អាជីវករ​នៅ​កោះ​ធំ រង​ការ​បង្ខំ​ពី​អាជ្ញាធរ ឲ្យ​ទៅ​កាប់​ជ្រូក​នៅ​កុងស៊ី

អាជីវករលក់ដូរសាច់ជ្រូក នៅស្រុកកោះធំ​រងការគំរាមពីអាជ្ញាធរ ដោយសារធ្វើអាជីវកម្មកាប់ជ្រូកលក់ដោយខ្លួនឯង នៅតាមផ្ទះរបស់ពួកគេ។
Loading...
  • ដោយ: ក. វិច្ចនី អត្ថបទ និងយកការណ៍៖ ក. វិច្ចនី ([email protected]) - ភ្នំពេញ ថ្ងៃទី ១២ មករា ២០១៥
  • កែប្រែចុងក្រោយ: January 13, 2015
  • ប្រធានបទ: ជ្រុងមួយ
  • អត្ថបទ: មានបញ្ហា?
  • មតិ-យោបល់

ប្រជា​ពលរដ្ឋ​ដែល​ប្រកប​របរ​លក់​ដូរ​សាច់​ជ្រូក នៅ​តាម​ផ្សារ​ក្នុង​ស្រុក​កោះ​ធំ ត្រូវ​បាន​អាជ្ញាធរ​តម្រូវ​ឲ្យ​យក​ជ្រូក​ទៅ​កាប់ នៅ​ក្នុង​កុងស៊ី​វិញ ដែល​តម្រូវ​ឲ្យ​បង់​ថ្លៃ​ឈ្នួល​កុងស៊ី​នោះ ក្នុង​តម្លៃ​ជ្រូក​មួយ​ក្បាល ៧០០០​រៀល និង​តម្រូវ​ឲ្យ​ពួក​គាត់​ជួល​កម្មករ​កាប់​ជ្រូក​ដោយ​ខ្លួន​ឯង​ទៀត។ ចំពោះ​អាជីវករ​ណា ដែល​មិន​ព្រម​បញ្ឈប់​ការ​កាប់​ជ្រូក​នៅ​តាម​ផ្ទះ​ខ្លួន​ឯង​ទេ​នោះ អាជ្ញាធរ​នឹង​ធ្វើ​ការ​ចាប់​យក​សាច់​ជ្រូក​នោះ​ទុក​ មិន​ឲ្យ​លក់​ចេញ​ឡើយ។

អ្នកស្រី ទ្រី សៀវម៉ី អាជីវករ​លក់​សាច់​ជ្រូក​មួយ​រូប​នៅ​ផ្សារ​កោះ​ធំ បាន​ប្រាប់​ទស្សនាវដ្តី​មនោរម្យ.អាំងហ្វូ​ថា អាជ្ញាធរ​បាន​បង្គាប់​ឲ្យ​ពួក​គាត់ យក​ជ្រូក​ទៅ​កាប់​នៅ​កុងស៊ី ដែល​ទើប​តែ​បង្កើត​រួច​ហើយ​​វិញ និង​ហាម​ឃាត់​មិន​ឲ្យ​កាប់​ជ្រូក​នៅ​ក្នុង​ផ្ទះ​ទៀត​ទេ។

អាជីវកររូនេះបានថ្លែងបន្តថា រឿងនេះបានកើតឡើងជិតមួយឆ្នាំទៅហើយ កាលពី ខែ ២ ឆ្នាំ ២០១៤ម្លេះ ប៉ុន្តែពួកគាត់មិនព្រមយកជ្រូកទៅកាប់នៅកុងស៊ីនោះទេ ព្រោះវាយឆ្ងាយពីផ្ទះនិងពីផ្សារដល់ទៅ ៩ គីឡូម៉ែត្រឯនោះ។ ដូច្នេះហើយ​បានជាអាជ្ញាធរចេះតែចុះបង្រ្កាបពួកគាត់ ជារៀងរាល់ថ្ងៃ គឺនៅពេលជិតទៀបភ្លឺ ម៉ោងប្រមាណជាង ៤ព្រឹក ដោយមានប្រដាប់ដោយអាវុធផ្សេងៗផង។

