ការបង្ហាញម៉ូដជាទូទៅ ត្រូវបានម្ចាស់យីហោ ឬអ្នកឆ្នៃម៉ូដប្រារព្ធធ្វើ ដើម្បីសង្កតធ្ងន់ទៅលើតែសោភ័ណភាព និងគំនិតឆ្នៃប្រឌិត របស់សម្លៀកបំពាក់ ឬបង្ហាញពីអ្វីដែលម្ចាស់យីហោ ឬអ្នកឆ្នៃម៉ូដចង់បានប៉ុណ្ណោះ។ ប៉ុន្តែ​កាលពីយប់ថ្ងៃចន្ទទី៨ ខែកញ្ញានេះ យីហោសម្លៀកបំពាក់ រ៉ាល់ ឡូរ៉ង់ (Ralph Lauren) ដ៏ល្បីឈ្មោះ​របស់​អាមេរិក បានបង្ហាញនូវកម្មវិធីដ៏ប្លែកចម្លែក«អស្ចារ្យ» នូវការបង្ហាញម៉ូដសម្លៀកបំពាក់របស់ខ្លួន នៅកណ្ដាល​ឧទ្យានធំ នៃទីក្រុងញ៉ូយក។ នោះគឺបញ្ចូលបច្ចេកវិទ្យា 4D មកធ្វើជាក្រឡាដើរ និងតុបតែងឆាកឲ្យនារីៗ​បង្ហាញម៉ូដ បង្កើតជាទស្សនីយភាពដ៏គួរឲ្យស្ងប់ស្ងែង។

នារីបង្ហាញម៉ូដដ៏ស្អាតសង្ហា បានស្លៀកសម្លៀកបំពាក់ដែលទើបនឹងត្រូវបានឆ្នៃម៉ូដថ្មី ហើយបានចេញ​មក​ដើរ​ក្នុងឆាក ចេញចូលជាមួយនឹងរូបភាព ដែលត្រូវបានគេបញ្ចាំងឡើងទៅលើផ្ទាំងសំពត់ស។ រូបភាព​ទាំង​នោះ សុទ្ធតែជាទីកន្លែងដ៏សំខាន់ៗ នៅទីក្រុងញ៉ូយក និងតំបន់មួយចំនួនទៀត ក្នុងសហរដ្ឋអាមេរិក។

ម្ចាស់យីហោ លោក រ៉ាល់ ឡូរ៉ង់ ដែលមានវត្តមាននៅទីនោះដែរ បានសម្ដែងការស្ងើចសរសើរ ដោយខ្លួន​លោកផ្ទាល់តែម្ដង់ ចំពោះផ្ទាំងទស្សនីយភាពនេះ។ ប៉ុន្តែក្រុមហ៊ុនឆ្នៃម៉ូដ មិនបានបង្ហើបឲ្យដឹងពីអាថ៌កំបាំង នៃការរកឃើញនេះទេ ដោយគ្រាន់តែនិយាយថា ជាការបូកបញ្ចូលគ្នារវាងការបង្ហាញម៉ូដ និងបច្ចេកវិទ្យាថ្មី ដែលមិនដែលធ្លាប់មាន ក្នុងពេលកន្លងមកប៉ុណ្ណោះ៕

ដើម្បីកុំឲ្យរងចាំយូរ សូមទស្សនាវីដេអូនេះ ដូចតទៅ៖