កន្លងមកបុគ្គលិក និងមន្ត្រីពន្ធដារ នៅខ័ណ្ឌចំការមន ធ្លាប់បានរកកិច្ចអន្តរាគមន៍ ពីអគ្គនាយក នៃអគ្គនាយកដ្ឋាន​ពន្ធដារ​ម្តងរួចមកហើយដើម្បី ចាត់វិធានការ ពាក់ព័ន្ធនឹងការធ្វើទុក្ខបុកម្នេញ របស់ប្រធានសាខាពន្ធដារ ខ័ណ្ឌចំការមន លោក ទី សុខុន មកលើមន្ត្រីទាំងនោះ។ ស្រាប់តែនាពេលថ្មីៗនេះ មានវីដេអូក្លីបមួយ បានចែកចាយតៗគ្នា នៅក្នុង​បណ្តាញសង្គមហ្វេសប៊ុក ដែលបានធ្វើការរិះគន់ និងបន្ទោសបង្អាប់យ៉ាងធ្ងន់ធ្ងរ ទៅលើលោក ទី សុខុន ដែល​បាន​ចោទ​លោកថា បានធ្វើទង្វើមិនគប្បី មកលើមន្ត្រីពន្ធដារថ្នាក់ក្រោម។

វីដេអូដែលមានសំលេងស្ត្រីម្នាក់ ជាមន្ត្រីនៅក្នុងការិល័យពន្ធដារ ខ័ណ្ឌចំការមនបានរៀបរាប់ អំពីសេចក្តីធុញថប់ លើ​ការងាររបស់ខ្លួន ដែលទទួលរងការគាបសង្កត់ ពីលោក ទី សុខុន។ សំឡេងស្ត្រីរូបនេះ បានបន្លឺនៅក្នុងក្លីបវីដេអូថា ខ្លួន​ត្រូវបានគេដេញចេញ ពីកន្លែងធ្វើការ ហើយថែមទាំងបាននិយាយថា ខ្លួនស្អប់ខ្ពើមនឹងការងារនៅទីនោះណាស់ ព្រោះ​ទីនោះ មានលោក ទី សុខុន ធ្វើជាប្រធាន។ ស្ត្រីរូបនេះ ថែមទាំងបានថ្លែងទៀតថា លោក ទី សុខុន ជាមេពុក​រលួយ​ទៀត​ផង ហើយអ្នកស្រីបានស្នើរ ឲ្យអង្គភាពប្រឆាំងអំពើពុករលួយ ចុះធ្វើការពិនិត្យ ចំពោះករណីនេះ។

ស្ត្រីដដែលនោះ បានបន្ថែមថា លោក ទី សុខុន តែងតែធ្វើការជិះជាន់មន្ត្រីថ្នាក់ក្រោម និងធ្វើការរាយការណ៍​ខុសពីការ​ពិត អំពីកំហុសរបស់មន្ត្រីនៅទីនោះ។ មិនតែប៉ុណ្ណោះ លោកថែមទាំងធ្លាប់បានកឹបកេង យកលុយរង្វាន់របស់​មន្ត្រីថ្នាក់​ក្រោម និងបានសូកប៉ាន់ ទៅថ្នាក់លើ ដើម្បីបិទបាំងទោសកំហុសរបស់ខ្លួន។

នៅចុងបញ្ចប់ នៃវីដេអូ ស្ត្រីខាងលើនេះបានបង្ហាញឈ្មោះរបស់ខ្លួនថា ខ្លួនឈ្មោះ សូត្រ ច័ន្ទភីណារ៉េត។ អ្នកស្រី​និយាយ​ថា អ្នកស្រីធ្លាប់ត្រូវបានលោក ទី សុខុន ទាមទារថវិការពីខ្លួន ប៉ុន្តែអ្នកស្រីគ្មានថវិការឲ្យ បែជាត្រូវគេដកបញ្ឈរជើង មិន​ឲ្យ​ធ្វើការងារ។ អ្នកស្រីថា អ្នកស្រីបានកំពុងរងចាំ ដំណោះស្រាយយូរមកហើយ ប៉ុន្តែមិនមានដំណឹង។ អ្នកស្រីធ្លាប់​បាន​សួរ ទៅបុគ្គលិកផ្សេងទៀត អំពីដំណើរការដោះស្រាយ ប៉ុន្តែនៅតែគ្មានដំណឹង។ រហូតមកដល់ពេលនេះ អ្នកស្រីកំពុង​រង់ចាំ​ផ្ទេរការងាររបស់អ្នកស្រី ទៅឲ្យអ្នកថ្មី ដែលមកជំនួសកន្លែងនោះវិញ ព្រោះអ្នកស្រីមិនអាចទ្រាំ នៅធ្វើការងារ​នៅ​ទីនោះ បានតទៅទៀត។

អ្នកស្រីបានបញ្ជាក់ថា បើសិនជាអ្នកស្រី និងក្រុមគ្រួសារមានបញ្ហាអ្វីមួយនោះ គឺជាស្នារដៃរបស់លោក ទី សុខុន ម្នាក់​គត់ ព្រោះអ្នកស្រីមិនធ្លាប់មានជំលោះ ជាមួយអ្នកណាម្នាក់ឡើយ ហើយអ្នកស្រីក៍មិនធ្លាប់មានទំនាស់ ជាមួយលោក ទី សុខុន នោះដែរ ប៉ុន្តែលោក ទី សុខុន នោះវិញទេ ដែលធ្លាប់បានរករឿងអ្នកស្រី។

គួរបញ្ជាក់ថា កាលពីពេលថ្មីនេះ មានមន្ត្រីពន្ធដាជាច្រើននាក់ ដែលអះអាងថា ខ្លួនបានរងការគាបសង្កត់ ពីលោក ទី សុខុន បានដាក់លិខិស្នើរសុំទៅអគ្គនាយក នៃអង្គនាយកដ្ឋានពន្ធដារ ដើម្បីស្នើឲ្យមានការចាត់វិធានការ ជាបន្ទាន់លើ​លោក ទី សុខុន។ មិនអាចទាក់ទង លោក ទី សុខុន ប្រធានសាខាពន្ធដារ ខ័ណ្ឌចំការមន ដើម្បីបកស្រាយ ទៅលើ​ការ​ចោទប្រកាន់ខាងលើបានទេ នៅពេលនេះ៕

» សូមទស្សនាវីដេអូ របស់ស្ត្រីរូបនោះ ដូចខាងក្រោម៖