នេះជាការសិក្សាមួយ ដែលនឹងរកមើលថា តើមនុស្សក្នុង១ ០០០ឆ្នាំទៅមុខទៀត នឹងមានរូបរាងយ៉ាងដូចម្ដេច។ តាំងតែ​ពីមនុស្សជាតិបានប្រែក្លាយជា និងមានរូបរាងជាមនុស្សពិតប្រាកដនោះ រាងរៅដងខ្លួន និងផ្ទៃមុខរបស់មនុស្ស មានការ​ប្រែប្រួលជានិច្ចតរៀងមក។ ប៉ុន្ដែការប្រែប្រួលនេះ មិនមានថ្ងៃណានឹងឈប់នៅឡើយ ព្រោះអ្នកឯកទេសខាង គ្រឿងក្នុង​របស់មនុស្ស បានខិតខំ និងកំពុងតែស្វែងយល់ រកមើលថា តើមនុស្សក្នុងជំនាន់ទៅអនាគត នឹងមានរូបរាងយ៉ាងណា។

ទស្សនាវដ្ដី ឌឺសាន់(The Sun)  របស់អង់គ្លេស បានប្រមែប្រមូលគ្រប់ទិន្នន័យទាំងអស់នេះ ហើយបានសំរេចចេញផ្សាយ នូវការប៉ាន់ប្រមាណមួយ សំរាប់មនុស្សនៅក្នុងពេលអនាគត។ ហើយអ្វីដែលយើងស្ដាយនោះ គឺយើងនឹងលែងបាន​ឃើញ​រូបរាងសង្ហាៗ ដូចយ៉ាងកំពូលតារាប្រុសរបស់ហូលីវូដ លោក ប្រេដ ភីដ (Brad Pitt) ឬ ចន្នី ដេប (Johnny Depp) ឬក៏តារា​ប្រុសល្បីម្នាក់ទៀត លោកហ្សស ក្លូន្នី (George Clooney) ហើយ យើងក៏នឹងលែងឃើញមានមនុស្សស្រីស្អាតៗ ដូចយ៉ាង​តារាស្រ្តីៗ នាងម៉ូនីការ ប៊ែលូស៊ីនី (Monica Bellucini)  ឬនាងសាគៀរ៉ា (Shakira) ឬក៏នាង នីកូល ឃីតម៉ាន់ (Nicole Kidman) ទៀតដែរ។ មនុស្សបន្ដវេនរបស់យើង នៅពេលអនាគត មានសម្រស់មិនស្អាត ដូចជំនាន់យើងក្នុងពេលនេះទេ។

ទស្សនាវដ្ដី បានលំអិតពីមនុស្ស ថានឹងមានរូបរាងខ្ពស់ជាងបច្ចុប្បន្ន ដោយសារតែភាពជឿនលឿនរបស់វិស័យវេជ្ជសាស្រ្ត និងចំណីអាហារដែលមនុស្សជ្រើសរើសញ៉ាំ កាន់តែល្អ។ អ្នកជំនាញម្នាក់ឈ្មោះ ហ្គារី ទ្រេន័រ (Garry Trainer) បានវិភាគ​ឃើញថា «ជនជាតិអាមេរិកាំង បច្ចុប្បន្ន មានកំពស់ខ្ពស់ជា ជនជាតិអាមរិកាំង កាលពីឆ្នាំ១៩៦០ ប្រមាណជា ២,៥សម។​ ហើយនៅឆ្នាំ៣០១២ យើងនឹងមានកំពស់ ជាទូទៅ ២,១មែត្រ។» ដូច្នេះក្នុង ១ ០០០ឆ្នាំទៅមុខ ម៉ៃឃើល ហ្សកដង់ (Michael Jordan) ដែល​ជា​តារា បាស់ស្កេតប៊ល ដ៏ល្បី នៅថ្ងៃនេះ នឹងក្លាយជាកីឡាករដែលមានមាឌតូចម្នាក់ប៉ុណ្ណោះ។

