ព្រះសង្ឃ​កម្ពុជា​ក្រោម​មួយ​អង្គ​ទៀត រង​ការ​ចោទ​ពី​បទ​ចូល​រួម​ក្នុង​សមាគម​ទុច្ចរិត

ព្រះសង្ឃខ្មែរកម្ពុជាក្រោមមួយអង្គទៀត ព្រះតេជគុណ យ៉ាញ សឿង ដែលគង់នៅវត្តសាមគ្គីរង្សី ហៅ ស្ទឹងមានជ័យ ត្រូវបានសាលាដំបូងរាជធានីភ្នំពេញ ចេញដីកាកោះ ដោយចោទប្រកាន់ពីបទ ចូលរួមសមាគមនៃជនទុច្ចរិត។
Loading...
  • ដោយ: ប្រាថ្នា ដោយ ប្រាថ្នា (ទាក់ទង៖ [email protected] ) - ភ្នំពេញ ថ្ងៃទី២១ វិច្ឆិកា ២០១៤
  • កែប្រែចុងក្រោយ: November 23, 2014
  • ប្រធានបទ: យុត្តិធម៌
  • អត្ថបទ: មានបញ្ហា?
  • មតិ-យោបល់

ក្រោយពីព្រះសង្ឃ ដែល​តែង​ចេញ​ព្រះ​កាយ​តវ៉ា​បញ្ចេញ​មតិ យ៉ាង​តិច​ណាស់​៥អង្គ ត្រូវ​បាន​សាលា​ដំបូង​រាជធានី​ភ្នំពេញ សម្រេច​ឃុំ​ខ្លួន​ជា​បន្ត​បន្ទាប់​នោះ ព្រះ​សង្ឃ​ខ្មែរ​មក​ពី​កម្ពុជា​ក្រោម​មួយ​អង្គ​ទៀត ត្រូវ​រង​នូវ​ការ​ចោទ​ប្រកាន់ ពី​សំណាក់​សាលា​ដំបូង​រាជធានី​ភ្នំពេញ។ តាម​បទ​បញ្ញត្តិ​មាត្រា​៤៩៩ នៃ​ក្រម​ព្រហ្មទណ្ឌ នៃ​ព្រះ​រាជាណាចក្រ​កម្ពុជា ព្រះ​តេជគុណ យ៉ាញ សឿង ជា​ព្រះ​សង្ឃ​ខ្មែរ​មក​ពី​កម្ពុជា​ក្រោម ត្រូវ​បាន​សាលា​ដំបូង​រាជធានី​ភ្នំពេញ តាម​រយៈ​ចៅ​ក្រម​ស៊ើប​សួរ​លោក នូ វាសនា បាន​ធ្វើការ​កោះ​ហៅ ដើម្បី​ចូល​បំភ្លឺ​បញ្ហា​មួយ​ចំនួន ពី​ដំណើរ​រឿង ចូល​រួម​សមាគម​នៃ​ជន​ទុច្ចរិត ប្រព្រឹត្ត​នៅ​ចំណុច​មុខ​វត្ត​សាមគ្គី​រង្សី ស្ថិត​នៅ​ផ្លូវ​លំ ភូមិ​ទ្រា២ សង្កាត់​ស្ទឹង​មាន​ជ័យ រាជធានី​ភ្នំពេញ​កាល​ពី​ថ្ងៃទី១២ ខែ​វិច្ឆិកា។ នេះ​បើ​តាម ដី​បង្គាប់​ឱ្យ​ចូល​ខ្លួន របស់​សាលា​ដំបូង​រាជធានី​ចុះ​ថ្ងៃ​ទី២០ ខែ​វិច្ឆិកា ឆ្នាំ២០១៤។

ដីកាបង្គាប់ដដែល បាន​បញ្ជាក់​ឱ្យ​ដឹង​ថា ព្រះ​តេជគុណ យ៉ាញ សឿង នឹងត្រូវចូលព្រះកាយទៅបំភ្លឺ នៅសាលា​ដំបូងរាជធានី​ភ្នំពេញនៅថ្ងៃទី១៥ ខែធ្នូ ឆ្នាំ២០១៤ វេលាម៉ោង៩ព្រឹក ។

ព្រះតេជគុណ យ៉ាញ សឿង បានឱ្យដឹងថា ចំពោះការចោទប្រកាន់របស់សាលាដំបូងរាជធានីភ្នំពេញ វាជារឿង​អយុត្តិធម៌ខ្លាំងណាស់ ចំពោះព្រះអង្គ ព្រោះព្រះអង្គមិនបានប្រព្រឹត្តកំហុសអ្វី ដូចការចោទប្រកាន់នោះទេ។ ព្រះអង្គថា ព្រះអង្គមិនបានចូលរួមជាមួយសមាគមនៃជនទុច្ចរិតឯណានោះទេ ព្រះអង្គគ្រាន់តែចូលរួមតវ៉ា ជា​មួយប្រជាពលរដ្ឋដែលមានជម្លោះដីធ្លី តែប៉ុណ្ណោះ។ រម្លឹកពីហេតុការណ៍កាលពីពីថ្ងៃទី១២ ខែវិច្ឆិកា ព្រះ​តេជ​គុណ យ៉ញ សឿង មានថេរៈដីការថា ព្រះអង្គគ្រាន់តែទៅនិមន្តព្រះសង្ឃកម្ពុជាក្រោមពីរអង្គទៀត ស្នាក់​នៅ​វត្ត​សាមគ្គីរង្សី ឱ្យទៅចូលរួមដាក់ញាត្តិតវ៉ា ជាមួយប្រជាពលរដ្ឋរងគ្រោះដីធ្លី នៅខេត្តព្រះវិហារតែប៉ុណ្ណោះ។

ព្រះតេជគុណ យ៉ាញ សឿង មានថេរៈដីកាបន្ថែមថា ព្រះសង្ឃពីរអង្គដែលព្រះអង្គបានទៅនិមន្តនោះ គឺជា​ព្រះ​សង្ឃដែលត្រូវសាលាដំបូងរាជធានីភ្នំពេញ ទើបនឹងចាប់ផ្សឹក និងសម្រេចឃុំខ្លួន ជាមួយសកម្មជនទាំង​១៣​នាក់​ផ្សេងទៀត នាពេលថ្មីៗនេះ។ ព្រះអង្គមានការបារម្ភថា នៅពេលដែលព្រះអង្គចូលព្រះកាយទៅបំភ្លឺ ព្រះអង្គ​អាចនឹងមានវាសនាដូចព្រះសង្ឃពីរអង្គនោះដែរ។

ប៉ុន្តែបើទោះបីជាព្រោះអង្គមានការបារម្ភ ចំពោះការចូលព្រះកាយនេះក៏ដោយ ប៉ុន្តែព្រះអង្គនឹងមិនរត់គេចទៅ​ណានោះទេ ព្រះអង្គនឹងចូលព្រះកាយ ទៅតាមការកោះហៅរបស់សាលាដំបូងរាជធានីភ្នំពេញ៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...