួកខ្លួន ដើម្បីអាចដឹងពីហេតុការណ៍នេះ កាន់តែច្បាស់ និងគាស់សំនុំរឿង ដែល​គេចង់បំភ្លេចនេះឡើងវិញ នោះទៀត៕