ខ្ពស់ជាង តែមានទទឹងតូចជាង មនុស្សសម័យនេះ ព្រោះប្រព័ន្ធរំលាយអាហារក្នុងខ្លួនមនុស្ស នឹងវិវឌ្ឍន៍ទៅរកដំណាក់កាល​មួយទៀត ដើម្បីបញ្ជៀសភាពធាត់ចុកខ្លាញ់។

ខួរក្បាលតូចជាងពេលបច្ចុប្បន្ន

បម្រើបម្រាស់ នៃបច្ចេកវិទ្យាបានរីកចំរើនដល់កំពូល ដូចយ៉ាងទូរស័ព្ទអាយហ្វូនដ៏ទំនើប ប្រអប់វាយអក្សរកាន់តែងាយ ។ល។ នឹងធ្វើអោយមានការប្រែប្រួល ក្នុងប្រព័ន្ធសរសៃប្រសាទរបស់មនុស្ស ដូចជាបង្កអោយមាន ភាពខឹងមួម៉ៅខ្លាំង​ជាងមុន ហើយដៃនឹងលូតវែងជាងមុន ព្រោះយើងនឹងមិនសូវប្រើប្រាស់វាច្រើន ដូចពេលបច្ចុប្បន្ននេះទេ។ និយាយរួម មនុស្សជំនាន់នោះ ខ្ជិលជាមនុស្សសម័យនេះ។

ហើយភាពជ្រីវជ្រួញ ក៏មានច្រើនជាងមនុស្ស បច្ចុប្បន្នដែរ ដោយហេតុការប្រើប្រាស់ជាអចិន្រ្តៃយ៍ នៃប្រព័ន្ធអេឡិចត្រូនិក ដែលកាន់តែទំនើបទៅៗ។ តែភាពជ្រីវជ្រួញនេះ នឹងមិនមានផ្នត់ធំៗ ខ្លាំងពេកនោះទេ។

ហើយខួរក្បាលមនុស្សសម័យនោះ ហេតុអ្វីក៏ប្រែក្លាយជាតូចជាងឥឡូវ? មិនពិបាកស្វែងរកអំណះអំណាងមកវិភាគទេ ព្រោះការងារជាច្រើនដែលមនុស្សធ្វើចាប់ពីពេលនេះតទៅ នឹងត្រូវចងចាំទុក តែនៅក្នុងម៉ាស៊ីន កុំព្យូទ័រ ដូច្នេះមនុស្សលែង​ត្រូវការខួរក្បាលធំ ដូចមុនដើម្បីផ្ទុកការចងចាំទាំងនេះទៀតហើយ។

ធ្មេញតិច ឬអស់ធ្មេញ

ដោយសារចំណីអារហាររបស់មនុស្ស វិវត្តន៍ទៅរក អាហារដែលកាន់តែភាពទន់ទៅៗ មនុស្សនឹងមានធ្មេញកាន់តែតិច ហើយមាត់ក៏កាន់តែរួមតូច។ ទន្ដបណ្ឌិតម្នាក់ លោក ហ្វីលីប ស្តេមម័រ (Philip Stemmer) បានអះអាងថា៖ «យើងគិតថា អាហារដែលយើងបរិភោគ គ្រាន់តែមានលក្ខណៈវត្ថុរាវៗ និងជាគ្រាប់តូចៗ ដូច្នេះក្នុងពេលអនាគត យើងលែងត្រូវការ​មាត់​ធំទៀតហើយ។» លោកថែមទាំងបានព្យាករណ៍ថា មនុស្សឆ្នាំ ៣ ០០០ នឹងមានឆ្អឹងធ្គាមធំៗ ដោយសារតែមនុស្ស​លែងសូវ​កំរើកវាតទៅទៀត។

ប៉ុន្ដែ ភ្នែករបស់មនុស្សក្នុងអនាគត នឹងរីកធំជាងបច្ចុប្បន្ន ដោយការទំនាក់ទំនងគ្នារបស់ មនុស្សជំនាន់នោះ នឹងប្រើប្រាស់​យ៉ាងច្រើនលើសលប់ តាមរយះភ្នែក៕

--------------------------------------------------
ដោយ សេក មនោរកុមារ - ប៉ារីស​ ថ្ងៃទី១២ ខែតុលា ឆ្នាំ២០១២
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