នាយទាហាន របស់ក្រុមហាម៉ាស មួយរូបត្រូវបានសម្លាប់ ដោយការវាយប្រហាមួយ របស់អ៊ីស្រ្តាអែល កាលពីថ្ងៃពុធ​ទី១៤វិច្ឆិកា នៅក្នុងតំបន់ហ្គាស្សា។ ជាការឆ្លើយតបវិញ ក្រុមប្រដាប់អាវុធ អ៊ីស្លាមនិយម របស់ប៉ាឡេស្ទីន បានប្រកាសថា ការស្លាប់របស់នាយទាហ៊ានលោក អាមេដ អាល់ ឌ្យាអាបារី បាន«បើកទ្វាថាននរក»។

រថយន្ដរបស់ អាមេដ អាល់ ឌ្យាអាបារី ក្រោយការវាយប្រហាររបស់អ៊ីស្រ្តាអែល នាថ្ងៃទី១៤វិច្ឆិកាឆ្នាំ២០១២។
រូបថត Adel Hana/AP។

ការភ័យបារម្ភ បានកើតឡើងជាទូទៅ បន្ទាប់ពីការវាយប្រហា តាមផ្លូវអាកាសមួយរបស់អ៊ីស្រ្តាអែល កាលពីថ្ងៃពុធទី​១៤​ខែវិច្ឆិកា ដោយបានសម្លាប់លោក អាមេដ អាល់ ឌ្យាអាបារី (Ahmed al Jaabari) មេដឹកនាំយោធាមួយរូប របស់ក្រុម​ហាម៉ាស (Hamas) នៃជនជាតិប៉ាឡេស្ទីន។ កាំជ្រួចម៊ីសីល របស់អ៊ីស្រ្តាអែលបាន ត្រូវបានបាញ់បង្ហោះពីចំងាយ ទៅបំផ្ទុះ​រថយន្ដរបស់ អាមេដ ធ្វើអោយបុរសនេះស្លាប់ភ្លាមមួយរំពេច ជាមួយនឹងអ្នកអមដំណើរម្នាក់ទៀត (ប្រហែលជាអង្គរក្ស)។ ប្រតិបត្តិការនេះ ត្រូវបានបញ្ជាក់អះអាងដោយកងទ័ពរបស់អ៊ីស្រ្តាអែល ដោយថាខ្លួនបានសម្រួចគោលដៅលើ អាមេដ អាល់ ឌ្យាអាបារី នេះតែម្ដង។ គឺបុរសម្នាក់នេះ ដែលអ៊ីស្រ្តាអែលបានចាត់ទុកថា ជា«ភេវរជនតាំងពី១០ឆ្នាំ»មកហើយ។ ក្នុងសេចក្ដី​ប្រកាស​មួយ កងទ័ពអ៊ីស្រ្តាអែលបាននិយាយថា «គោលដៅនៃកិច្ចសហប្រតិបត្តិការនេះ គឺវាយអោយចំចំនុច បញ្ជាការ និងការគ្រប់គ្រងនៃមេដឹកនាំរបស់ហាម៉ាស»។

នាយកប្រត្តិប័ត្រ នៃក្រុមប្រដាប់អាវុធ ហាម៉ាស តាំងពីឆ្នាំ២០០២ អាមេដ អាល់ ឌ្យាអាបារី ធ្លាប់ជាសមាជិកចាស់មួយរូប នៃ​ក្រុម ហ្វាតា។ អាមេដ ធ្លាប់រួចជីវិត ពីការតាមវាយប្រហាសម្លាប់ម្ដងរួចមកហើយ កាលពីឆ្នាំ២០០៤ តែការវាយប្រហានៅ​ពេល​នោះ បានសម្លាប់កូនប្រុសច្បងរបស់ អាមេដ និងសមាជិកផ្សេងទៀតរបស់ចលនា។ តាមកាសែតអ៊ីស្រ្តាអែល ហាអារ៉េត្ស បុរសនេះមានអាយុ ៥២ឆ្នាំ បានចូលរួមយ៉ាងសកម្ម ក្នុងការចាប់ចំណាប់ខ្មាំង ជាទាហ៊ានជនជាតិបារាំង-អ៊ីស្រ្តាអែលមួយរូប កាលពីឆ្នាំ២០០៦។ នៅពេលដោះលែង ចំណាប់ខ្មាំងនេះមកវិញ អាមេដ បានបង្ហាញមុខជាសាធារណៈ និងបានអះអាងពី​តួនាទីរបស់ខ្លួន នៅក្នុងរឿងចំណាប់ខ្មាំងនេះ។

ភាពភ័យខ្លាច នឹងសង្រ្គាមចោលដុំថ្ម (Intifada) 

បន្ទាប់ពីការប្រកាសមរណភាពរបស់ អាមេឌ រួច សេចក្ដីអំពាវនាវ អោយធ្វើការសងសឹក បានកើនឡើងខ្លាំងពីសំណាក់​ក្រុមហាម៉ាស ដែលគ្រប់គ្រងតំបន់ហ្គាស្សា តាំងពីឆ្នាំ២០០៧។ កងទ័ពស្ម័គ្រប្រយុទ្ធ អេស្សេឌីន និង កាស្សាម ដែលជា កងទ័ពនៃចលនានេះ បានបញ្ជាក់ថា​ ការស្លាប់របស់មេដឹកនាំខ្លួន បាន«បើកទ្វាថាននរក»។ ពួកជីហាដ អ៊ីស្លាម បានធ្វើ​សេចក្ដីប្រកាសតប​ថា «អ៊ីស្ត្រាអែលបានប្រកាសសង្រ្គាម នៅតំបន់ហ្គាស្សា ហើយនឹងត្រូវទទួលរង ពីអំពើនេះវិញ»។

យុទ្ធនាការ «សរសរផ្សែង»

គ្រាន់តែនៅក្នុងថ្ងៃពុធមួយនេះ ការវាយប្រហាតាមផ្លូវអាកាសប្រមាណជា២០លើក ត្រូវបានធ្វើទៅលើតំបន់ហ្គាស្សា។ ជាយុទ្ធនាការមួយ ត្រូវបានគេដាក់ឈ្មោះអោយថា «សរសរផ្សែង»។ អ្នកនាំពាក្យរបស់កងទ័ពអ៊ីស្រ្តាអែលបាននិយាយថា  កំទេច អាមេដ អាល់ ឌ្យាអាបារី គ្រាន់តែប្រតិបត្តិការនៃការចាប់ផ្ដើមប៉ុណ្ណោះ បើប្រៀបធៀប ទៅនឹងការវាយសម្រុក​នៃ​យុទ្ធនាការទាំងអស់។ ការវាយសម្រុកជើងគោកមួយទៀត កំពុងតែសិក្សាដូចគ្នា ដើម្បីបញ្ចប់ការបាញ់កាំភ្លើងត្បាល់ ទៅលើ​ផ្នែកខាងត្បូងអ៊ីស្រ្តាអែល៕

------------------------------------------------
ដោយ សេក មនោរកុមារ - ប៉ារីស​ ថ្ងៃទី១៤ ខែវិច្ឆិកា ឆ្នាំ២០១២
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