ទីលានប្រជាធិបតេយ្យ នឹងត្រូវបើកក្រោយការ«ស្បថ»ចូលសភា ឬចូលកាន់តំណែងនៃតំណាងរាស្រ្តជាប់ឆ្នោត គណបក្សសង្គ្រោះជាតិ។ នេះជាការបញ្ជាក់ របស់មន្ត្រីទទួលខុសត្រូវនៃគណបក្សប្រជាជន នៅក្រោយជំនួបប្រជុំ​នៃថ្នាក់ដឹកនាំកំពូលគណបក្សទាំងពីរ កាលពីថ្ងៃទី២២ ខែកក្កដា ឆ្នាំ២០១៤។

ទីលានប្រជាធិបតេយ្យ ហ៊ុំព័ទ្ធដោយបន្លាលួស តាំងពីចុងខែមេសាឆ្នាំ២០១៤មក។ (រូបថត MONOROOM.info/ C. Nita)

សិទ្ធិ សេរីភាព - «បិទ»ទីលានប្រជាធិបេយ្យ មានន័យស្មើនឹងបិទ«ច្បាប់» ដែលផ្តល់សិទ្ធិដល់ពលរដ្ឋគ្រប់រូប​ក្នុង​ការសម្តែងមតិ និងសេរីភាព។ តែទើបតែមកដល់ថ្ងៃទី២២ ខែកក្កដា ឆ្នាំ២០១៤ម្សិលម៉ិញនេះ ទើបមានដំណឹងលេចឮ​ជាផ្លូវការថា ទីលានប្រជាធិបតេយ្យ អាចនឹងត្រូបើកឲ្យដំណើរការជាថ្មីឡើងវិញ ក្រោយការ«ស្បថ»ចូលសភា នៃ​តំណាង​រាស្រ្តជាប់ឆ្នោតគណបក្សប្រឆាំង។

រដ្ឋលេខាធិការក្រសួងមហាផ្ទៃលោក ព្រំ សុខា និងជា​អ្នកដឹកនាំក្រុមចចារនៃគណបក្សប្រជាជនកម្ពុជា   បានលើក​ឡើង​ក្នុងសន្នសិទសារព័ត៌មាន ក្រោយជំនួបកំពូលម្សិលម៉ិញនេះ នាវិមានព្រឹទ្ធសភាថា នឹងពន្លឿនការ​ស៊ើប​អង្កេត​ឲ្យបានឆាប់ ដើម្បីជំរុញឲ្យមានការបើកទីលានក្នុងពេលឆាប់ៗនេះ ក្រោយពេលដែលបេក្ខជនតំណាងរាស្រ្តជាប់ឆ្នោត គណបក្សសង្គ្រោះជាតិស្បថចូល«កាន់តំណែង»។ តែលោកមិនបានបង្ហាញ ឬធានានូវពេលវេលាពិតប្រាកដ​ នៃ​ការ​បើកទីលាននោះនៅពេលណានោះទេ។

រដ្ឋលេខាធិការក្រសួងមហាផ្ទៃរូបនេះ បានបន្ថែមថា មានបញ្ហា«ពីរ»ដែលត្រូវធ្វើការដោះស្រាយជាមុន ក្រោយ​ការ​ចូលសភានៃតំណាងរាស្រ្តបក្សប្រឆាំង។ «យើងនឹងពិនិត្យនីតិវិធី នៃការស៊ើបអង្កេត។ ព្រោះទីលានប្រជាធិបតេយ្យ ពាក់ព័ន្ធបញ្ហាពីរ អំពើហិង្សាកាលពីថ្ងៃទី២-៣ ខែមករា និងថ្ងៃទី១៥ ខែកក្កដា(ឆ្នាំ២០១៤)នេះម្តងទៀត។»

ក្នុងកិច្ចប្រជុំចរចាថ្នាក់កំពូលនេះ គណបក្សសង្គ្រោះជាតិ បានព្រមព្រៀងចូលប្រជុំរដ្ឋសភា។ តែលោក យឹម សុវណ្ណ ក្នុងសន្និសីទសាព័ត៌មាន មិនបានបញ្ជាក់ពីពេលវេលា នៃការចូល«ស្បថ»កាន់តំណែងនោះទេ គ្រាន់តែពោល​យ៉ាង​ខ្លីយ៉ាងថា «ក្នុងពេលឆាប់ៗខាងមុខ»។

ទីលានប្រជាធិបតេយ្យត្រូវបានបិទ និងឃុំឃាំងទៅដោយបន្លាលួស និងរនាំងដែកជាច្រើនជាន់ ព្រមទាំងមាន​កម្លាំង​សមត្ថកិច្ចសម្រុះនៃខណ្ឌទាំង៩ ក្នុងរាជធានីភ្នំពេញ ធ្វើការយាមទាំងយប់ទាំងថ្ងៃ ដោយប្រុងប្រយ័ត្ន«បំផុត»។ ការបិទ​នេះ​ ត្រូវបានប្រកាសឲ្យដឹង ក្រោមហេតុផលរបស់រដ្ឋាភិបាលថា ដើម្បីរក្សានិងការពារនូវសន្តិសុខ អំឡុង​ពេល​បើក​ការស៊ើបអង្កេត ករណីហិង្សានៅផ្លូវវ៉េងស្រេង។

ទោះយ៉ាងណាក៏ដោយ ការស៊ើបអង្កេតចប់ឬមិនទាន់ចប់ ក្រៅពីការសន្យាកន្លងមករបស់ខ្លួន រដ្ឋាភិបាលកម្ពុជា​មិន​ដែលបានបង្ហាញពីជំហរ ឬសកម្មភាពពិត ក្នុងការដោះស្រាយរឿងនោះ នៅឡើយទេ។ ជាងនេះទៅទៀត ពី ជនជាប់​ចោទដោយក្រុមសមត្ថកិច្ចចម្រុះចាប់ខ្លួន កាលពីថ្ងៃទី២-៣ ខែមករានោះ ត្រូវបានតុលាការធ្វើការដោះលែង​ហើយ​ កាលពីថ្ងៃទី៣០ ខែឧសភា កន្លងមកនេះ មានន័យស្មើនឹងសំនុំរឿងថ្ងៃទី២-៣ ខែមករា ត្រូវបានបញ្ចប់សឹងតែរួចរាល់​ហើយ។ តែដោយឡែកទីលានប្រជាធិបតេយ្យ នៅតែជាប់ឃុំ ហ៊ុំព័ទ្ធដោយបន្លាលួស និងរនាំងដែកដដែល៕