«ខ្ញុំទៅសាលានៅពេលថ្ងៃ តែខ្ញុំជាទាសករផ្លូវភេទនៅពេលយប់។ មានពេលមួយនោះ ខ្ញុំនឹកឃើញចង់​សម្លាប់​ខ្លួន។» កុមារី អាណាប៊ែល ហ្វ័រ៉េស (Annabelle Forest - ឈ្មោះដែលអ្នកសារព័ត៌មានដាក់ឲ្យ) មាន​អាយុ​នៅថ្ងៃនេះ ជាង២០ឆ្នាំ បានរំលឹកឡើងវិញពីជីវិតដ៏ទារុណ នៅក្នុងសៀវភៅមួយ ដែលទើបនឹងបោះពុម្ភ​ចេញ​ផ្សាយ នៅក្នុងចក្រភពអង់គ្លេស។ សៀវភៅនេះ មានចំណងជើងជាភាសាអង់គ្លេសថា៖ «The Devil on the Doorstep : My Escape From a Satanic Sex Cult»។

អ្វីដែលបានរៀបរាប់ នៅក្នុងសៀវភៅនេះ គឺជាភាពរន្ធត់ខ្លោចផ្សា ដ៏រន្ធត់បំផុត មិនដែលធ្លាប់ជួប​នៅក្នុង​ប្រវត្តិ​សាស្ត្រ​ទំនើប នៃបណ្ដាប្រទេសនៅបស្ចឹមលោក។ នេះបើតាមការលើកឡើង របស់សារព័ត៌មាន​អង់គ្លេស Daily Mail។

ដេកជាមួយមនុស្សប្រុស ១៨០០នាក់

ក្នុងអាយុ៧ឆ្នាំ នាងតូចត្រូវបានចាប់ឲ្យស្គាល់ និងចូលក្នុងសាសនា ឃិដវេលី (Kidwelly) ដែលជាឈ្មោះ​ក្រុង​តូចមួយ ក្នុងតំបន់ភាគខាងលិចនៃចក្រភព។ នៅពេលនោះ ខូលីន បាធ្លៃ (Colin Batley) ឪពុកចុង​របស់​នាង ដែលជាសមាជិកម្នាក់របស់សាសនានោះ បានប្រារព្ធពិធីមួយឡើង៖ នោះគឺចាប់បង្ខំឲ្យនាងតូច ចូលរួម​ក្នុង​ការ​រួមភេទរវាងគាត់ និងម្ដាយបង្កើតរបស់នាង។ នៅអាយុ១១ឆ្នាំ ឪពុកចុងរូបនោះ បានរំលោភនាង​២ដង។ ហើយ​នៅបីឆ្នាំក្រោយមកទៀត គឺម្ដាយបង្កើតរបស់នាងផ្ទាល់តែម្ដង ជាអ្នក​បំពារបំពាន​ផ្លូវភេទ​មក​លើនាង នៅ​ក្នុង​ពិធីស្វែងរកស្ថានសួគ៌៧ជាន់មួយបែប។

បើតាមសំដីរបស់នាង ដែលត្រូវបានសរសេររៀបរាប់ នៅក្នុងសៀវភៅនោះ បានឲ្យដឹងថា នៅក្នុងអំឡុង​ពេល​បន្ទាប់ពីនោះមក នាងត្រូវបានបង្ខំឲ្យលក់ខ្លួន ដើម្បីស្វែងរកមូលនិធិទ្រទ្រង់សាសនា ហើយ​បានដេក​ជា​មួយ​មនុស្សប្រុស មានចំនួនយ៉ាងហោច ១៨០០នាក់។

«យើងមិនហ៊ាន បើកភ្នែកសម្លឹងជននោះ ចំពីមុខទេ»

អាណាប៊ែល ហ្វ័រ៉េស បានអះអាងថា នាងនឹងមិនអត់អោនទោស ឲ្យម្ដាយរបស់នាងជាដាច់ខាត។ នាងបាន​បន្តទៀតថា នៅក្នុងប៉ុន្មានឆ្នាំនៃយុវភាពរបស់នាង នាងបែរជាស្ថិតនៅក្រោមការ​ត្រួតពិនិត្យរបស់ជន​កំណាច​មួយរូប ដែលមានសិទ្ធិកំណត់ លើជោគវាសនានៃសមាជិកនានា របស់សាសនា។ «យើងមិនហ៊ាន បើក​ភ្នែក​សម្លឹងជននោះ ចំពីមុខទេ។ ទាំងអស់គ្នា ត្រូវអនុវត្តន៍តាមអ្វីដែលជននេះនិយាយ។ បុរសនេះ សួរខ្ញុំ​ជា​រឿយៗ​ ថាតើខ្ញុំចូលចិត្តការសេពកាម ជាមួយគាត់ឬទេ? ខ្ញុំចាំបាច់ត្រូវឆ្លើយថា ចូលចិត្ត ព្រោះបើមិនអញ្ចឹងទេ ជន​កំណាច​​អាច​នឹង​សម្លាប់ខ្ញុំ។»

បន្ទាប់ពីធ្លាក់ខ្លួនមានផ្ទៃពោះ នៅអាយុ១៧ឆ្នាំនោះ នាងបានឆ្លៀតពេលរត់គេសខ្លួន នៅមួយឆ្នាំក្រោយមក នៅពេល​ដែលនាងបានប្រសូតកូន។ ចំណែកឯឪពុកចុង និងម្ដាយបង្កើតរបស់នាង ត្រូវបានឃាត់ខ្លួន។ តុលាការ​បាន​សម្រេច​ទោសជនទាំងពីរនេះ ឲ្យជាប់ពន្ធនាគារពី១១ ដល់១២ឆ្នាំ ពីបទរំលោភបំពានលើកុមារ ក្នុងរយៈ​ពេល​ច្រើន​ឆ្នាំ៕