បង​ប្អូន​ស្រី​៣​នាក់ ជាប់​ឃុំ​ដោយ​​ម្ដាយ​​ខ្លួន​បង្កើត អស់១០ឆ្នាំ

នៅប្រទេសស៊ុយអែត នគរបាលបានជួយសង្គ្រោះ បងប្អូនស្រីបីនាក់ ដែលបានរស់នៅមិនតិចជាង១០ឆ្នាំ នៅក្រោមការឃុំឃាំង របស់ម្ដាយខ្លួនឯងបង្កើត។
Loading...
  • ដោយ: សេក មនោរកុមារ អត្ថបទ ៖ សេក មនោរកុមារ ([email protected]) - ភ្នំពេញ ថ្ងៃទី ២៨ កុម្ភៈ ២០១៥
  • កែប្រែចុងក្រោយ: February 28, 2015
  • ប្រធានបទ: ជាប់ឃុំ
  • អត្ថបទ: មានបញ្ហា?
  • មតិ-យោបល់

ជាសំនុំរឿង ដ៏រន្ធត់ចិត្តមួយ ដែលបានធ្វើឲ្យ ប្រទេសស៊ុយអែតទាំងមូលរញ្ជួល កាលពីសប្ដាហ៍មុន។ ប្រព័ន្ធ​ផ្សព្វផ្សាយ​នៅក្នុងប្រទេស បានធ្វើរបាយការណ៍ ពីករណីនេះ យ៉ាងសន្ធឹកសន្ធាប់៖ ស្ត្រីជាម្ដាយ បានបង្ខាំងកូនស្រីបីនាក់របស់ខ្លួន តាំងពីច្រើនឆ្នាំមកហើយ នៅក្នុងផ្ទះរបស់ខ្លួន ស្ថិតក្នុងក្រុងប្រូម៉ូឡា (Bromölla) ភាគខាងត្បូងនៃប្រទេស។

បន្ទាប់ពីកូនស្រីម្នាក់បានគេចខ្លួនរួច  នាងបានរត់ទៅប្រាប់អ្នកជិតខាង មុននឹងផ្ដល់ដំណឹងនេះ ឲ្យដល់​នគរបាល ដើម្បីធ្វើអន្តរាគមន៍ ជួយបងប្អូនរបស់ខ្លួនពីរនាក់ទៀត។ ក្នុងពេលធ្វើអន្តរាគមន៍នោះ កម្លាំង​នគរបាល​ស៊ុយអែត ក៏បានចាប់ឃាត់ខ្លួន ស្ត្រីជាម្ដាយ អាយុ៥៩ឆ្នាំ យកមកសួរចម្លើយដែរ។

នៅក្នុងសេចក្ដីប្រកាសព័ត៌មានមួយរបស់ខ្លួន អ្នកនាំពាក្យរបស់នគរបាល លោក អេវ៉ាហ្គន វ៉េសហ្វត (Ewa-Gun Westford) បានបញ្ជាក់ថា អ្នកម្ដាយរូបនោះ បានបិទសិទ្ធិកូនស្រីរបស់ខ្លួន នៅក្នុងរយៈពេលមួយដ៏វែង។

រីឯឪពុករបស់យុវតីទាំងបីរូប ដែលបានលែងលះពីប្រពន្ធខ្លួន តាំងពីឆ្នាំ១៩៩៨ បានស្វែងរកជួបកូនរបស់ខ្លួន តាំងពី​ច្រើនឆ្នាំ បើទោះជាសាលក្រមនៅពេលលែងលះ បានហាមឃាត់លោកក៏ដោយ។ លោកបានថ្លែងប្រាប់​ សារព័ត៌មាន​ប្រចាំថ្ងៃ Expressen ថា៖ «មុនដំបូង គេបាននិយាយប្រាប់ខ្ញុំថា ពួកនាងនៅក្រុង Åre ប៉ុន្តែបន្ទាប់មក មេធាវីរបស់អតីត​ប្រពន្ធខ្ញុំ បានបញ្ជាក់ថា ពួកនាងនាំគ្នាទៅរស់នៅអូស្ត្រាលីអស់ហើយ។ ខ្ញុំបានសរសេរសំបុត្រ ទៅស្ថានទូតស៊ុយអែត ប្រចាំនៅអូស្ត្រាលី ដើម្បីចង់បានដំណឹងពីពួកនាង តែខាងស្ថានទូត បានឆ្លើយមកវិញថា គេមិនបានដឹងពីករណី​នេះ​ទេ។»

បើតាមសារព័ត៌មានក្នុងស្រុក បានរាយការណ៍ថា គ្រួសារស្ត្រីទាំងបួននាក់ បានរើផ្លាស់មកនៅក្នុងផ្ទះមួយ នៅក្រុង ប្រូម៉ូឡា តាំងពីឆ្នាំ២០១២។ សារព័ត៌មានបានស្រង់សម្ដី របស់អ្នកជិតខាងមកនិយាយថា៖ «វាំងននផ្ទះរបស់ពួកនាង បិទជិតរហូត ហើយ​គ្មានសម្លេងអ្វីបន្តិច ត្រូវបានលឺចេញពីក្នុងផ្ទះទេ» អ្នកជិតខាងនោះ បាននិយាយទៀតថា មិនដែល​ឃើញនរណាម្នាក់ ចេញ​ពីផ្ទះនោះទេ លើកលែងតែមួយសប្ដាហ៍មុន  ដែលអ្នកជិតខាងនោះ បានឃើញក្មេងស្រីម្នាក់ នៅឈរនៅនឹងមាត់ទ្វា។

អ្នកជិតខាងម្នាក់ទៀត ដែលបានឃើញពេលនគរបាល ចូលទៅធ្វើអន្តរាគមន៍ បាននិយាយប្រាប់សារព័ត៌មានថា៖ «យុវតីម្នាក់ ដើរមិនរួចខ្លួនឯង ហើយត្រូវបាននគរបាលគ្រាហ៍ ឲ្យចេញមក»៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...