សមាជិកទី៩ គ.ជ.ប - ព័ត៌មានជាផ្លូវការ ពីមន្រ្តីច្បាប់ជាន់ខ្ពស់ នៃគណបក្សសង្គ្រោះជាតិលោក រស់ សួរ បាន​លើក​ឡើងថា នាព្រឹកថ្ងៃទី២៨ ខែកក្កដា នេះថ្នាក់ដឹកនាំកំពូលៗទាំងពីរ បានទំនាក់ទំនងជាមួយលោកស្រី ពុង ឈីវ កេក សុំចូលរួមជាសមាជិកទី៩នៃ គ.ជ.ប។ លោកបន្តថា លោកស្រីមិនទាន់ឆ្លើយតបភ្លាមៗនោះទេ ដោយសុំពេលបីម៉ោង​ពិចារណា និងប្រជុំជាមួយក្រុមការងារ នៃអង្គការលីកាដូរបស់លោកស្រីសិន។

សូមរំលឹកដែរថា កាលពីព្រឹកថ្ងៃទី២៨ ខែកក្កដា នេះ នៅវិមានរដ្ឋសភា លោក ហ៊ុន សែន និងលោក សម រង្ស៊ី មាន​ជំនួបក្រៅផ្លួវការមួយ ដោយពិភាក្សាស្វែងរកសមាជិកទី៩ របស់គ.ជ.ប។ ពាក់ព័ន្ធនឹងបញ្ហាសមាជិកទី៩ គ.ជ.ប នេះ លោក ហ៊ុន សែន ក៏ដូចជាលោក សម រង្ស៊ី នៅចំពោះមុខអ្នកសារព័ត៌មាន បានបង្ហាញនូវឆន្ទៈក្នុងការជ្រើសរើស បេក្ខភាពទី៩ របស់ គ.ជ.ប ដែលចេញពីអង្គការសង្គមស៊ីវិល។

ឯលោកស្រី ពុង ឈីវ កេក វិញ តាមការបញ្ជាក់របស់ជំនួយការលោកស្រី ជាមួយទស្សនាវដ្តីមនោរម្យ.អាំងហ្វូក្នុងថ្ងៃទី​២៨ ខែកក្កដានេះ ថាលោកស្រីកំពុងប្រជុំពិភាក្សា និងក៏កំពុងរៀបចំឯកសារមួយចំនួន ឬលិខិតដើម្បីឆ្លើយតប​ទៅថ្នាក់​ដឹកនាំនៃគណបក្សទាំងពីរខាងលើនោះដែរ។ លោកស្រីក៏បានកោះប្រជុំសមាជិក នៃថ្នាក់ដឹកនាំអង្គការលីកាដូ មក​ទល់​នឹងម៉ោង១២ នេះ នៅមិនទាន់មានចម្លើយតបនៅឡើយ។ ឯការឆ្លើយតបយ៉ាងណានោះ អាចនឹងមានលិខិត​ជា​ផ្លូវការ​ចេញនាថ្ងៃទី២៩ ខែកក្កដា ខានស្អែកនេះ។

«ប្រាំ»សម័យកាល ...

មន្រ្តីជាន់ខ្ពស់នៃគណបក្សសង្គ្រោះជាតិ លោក រស់ សួរ បានបន្តថា ជំហរក្នុងការជ្រើសរើសលោក ស្រី ពុង ឈីវ កេក នោះ ព្រោះតែលោកស្រីជាមនុស្ស ដែលបានស្ថិតនៅក្នុង«ប្រាំ»សម័យកាល នៃដំណើរការវិវឌ្ឍន៍នយោបាយ​នៅ​កម្ពុជា។ លោកបានសង្កត់ធ្ងន់ថា ចំណុចដែលពិសេសនោះលោកស្រី ពុង ឈីវ កេក ធ្លាប់បានចូលរួមក្នុងការរៀបចំ​កិច្ចចរចា ឈានទៅរកការចុះកិច្ចព្រមព្រៀងសន្តិភាព ទីក្រុងប៉ារីស ថ្ងៃ២៣តុលា ឆ្នាំ១៩៩១។

សូមរម្លឹកថា ក្រៅពីសមាជិកបេក្ខភាពទី៩ របស់គ.ជ.ប នេះ ទាំងលោក ហ៊ុន សែន ទាំងលោកសមរង្ស៊ី មិនបាន​បញ្ជាក់​ឈ្មោះនូវបេក្ខភាពទាំងបួនរូប ដែលចេញមកពីគណបក្សទាំងពីរនោះនៅឡើយដែរ។ តែលោក ហ៊ុន សែន បានបង្ហើប​យ៉ាងដូច្នេះថា «បេក្ខភាពរបស់គណបក្សប្រជាជនកម្ពុជាបួនរូប ក៏សុំរក្សាទុកដែរ»។