ក្នុងវីដេអូដែលមានរយៈពេលជាង១០នាទី ដាក់បង្ហោះកាលពីថ្ងៃអង្គារ គេឃើញបុរសម្នាក់ ដែលគេស្គាល់ថា ជា Muhammad Said Ismail Musallam ជាតិអារ៉ាប់ពាក់កណ្ដាលអ៊ីស្ត្រាអែល ពាក់អាវពណ៌លឿង និងលិខិតឆ្លងដែន នៃប្រទេស​អ៊ីស្ត្រាអែល។ បុរសម្នាក់នេះ ត្រូវបានចោទប្រកាន់ ថាបានធ្វើ«ចារកម្ម» ឲ្យក្រុមមួយហៅថា Mossad។

បន្ទាប់មក កុមារដែលឈរនៅក្បែរនោះ បានបាញ់បុរសនេះ មួយគ្រាប់ចំកណ្ដាលក្បាល មុននឹងបន្ថែមជាច្រើនគ្រាប់ទៀត ពីលើសាកសព ដោយស្រែកឡើងថា «ព្រះអាឡាហ៍ ដ៏ខ្ពស់ខ្ពស់ជាងគេ (Allah Akbar)»។

នៅជិតកុមារនោះ ជាយុវជនម្នាក់ទៀត ដែលគេស្គាល់ថា មានជាតិបារាំង ជាបងថ្លៃរបស់ មហាមេដ ម៉េរាហ៍ (Mohamed Merah) ភេវរជនម្នាក់ទៀត ដែលបានបាញ់សម្លាប់ កុមារជាតិជ្វីហ្វជាច្រើននាក់ នៅក្រុងទូលូ ប្រទេសបារាំង។ នេះបើតាម​អ្នកការសែតបារាំង ជំនាញខាងការស្រាវជ្រាវ ពីភេវរកម្ម។ យុវជននេះឈ្មោះ សាប៊្រី អេស៊ីដ (Sabri Essid)  ហើយបាន​និយាយគម្រាម នៅក្នុងវីដេអូនោះ ថានឹងតាមវាយប្រហារ លើជនជាតិអ៊ីស្ត្រាអែល ឬជ្វីហ្វ ទាំងនៅក្នុងប្រទេសបារាំង និង​នៅកន្លែងផ្សេងទៀត។

យុវជននេះ បាននិយាយឡើង នៅក្នុងវីដេអូនេះថា៖ «អូ.. ពួកជាតិជ្វីហ្វទាំងឡាយ! ព្រះអាឡាហ៍ បានអនុញ្ញត ឲ្យសម្លាប់​ជនជាតិពួកឯង នៅក្នុងទឹកដីបារាំង និងនៅលើទឹកដី នៃរដ្ឋអ៊ីស្លាម។ ក្រុមយុវជន"តោ" របស់យើង នឹង​សម្លាប់​ជនទាំង​អស់​ណា ដែលក្រុម Mossad ដ៏ឆ្កួតលីលា បញ្ជូនឲ្យមកធ្វើចារកម្ម លើក្រុមកងស្ម័គ្រប្រយុទ្ធ និងបណ្ដាជន​ដែលកាន់​សាសនា​អ៊ីស្លាម។ (...) ការ​កាន់កាប់ទឹកដី នៃមហាកម្លាំងអ៊ីស្លាម ទើបតែចាប់ផ្ដើមប៉ុណ្ណោះ តែពួកជ្វីហ្វកំពុងញ័រខ្លួន ព្រោះ​ទិសដៅ​របស់យើង ជិត​បាន​សម្រេចហើយ។»

សូមបញ្ជាក់ដែរថា សាប៊្រី អេស៊ីដ បានបាត់ពីការឃ្លាំមើល របស់អាជ្ញាធរបារាំង តាំងពីមួយឆ្នាំកន្លងមកហើយ។ កាលពី​បី​ឆ្នាំមុន បន្ទាប់ពី មហាមេដ ម៉េរាហ៍ ត្រូវបានកងកម្លាំងរ៉េដ របស់បារាំងបាញ់សម្លាប់រួច គឺយុវជន សាប្រ៊ី អេស៊ីដ នេះហើយ ជាអ្នក​រៀបចំបុណ្យសព ឲ្យ មហាមេដ ម៉េរាហ៍ (ក្នុងអំឡុងចុងឆ្នាំ២០១២)៕

សូមអានអត្ថបទដែលទាក់ទងឡើងវិញ ពីមហាមេដ ម៉េរាហ៍ ដោយចុចនៅលើទីនេះ និងនៅទីនេះទៀត។

វីដេអូដកស្រង់ ពីការបាញ់សម្លាប់៖

វីដេអូពាក់ព័ន្ធដទៃទៀត៖