វេលាម៉ោងជាង ៩:០០ទៅហើយ កម្មករ​រោងចក្រ​ខ្វាន់ទុម នៅ​តែ​មិន​ព្រម​ចូល​ធ្វើ​ការងារ និង​នាំ​គ្នា​ឈរ​ស្រែក នៅ​មុខ​រោងចក្រ​នៅ​ឡើយ។ កម្មករ​ទាំង​អស់​នោះ បាន​ទាមទារ​ឲ្យ​ក្រុមហ៊ុន​ដាក់​បន្ថែម​ល័ក្ខខ័ណ្ឌ​ជាង ១០​ចំណុច ដែល​ក្រុម​កម្មករ​នីមួយៗ​បាន​ស្នើរ​សុំ។ ក្រុម​កម្មករ បាន​តំអូញ​ថា ពួក​គេ​ជួប​ការ​លំបាក​ជា​ច្រើន ទាក់​ទង​នឹង​បញ្ហា​ជា​ច្រើន ដូច​ជា​រោង​ចក្រ​គ្មាន​ទារក​ដ្ឋាន ម៉ាស៊ីន​ដេរ​មាន​សភាព​ចាស់​ទ្រុឌ​ទ្រោម កន្លែង​ដាក់​កង់​ម៉ូតូ​គ្មាន​ភ្លើង ការ​តំឡើង​បា្រក់​បុង​ឲ្យ​មាន​ភាព​សមរម្យ និង​បន្ថែម​ប្រាក់​មធ្យមភាគ​ជា​ដើម។

យុវតី​ជា​កម្មករ​ម្នាក់ បាន​ថ្លែង​ឡើង​ថា នៅ​ពេល​ដែល​ម៉ាស៊ីន​នៅ​ក្នុង​រោងចក្រ​ខូច ហើយ​គ្មាន​គ្រឿង​បន្លាស់​គ្រប់​គ្រាន់ រោងចក្រ​មិន​បាន​គិត​ពី​បញ្ហា​នេះ​ទេ បែ​ជា​ជំរុញ​ឲ្យ​កម្មករ​ធ្វើការ​ឲ្យ​បាន​លឿន គ្រប់​ចំនួន​ឲ្យ​រោង​ចក្រ និង​ចង់​ឲ្យ​មាន​គុណភាព​ល្អ​ទៅ​វិញ។

យុវជនម្នាក់ ដែលអះអាងថា ជាតំណាងកម្មកររោងចក្រ ខ្វាន់ទុម បាននិយាយថា នៅពេលដែលរោងចក្រ​ គ្មានការងារឲ្យកម្មករធ្វើ បែជាកាត់ប្រាក់ខែកម្មករទៅវិញ។ រីឯបញ្ហាទារកដ្ឋានវិញ តំណាងកម្មកររូបនោះ បាន​និយាយ​ថា ចង់ឲ្យក្រុមហ៊ុនសាងសង់កន្លែងដាក់ក្មេង ឲ្យបានស្អាត និងមានអ្នកមើលថែក្មេងផង។ ព្រោះ​បើ​កន្លែងមិនស្អាត កម្មករមិនយកកូន មកដាក់នៅទារកដ្ឋានរោងចក្រនោះទេ ខណៈរោងចក្របានតម្រូវឲ្យកម្មករ យកកូនមកដាក់សិន ទើបសាងសង់ទារកដ្ឋានជាក្រោយ។

តំណាងកម្មកររូបនោះ បាននិយាយឲ្យដឹងទៀតថា កម្មករក្រោកឈរធ្វើកូដកម្មនេះ ព្រោះមានការជិះជាន់។ ហើយប្រសិនបើក្រុមហ៊ុន នៅតែបន្តជិះជាន់គាបសង្កត់ទៅលើកម្មករ ក្រុមកម្មករនឹងនៅតែធ្វើការតវ៉ា​បន្ត​ទៀត។ ការធ្វើកូដកម្មនេះ មិនមែនចង់ឲ្យរោងចក្រខាតបង់នោះទេ ហើយក៍មិនមានបំណង ចង់ធ្វើឲ្យក្រុមហ៊ុន​ខ្វាន់ទុម បិទទ្វានោះដែរ គឺគ្រាន់តែចង់បានប្រាក់ខែឲ្យសមរម្យ និងចង់ឲ្យមានតំណាងក្រុមហ៊ុន មកចរចា​ជា​មួយបងប្អូនកម្មករ ដើម្បីរកដំណោះស្រាយមួយ ទទួលបានទាំងអស់គ្នាតែប៉ុណ្ណោះ។

សូមបញ្ជាក់ថា ការធ្វើកូដកម្មរបស់កម្មកររោងចក្រខ្វាន់ទុមនេះ បានធ្វើឡើងនៅព្រឹកថ្ងៃទី ១៥ ខែធ្នូ ចាប់ពី​វេលាម៉ោង ជាង ៨:០០ ហើយកម្មកររោងចក្រជាង ១៥០០នាក់ គ្មានអ្នកណាម្នាក់ចូលធ្វើការឡើយ មានតែ​បុគ្គលិកក្នុងករិយាល័យរដ្ឋបាលប៉ុណ្ណោះ ដែលចូលធ្វើការ៕