ស៊ាមស៊ុង បានប្រកាសកាលពីថ្ងៃអាទិត្យនេះ ថាខ្លួនបានស្នើរទៅការិយាល័យរដ្ឋអាជ្ញា នៃរដ្ឋធានី សេអ៊ូល ប្រទេសកូរ៉េខាងត្បូង ឲ្យបើកការស៊ើបអង្កេតមួយ ប្រឆាំងនឹងប្រធាន និងអ្នកទទួលខុសត្រូវមួយចំនួនទៀត នៃ​ក្រុមហ៊ុនកូរ៉េខាងត្បូងមួយទៀត ពីបទបង្ខូចកេរ្តិ៍ឈ្មោះ ធ្វើឲ្យខូចខាតទ្រព្យសម្បត្តិ និងរំខានដល់​សកម្មភាព​​សេដ្ឋកិច្ចរបស់ខ្លួន។

ស៊ាមស៊ុង បានលើកឡើងថា កាលពីដើមខែកញ្ញានេះ មានម៉ាស៊ីនបោកគក់ជាច្រើន នៅក្នុងស្តង់ដាក់​គ្រឿង​អេឡិកត្រូនិកចំនួនពីរ បានរងនូវការខូតខាត នៅពេលដែលម៉ាស៊ីនទាំងនេះ កំពុងត្រូវបានដាក់តាំងបង្ហាញ​ក្នុងព្រឹត្តិការណ៍ពិពណ៌ដ៏ធំហៅថា IFA នៃរដ្ឋធានីប៊ែរឡាំង។ ការតាំងពិពណ៌នោះ បានប្រមូលនូវ​ផលិតផល​អេឡិកត្រូវនិក និង​បច្ចេកវិទ្យា​ថ្មីៗ​ជាច្រើន រួមទាំងផលិតផល ស៊ាមស៊ុង និងអ៊ិលជី ផង មកដាក់តាំង​បង្ហាញ។

រូបភាពដែលថតបានដោយម៉ាស៊ីនថតសុវត្ថិភាព នៅក្នុងមណ្ឌលតាំងពិពណ៌នេះ បានបង្ហាញឲ្យឃើញ ពី​ក្រុមមនុស្សជាតិអាស៊ី ជាច្រើននាក់ ដែលគេបានស្គាល់នៅពេលក្រោយមក ថាជាថ្នាក់ដឹកនាំរបស់ក្រុមហ៊ុន អ៊ិលជី នោះ បានចូលទៅរុករើ «ត្រជៀកទ្វា» របស់ម៉ាស៊ីនបោកគក់ស៊ាមស៊ុង។ ក្រុមហ៊ុនស៊ាមស៊ុង បាន​និយាយទៀតថា ការដែលធ្វើឲ្យម៉ាស៊ីនបោកគក់ខូចខាតនោះ «ក្រុមហ៊ុនដែលជាប់សង្ស័យនេះ មិន​ត្រឹម​តែ​បានបង្ខូចរូបភាព របស់យីហោ ស៊ាមស៊ុង ប៉ុណ្ណោះទេ តែក៏បានបំផ្លាញរូបភាព របស់បុគ្គលិក​ស៊ាមស៊ុង​នោះ​ថែមទៀត»។

តែសម្រាប់ក្រុមហ៊ុន អ៊ិលជី វិញ បានច្រានចោល នូវការចោទប្រកាន់ខាងលើទាំងស្រុង។ អ៊ិលជី បានទទួល​ស្គាល់ថា បុគ្គលិករបស់ខ្លួន បានចូលទៅក្នុងស្ដង់ទាំងនោះមែន តែថានោះគ្រាន់តែជា«ការសិក្សា​ទីផ្សារ​មួយ»​ប៉ុណ្ណោះ និងគ្មានគោលបំណង ក្នុងការបំផ្លាញផលិតផលតាំងបង្ហាញទាំងនោះទេ។

ប៉ុន្តែ អ៊ិលជី បានវាយបកមក ស៊ាមស៊ុង វិញថា ម៉ាស៊ីនបោកគក់របស់ក្រុមហ៊ុនមួយចំនួន ទំនងជាបាន​បំពាក់​នូវ«ត្រជៀកទ្វា» ដែលគ្មានគុណភាព ងាយនឹងបាក់ខូចខាត ជាងក្រុមហ៊ុនដទៃទៀត។

តាមពិតទៅក្រុមហ៊ុនកូរ៉េទាំងពីរ បានសង្គ្រឺតធ្មេញដាក់គ្នា តាំងពីយូរមកហើយ។ អ៊ិលជី ទោះជាខ្លួនមិន​មាន​មាឌធំ ដូចស៊ាមស៊ុង ខាងផ្នែកសម្ភារៈបច្ចេកវិទ្យាតូចៗ ដូចជាទូរស័ព្ទដៃ កំព្យូទ័រ ឬទូរទស្សន៍ នោះក៏ដោយ តែ​សម្រាប់ផលិតផលអេឡិចត្រូនិកនៅក្នុងផ្ទះធំៗ ផ្សេងទៀត ក្រុមហ៊ុន អ៊ិលជី បាននាំមុខ ស៊ាមស៊ុង។ ចាំ​មើល​ទៅមើល៍ ថាតើសង្គ្រាមយុត្តិធម៌រវាង បងប្អូនគូរសត្រូវនេះ នឹងមានលទ្ធផលបែបណា៕