អ្នកជំនាញថា ច្បាប់កសិកម្ម សម្លាប់កសិករ
- ដោយ: ប្រាថ្នា អត្ថបទ៖ ប្រាថ្នា ([email protected]) - យកការណ៍៖ ស្រ៊ុន ទិត្យ - ភ្នំពេញ ថ្ងៃទី២២ ធ្នូ ២០១៤
- កែប្រែចុងក្រោយ: December 22, 2014
- ប្រធានបទ: ដីធ្លី
- អត្ថបទ: មានបញ្ហា?
- មតិ-យោបល់
-
ទន្ទឹមនឹងសេចក្តីព្រាងច្បាប់ ស្តីពីដីកសិកម្ម កំពុងត្រូវបានរដ្ឋាភិបាលព្រាងនោះ មន្ត្រីតំណាងឲ្យអង្គការសង្គមស៊ីវិលមួយចំនួន បានសម្ដែងការព្រួយបារម្ភរបស់ពួកគេ ជាមុនទៅហើយ។ លោក ថេង សាវឿន អ្នកសម្របសម្រួល សម្ព័ន្ធសហគមន៍កសិករកម្ពុជា បាននិយាយថា ច្បាប់នេះ អាចនឹងធ្វើឲ្យប៉ះពាល់ដល់ដីធ្លី ដែលកសិករកំពុងកាន់កាប់ និងបង្កបង្កើនផល។
នៅទីលានប្រជាធិបតេយ្យ ក្នុងវេទិកាសាធារណៈជជែកពិភាក្សា ចំពោះសេចក្តីព្រាងច្បាប់៣ ស្តីពីឧក្រិដ្ឋកម្មលើប្រព័ន្ធបច្ចេកវិទ្យា សេចក្តីព្រាងច្បាប់ ស្តីពីដីកសិកម្ម និងសេចក្តីព្រាងច្បាប់ ស្តីពីសហជីពនៃសហគ្រាស កាលពីថ្ងៃអាទិត្យទី២១ ខែធ្នូ ឆ្នាំ២០១៤នេះ លោក ថេង សាវឿន បានពន្យល់ថា ច្បាប់ស្តីពីកសិកម្មនេះ ប៉ះពាល់ខ្លាំងត្រង់ចំណុចការផ្តល់អាជ្ញាប័ណ្ណតម្លៃដី។ លោកបានថ្លែងឲ្យដឹងទៀតថា៖ «បានន័យថា នៅពេលដែលប្រជាពលរដ្ឋ គាត់មានដីស្រែចង់ធ្វើជាលំនៅដ្ឋាន គាត់ត្រូវសុំអាជ្ញាប័ណ្ណពីមន្ទីរ ឬក៏ក្រសួងកសិកម្ម ប្រសិនបើមិនសុំអាជ្ញាប័ណ្ណទេ ពួកគាត់ត្រូវជាប់ទោសពន្ធនាគារ ពី១ខែ ដល់១ឆ្នាំ និងត្រូវពិន័យប្រាក់ ពី១លានរៀល ដល់១០លានរៀល»។
«ការសម្លាប់ប្រជាកសិករខ្មែរ ដោយប្រយោល»
លោកបន្ថែមថា ផលប៉ះពាល់មួយទៀត នៅពេលដែលក្រសួងមន្ទីរចង់បង្កើតតំបន់អភិវឌ្ឍកសិកម្ម ដោយយកដីស្រែរបស់កសិករ គឺក្រសួងមិនចាំបាច់ឆ្លងការពិគ្រោះយោបល់ ឬមិនចាំបាច់ផ្តល់សំណងអ្វីទាំងអស់។ លោកថា ច្បាប់នេះ នឹងធ្វើឱ្យប្រជាពលរដ្ឋកាន់តែបាត់បង់ដី ហើយវាជា«ការសម្លាប់ប្រជាកសិករខ្មែរ ដោយប្រយោល»។ អ្នកសម្របសម្រួល សម្ព័ន្ធសហគមន៍កសិករកម្ពុជារូបនេះ បញ្ជាក់ថា៖ «អាចជាការសម្លាប់មនុស្សមួយដ៏ប្រយោលផងដែរ នៅពេលដែលបាត់បង់ដី ព្រោះជាអាយុជីវិតរបស់ពួកគាត់»។
ព្រួយបារម្ភទៅនឹងបញ្ហានេះ តំណាងកសិកម្នាក់លោកសេង សុខហេង បានបង្ហាញក្តីកង្វល់ថា ប្រសិនបើច្បាប់ស្តីពីដីកសិករនេះចេញ ប្រជាពលរដ្ឋអាចនឹងត្រូវបាត់បង់ដីធ្លី និងបាត់បង់សិទ្ធិក្នុងការគ្រប់គ្រង់ និងអាស្រ័យផល ដែលវាផ្ទុយទៅនឹងច្បាប់រដ្ឋធម្មនុញ្ញ និងច្បាប់ភូមិបាលជាដើម។
លោកបានឱ្យដឹងបន្តថា «ព្រោះថានៅក្នុងច្បាប់នោះ គេតម្រូវឱ្យប្រជាពលរដ្ឋធ្វើទៅតាមអ្វី ដែលអាជ្ញាធរគេចង់បាន ឬក៏ខាងអ្នកវិនិយោគគេចង់បាន។ ឧទាហរណ៍ថា គេចង់អភិវឌ្ឍន៍តំបន់កសិកម្ម នៅពេលណាដែលតំបន់ណាមួយ ដែលគេចង់ដាក់ទៅក្នុងតំបន់អភិវឌ្ឍកសិកម្ម គឺប្រជាពលរដ្ឋត្រូវតែធ្វើទៅតាមអ្វី ដែលជាគម្រោងអភិវឌ្ឍរបស់ក្រុមហ៊ុន អញ្ចឹងឃើញថា គាត់មិនអាចធ្វើអ្វីបានទេ ប្រសិនបើគាត់ធ្វើអីផ្សេងខុសពីគេតម្រូវ គាត់នឹងត្រូវមានទោស។»៕