អ្នកគ្រូ នាង ផល្លា ជាបេក្ខភាពមួយរូប ក្នុងចំណោម ១០នាក់ចុងក្រោយ សម្រាប់ទទួលពានរង្វាន់ គ្រូឆ្នើមពិភពលោក Global Teacher Prize ដែលមានទឹកប្រាក់ ១ លានដុល្លារសហរដ្ឋអាមេរិក។ លទ្ធផលចុងក្រោយ នៃពានរង្វាន់គ្រូឆ្នើម ពិភពលោក នឹងត្រូវប្រកាសនៅទីក្រុងឌូបៃ នាថ្ងៃទី១៥ ខែមីនា ឆ្នាំ២០១៥ខាងមុខនេះ។

ក្នុងការបោះឆ្នោត តាមរយៈបណ្តាញអ៊ីនធើណេត អ្នកគ្រូបានវ៉ាដាច់បេក្ខជនឆ្នើមដទៃទៀត។ អ្នកគ្រូទទួលបាន​សម្លេង​គាំទ្រ រហូតដល់ជាង៤២ពាន់នាក់ លើបេក្ខជនទាំង៩រូបទៀត ដូចជា លោក Azizullah Royesh មកពីប្រទេស អាហ្វហ្កា​នីស្ថាន លោកស្រី Kiran Bir Sethi មកពីប្រទេស ឥណ្ឌា លោក Guy Etienne មកពីប្រទេស ហៃទី លោកស្រី Jacqueline Jumbe Kahura មកពីប្រទេស កេនយ៉ា លោកស្រី Nancie Atwell មកពីសហរដ្ឋអាមេរិក លោក Richard Spencer មក​ពី​ចក្រភព អង់គ្លេស លោក Stephen Ritz មកពីសហរដ្ឋអាមេរិក លោកស្រី Naomi Volain មកពីសហរដ្ឋ​អាមេរិក និង លោក Madenjit Singh មកពីប្រទេស ម៉ាឡេស៊ី។

អ្នកគ្រូ នាង ផល្លា គឺជាគ្រូបង្រៀនទីមួយ សម្រាប់កុមារពិការភ្នែក នៅក្នុងប្រទេសកម្ពុជា ក្នុងឆ្នាំ១៩៩៣។ អ្នកគ្រូ គឺជា​នាយិការ និងជាគ្រូបង្រៀន កុមារពិការភ្នែក និងជាអ្នកសម្របសម្រួលកម្មវិធីអប់រំ កុមារពិការភ្នែកនៅកម្ពុជា។ អ្នកគ្រូ នាង ផល្លា ជាបេក្ខនារីមួយរូប ដែលត្រូវបានចំរាញ់ ចេញពីបេក្ខជន ជាគ្រូបង្រៀនឆ្នើម សរុប៥០០០នាក់ មកពី១២៧​ប្រទេស ដែលការប្រកួតប្រជែង ពានរង្វាន់គ្រូឆ្នើមពិភពលោក Global Teacher Prize។ ការប្រកួតប្រជែងនេះ បានចាប់​ផ្តើមជ្រើសរើស តំាងពីខែកក្កដា ២០១៤មកម្ល៉េះ៕