ហេតុការណ៍គ្រោះថ្នាក់បានកើតឡើង នៅឆ្នាំ២០១៣ ក្នុងតំបន់ ន័រហ្វុក (Norfolk) ភាគខាងកើតនៃ​ចក្រភព​អង់គ្លេស។ នៅពេលនោះ ដេវិដ ហូម (David Holmes) អាយុ៣៨ឆ្នាំ បានចាកចេញពីចំណតយានយន្ដមួយ ដោយបានដាក់កាម៉េរ៉ាមួយបង្កប់ នៅជាប់ក្នុងមួកការពាររបស់ខ្លួន ដើម្បីថតពីល្បឿនដែលខ្លួនបានប្រើ ក្នុង​ការបើកបរ។

ក្នុងល្បឿន១៥០គីឡូម៉ែត្រក្នុងមួយម៉ោង ដេវិដ ហូម បានជល់ជាមួយរថយន្ដ ដែលបើកក្នុងទិសផ្ទុយគ្នា តែ​បាន​បត់ចេញមកខាងស្ដាំដៃ។ ជាមួយនឹងល្បឿនដ៏លឿនហួសនេះ អ្នកបើកបរម៉ូតូជាតិអង់គ្លេសរូបនេះ មិន​អាច​មាន​ឱកាសដើម្បីគេចចេញ ឬចាប់ហ្វ្រាំងទាន់ ដើម្បីបញ្ជៀសគ្រោះថ្នាក់បានឡើយ។ អ្នកបើករថយន្ដ​មិន​​មាន​គ្រោះថ្នាក់អ្វីទេ តែ ដេវិដ ហូម អ្នកបើកម៉ូតូ បានស្លាប់ភ្លាមនៅនឹងកន្លែង។

អ្នកស្រី ប្រេនដា ហូម (Brenda Holmes)​ ម្ដាយរបស់ ដេវិដ បានសម្រេចចិត្តផ្សាយជាសាធារណៈ នូវខ្សែ​វីដេអូ​នេះ ដើម្បីរំលឹកទៅដល់អ្នកបើកបរទាំងឡាយ ដែលចូលចិត្តបើកបរ ដោយប្រើល្បឿនលឿន​ហួស​កម្រិត ដូច​ជា​កូនប្រុសរបស់អ្នកស្រី។ រូបភាពវីដេអូ ដែលត្រូវបានផ្សព្វផ្សាយ ដោយនគរបាលក្នុងតំបន់នោះ ត្រូវ​​បាន​​កាត់ត​ជាកង់ៗ ដើម្បីបញ្ចូលរូបភាពសម្ភាសរបស់អ្នកស្រី ប្រេនដា។

ពាក្សសម្ដីមួយឃ្លា របស់ស្ត្រីជាម្ដាយរូបនេះ បានបង្កការរំជួលចិត្តជាទូទៅ។ អ្នកស្រីបានថ្លែងថា៖ «ប្រសិនជា​យើងអាចហាមឃាត់ គ្រោះថ្នាក់របៀបនេះបាន នោះវានឹងមិនធ្វើឲ្យគ្រួសារទាំងមូលរស់នៅ ដូចស្ថានភាព ដែលយើងបានឆ្លងកាត់កន្លងមកនោះទេ។ ហើយដេវិដ ក៏នឹងមិនស្លាប់ ដោយអត់ប្រយោជន៍ដែរ។» ឃ្លា​ដែល​អ្នកស្រី ចង់និយាយថាមរណៈភាព របស់កូនប្រុសអ្នកស្រី ជាភស្ដុតាងដ៏ប្រាកដមួយ ដែលអ្នកបើកបរ​ទាំង​​ឡាយ គួរយកមកធ្វើជាមេរៀន និងគិតពិចារណាឡើងវិញ មុននឹងបង្កើនល្បឿនហួសប្រមាណនោះ៕