ពិភពភាពយន្ដ បានស្គាល់តារាភាពយន្ដរូបនេះ តាមរយៈទម្រង់មុខរបស់លោក ដែលមានលក្ខណៈ​ដូច​«ត្រី​ឆ្លាម» ហើយអាចឲ្យគេសម្គាល់បាន តាមរយៈការសម្ដែង ជាតួចិត្តអាក្រក់ជាច្រើន។ តួអង្គដែលបានធ្វើ​ឲ្យ​លោក​ល្បី​ខ្លាំង រហូតជាប់ចំណាត់ថ្នាក់ពិភពលោកនោះ នៅក្នុងការសម្ដែងជាតួ«ធ្មេញដែក» ក្នុងភាពយន្ដ​ហូលីវូដ ០០៧។ លោកមានឈ្មោះថា រីឆាដ ឃែល (Richard Kiel)។

លោក ឃែល បានលាចាកលោក នៅថ្ងៃទី១០ ខែកញ្ញា ឆ្នាំ២០១៤នេះ ក្នុងអាយុ៧៤ឆ្នាំ ក្នុងមន្ទីរពេទ្យ ស៊ាំង​អាញ៉ែស (Saint-Agnes) នៃទីក្រុង ហ្វ្រេណូ (Fresno) ផ្នែកកណ្ដាលនៃរដ្ឋកាលីហ្វ័រនី សហរដ្ឋអាមេរិក។

មានកំណើតនៅក្នុងក្រុង ឌីទ្រ័រ (Detroit) រដ្ឋមឈឺហ្គែន (Michigan) តារាភាពយន្ដ រីឆាដ ឃែល មាន​កំពស់​ខ្ពស់ដាច់គេ រហូតដល់ទៅ ២,១៨ម៉ែត្រ។ ដោយសារតែហេតុនេះហើយ ទើបសមិទ្ធិករភាពយន្ដជាច្រើន តែង​តែនឹក​ឃើញ​ដល់លោក នៅពេលដែលគេចង់រកតួសម្ដែងណាមួយ ដែលមានលក្ខណៈពិសេស ឬយកមក​ធ្វើជាតួចិត្តអាក្រក់ ជាពិសេសដូចជា​នៅក្នុងភាពយន្ដស៊ើបអង្កេត ជេម ស្ប៊ន ដែលលោកបានធ្វើជាតួអង្គ​មាន​ធ្មេញ​ដែកខាំដែកដាច់យ៉ាងផុយ ថតនៅឆ្នាំ១៩៧៧ និងភាពយន្ដដដែលមួយទៀត ថតនៅឆ្នាំ១៩៧៩។

ប៉ុន្តែនៅក្នុងភាពយន្ដ០០៧ ទាំងពីររឿងនោះ តួអង្គ«ធ្មេញដែក»មិនបានធ្វើឲ្យលោក ក្លាយជាមនុស្ស​អាក្រក់​ណាស់ណានោះទេ។ លោក រីឆាដ ឃែល ធ្លាប់បាននិយាយប្រាប់សារព័ត៌មាន Hollywood Reporter កាល​ពី​ឆ្នាំ២០០៩ ថា៖ «ខ្ញុំបានបញ្ចុះបញ្ចូលផលិតករភាពយន្ដ ថាតួអង្គ"ធ្មេញដែក" ត្រូវតែមានសភាវៈជាមនុស្ស ដើម្បីឲ្យស្មើគ្នាជាមួយនឹង ធ្មេញដែក។ ខ្ញុំគិតថាខ្ញុំបានសម្ដែងជ្រុលក្នុងរឿងនោះ។ ខ្ញុំមានប្រជាប្រិយ​ខ្លាំង​ពេក រហូតដល់មានមនុស្សចង់សម្លាប់ខ្ញុំ។»

ដើម្បីដឹងថាយ៉ាងដូចម្ដេច សូមទស្សនាវីដេអូខាងក្រោម ដែលបង្ហាញពីវគ្គធ្មេញដែក សម្ដែងដោយលោក រីឆាដ ឃែល ដូចតទៅ៖