ពលរដ្ឋបានសម្ដែងការក្ដៅក្រហាយ ចំពោះក្រុមហ៊ុនអគ្គិសនីឯកជនចំនួនពីរ ទីមួយឈ្មោះ មូល ទិត្យ មួយ​ទៀត​ឈ្មោះ ទ្រី ឡេង ជាអ្នកគ្រប់គ្រង ធ្វើអាជីវកម្ម និងតបណ្តាញភ្លើង សម្រាប់ប្រើប្រាស់នៅឃុំឃុំព្រែក​តាទែន ស្រុកពញ្ញាឮ ខេត្តកណ្តាល។ អ្នកស្រី នូ ណាវី ជាអ្នកភូមិព្រែកក្តី ឃុំស្រុកខេត្តខាងលើ បានឲ្យដឹងថា ក្រុមហ៊ុនទាំងពីរយកតម្លៃភ្លើងពីពលរដ្ឋខុសគ្នា ធ្វើឲ្យអ្នកភូមិអ្នកស្រីទាំងអស់មិនសុខចិត្ត ហើយចង់ឲ្យមាន​ការបញ្ចុះតម្លៃ ជាពិសេសរាល់សេវាកម្មផ្សេងៗ កុំគិតថ្លែឈ្នួល។

លោក ឯម ឈឿន ដែលជាអ្នកភូមិនេះដែរ បានឲ្យដឹងថា ក្រុមហ៊ុន មូល ទិត្យ គិតថ្លៃ១០០០រៀល ក្នុងមួយ​គីឡូវ៉ាត់ម៉ោង ចំណែកឯក្រុមហ៊ុន ទ្រី ឡេង គិតថ្លៃ១០៥០រៀលក្នុងមួយគីឡូវ៉ាត់ម៉ោងដូចគ្នា។ មិនតែប៉ុណ្ណោះ អ្នកភូមិរូបនេះបានបញ្ជាក់ថា រាល់ការដាច់ខ្សែរ ឬបញ្ហាផ្សេងៗ នៅក្នុងការប្រើប្រាស់ ក្រុមហ៊ុនបាន​យកថ្លែ​ជួសជុល ពី៥០០០រៀល ទៅ២០០០០រៀលម្តង។ លោកថា លោកចង់ឲ្យក្រុមហ៊ុនទាំងពីរ យកតម្លែភ្លើង ទាប​ហើយស្មើរគ្នា ទោះជាអ្នកភូមិ តអំពែតូច ឬធំក្តី។

អ្នកភូមិម្នាក់ទៀត លោក ប៉ូ សារិទ្ធ បានឲ្យដឹងពីរកាតអំពែតូចធំនេះថា ក្រុមហ៊ុន មូល ទិត្យ តចរន្ដចាប់ពី ៥អំពែ​ទៅ ១០អំពែ គិតប្រាក់ពី១២ម៉ឺនរៀលទៅ ១៥ម៉ឺនរៀល។ ចំណែកឯក្រុមហ៊ុន ទ្រី ឡេង វិញ តចរន្ដអំពែ​ពី៥ទៅ១០អំពែ គិតក្នុងតម្លៃពី១៥ម៉ឺនរៀលទៅ ២៨ម៉ឺនរៀលទៅវិញ។ លោកបានសំនូមពរថា ចង់ឲ្យ​ក្រុមហ៊ុន​ទាំងពីរសហកាគ្នាយ៉ាងណា ដើម្បីកុំឲ្យមានការខុសគ្នាឆ្ងាយយ៉ាងនេះ ព្រោះពលរដ្ឋចង់មានភ្លើប្រើគ្រប់គ្នា។ តែនៅពេលដែល មានតម្លៃថ្លៃបែបនេះ ហាក់មិចង់ តបណ្តាញទៅវិញ។

ឆ្លើយតប ទៅនឹងការលើកឡើងទាំងប៉ុន្មាន របស់អ្នកភូមិខាងលើនេះ លោក មូល ទិត្យ ជាម្ចាស់ក្រុមហ៊ុន​អគ្គិសនីឯកជន«មូល ទិត្យ» បានប្រាប់ទស្សនាវដ្តីមនោរម្យ.អាំងហ្វូថា ក្រុមហ៊ុនរបស់លោក មានចេញ​អាជ្ញាប័ណ ពីអគ្គិសនីកម្ពុជាលេខ ១៧៦ ដែលអនុញ្ញាត ឲ្យមានសុពលភាពប្រើប្រាស់ ក្នុងរយៈពេល១២ឆ្នាំ។ លោកបានបដិសេធន៍ថា តាមគោលការណ៍ក្រុមហ៊ុនលោក ក្រុមបុគ្គលិកដែលចុះទៅធ្វើការជួសជុលអ្វីផ្សេងៗ មិនមានគិតលុយពីអ្នកប្រើប្រាស់នោះទេ។ មិនតែប៉ុណ្ណោះ លោកបានសម្រួលបន្ធូរ ដល់អ្នកភូមិដែល​មិន​មាន​ថវិកាបង់ភ្លើង រហូតដល់ថ្ងៃទី១៣ថ្ងៃ គឺជិតពាក់កណ្តាលខែ។

ចំពោះបញ្ហា ដែលអ្នកភូមិសុំឲ្យមានការចុះតម្លៃទាប ហើយស្មើគ្នាជាមួយនឹងក្រុមហ៊ុន ទ្រីឡេង នោះ លោក មូល ទិត្យ មិនបានបញ្ជាក់ឲ្យច្បាស់លាស់នោះទេ។ ដោយឡែក ទស្សនាវដ្ដីមិនអាចទាក់ទង ទៅតំណាង​ក្រុមហ៊ុនអគ្គិសនី ទ្រីឡេង បានទេ នៅថ្ងៃទី១៩ ខែកុម្ភៈនេះ ដោយទូរស័ព្ទ មនអាចទាក់ទងបាន៕