ការបង្កើតកុងស៊ីនោះ ត្រូវបានអ្នកស្រី រី សៀវម៉ី លើកឡើងថាអាជ្ញាធរ និងម្ចាស់កុងស៊ីរួមគំនិតគ្នា ដើម្បីធ្វើ​យ៉ាង​ណាឲ្យអាជីវករ ដែលលក់សាច់ជ្រូកនៅក្នុងស្រុកនោះ យកជ្រូកទៅកាប់នៅកន្លែងរបស់ខ្លួន។

អ្នកស្រីបានអះអាងថា ពួកគាត់នឹងមិនយកជ្រូកទៅកាប់នៅកន្លែងនោះទេ ព្រោះវាមានចំងាយឆ្ងាយ ហើយ​ត្រូវចំណាយថ្លៃឈ្នួលអស់ច្រើន រាប់ទាំងថ្លៃដឹក កាប់ និងកន្លែងកុងស៊ីទៀតផង។ ដូច្នេះពួកគាត់មានតែ​កាប់​សាច់ដោយលួចលាក់ និងការភ័យខ្លាចជារៀងរាល់ថ្ងៃ ព្រោះអាជ្ញាធរធ្លាប់បានចាប់យកសាច់ និងជញ្ជីងរបស់​ពួកគាត់ ហើយថែមទាំងគំរាមដល់អ្នកទិញសាច់នោះទៀតផង ប្រសិនបើអ្នកណាហានទិញនោះ គេនឹងចាប់​ដូចជាអ្នកលក់សាច់នោះដែរ។

អាជីវករលក់សាច់ជ្រូកនៅស្រុកកោះធំ បានសំនូមពរទៅរដ្ឋាភិបាល ឲ្យជួយដោះស្រាយបញ្ហានេះ ព្រោះការ​ប្តឹងផ្តល់របស់ពួកគាត់វាមានរយៈពេលជិត ១ឆ្នំាទៅហើយ ហើយម្យ៉ាងទៀត​ ពួកគាត់ត្រូវខាតពេលវេលារកស៊ី និងជាពិសេសនោះត្រូវប្រកបរបរដោយលួចលាក់ និងភាពភ័យខ្លាចពីអាជ្ញាធរជារៀងរាល់ថ្ងៃ។

គួរបញ្ជាក់ថា នៅដើមឆ្នាំ ២០១៤ នេះ ក្នុងស្រុកកោះធំមានការសាងសង់រោងកុងស៊ីមួយ ដែលជារបស់​ឯកជន។ ​ប៉ុន្តែមិនសូវមានអាជីវករ យកជ្រូកទៅកាប់នៅរោងកុងស៊ីនោះទេ។ ហើយនៅព្រឹកថ្ងៃទី ១១ និង១២ ខែមករានេះ កម្លាំងអាជ្ញាធរប្រដាប់ដោយអាវុធ ប្រមានជាង ២០នាក់ រួមទាំងមន្ត្រីពេទ្យសត្វ បានចុះទៅចាប់​ដល់ផ្ទះអាជីវករ ដែលកាប់ជ្រូកនៅតាមផ្ទះ ក្នុងនោះមានទាំងផ្ទះរបស់អ្នកស្រី ទ្រី សៀវម៉ី ផងដែរ។

ពាក់ព័ន្ធនឹងបញ្ហានេះ ទស្សនាវដ្តីមនោរម្យ.អាំងហ្វូបានអាចធ្វើការទាក់ទង សុំបញ្ជាក់ពីមេឃុំកោះធំ​បាននៅ​ឡើយ ដោយទូរស័ព្ទរបស់គាត់ត្រូវបានបិទ៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...