មហាវីរក្សត្រ​ចូល​ទី​វង្គត់​ក្នុង​ព្រះជន្ម ៨៩​ព្រះ​វស្សា បើ​តាម​បស្ចឹម​លោក

ខុសពីការប្រកាសជាផ្លូវការ ក្នុងប្រទេសកម្ពុជា ដែលអះអាងថា អង្គអតីតព្រះមហាវីរក្សត្រ ព្រះបាទ នរោត្ដម សីហនុ សោយទីវង្គត់នៅព្រះជន្នាយុ ៩០ ព្រះវស្សានោះ សម្រាប់បស្ចឹមលោកវិញ បានរាប់ថា អតីតព្រះមហាក្សត្រដ៏​ល្បី​ល្បាញ បានចូលទីវង្គត់នៅត្រឹមតែព្រះជន្នា ៨៩ ព្រះវស្សាប៉ុណ្ណោះ ដែលតិចជាងការប្រកាសក្នុង​ប្រទេសកម្ពុជា​១ឆ្នាំ។ ខាងក្រោមនេះ ជាការបកស្រាយឲ្យឃើញ ថាហេតុអ្វី?
Loading...
  • ដោយ: ដ. កែវ ដោយ ដ. កែវ (ទាក់ទង៖ [email protected]) - ប៉ារីស ថ្ងៃទី១១ កក្កដា ២០១៤
  • កែប្រែចុងក្រោយ: October 15, 2014
  • ប្រធានបទ:
  • អត្ថបទ: មានបញ្ហា?
  • មតិ-យោបល់

អាយុ - និយាយឲ្យខ្លី នោះគឺ​ដោយ​សារ​តែ​ការ​ប្រកាន់ នូវ​ភាព​ប្រាកដ​និយម (ឬ​ផ្នត់​គំនិត) មាន​ភាព​ផ្ទុយ​ស្រឡះ​ពី​គ្នា រវាង​សាសន៍​នា​នា នៅ​ទ្វីប​អាស៊ី​ខាង​កើត និង​បណ្ដា​សាសន៍ នៅ​បស្ចឹម​លោក។ ខាង​ក្រោម​នេះ​ជា​ការ​បក​​ស្រាយ របស់​លោក កែវ មានិត សាស្ត្រាចារ្យ​សង្គម​វិទ្យា​ដើម​កំណើត​ខ្មែរ​មួយ​រូប ដែល​កំពុង​រស់នៅ​ក្នុង​ប្រទេស​បារាំង ហើយ​​បាន​សិក្សា​ពី​ករណី​អាយុ របស់​ជន​ជាតិ​ខ្មែរ និង​ការ​រាប់​អាយុ​របស់​ជន​ជាតិ​ច្រមុះ​ស្រួច នៅ​លោក​ខាង​លិច។

ការរាប់អាយុរបស់ខ្មែរ ជា​ការ​រាប់​តាម​បែប ចូល​ឆ្នាំ​ទី​ប៉ុន្មាន។ ឧទាហរណ៍​ថា បើ​មាន​គេ​សួរ អូន​អាយុ​ប៉ុន្មាន​ហើយ? មនុស្ស​នឹង​ឆ្លើយ​ថា ខ្ញុំ​មាន​អាយុ​១៨​ឆ្នាំ​ហើយ។ ការ​ឆ្លើយ​នេះ ឆ្លុះ​បញ្ចាំង​ពី​ការ​រាប់​អាយុ ថា​ខ្លួន​ចូល​ក្នុង​ឆ្នាំ​ទី១៨​ហើយ ប៉ុន្តែ​មិន​មែន​ជា​ការ​រាប់ តាម​បែប​បង្គ្រប់​អាយុ ឲ្យ​គ្រប់ ៣៦៥ថ្ងៃ ទើប​បាន​មួយ​​ឆ្នាំ​នោះ​ឡើយ។ ការ​រាប់​របៀប​នេះ មាន​​ន័យ​ថា ទារក​កើត​មក​ភ្លាម ចូល​ឆ្នាំ​ទី១ ស្រាប់​តែ​គ្នា​មាន​អាយុ​បាន​១ឆ្នាំ​ភ្លាម​តែ​ម្ដង។ ការ​រាប់​របៀប​នេះ ខុស​ពី​ការ​រាប់​​របស់​​សាសន៍​នានា ដែល​រស់​នៅ​លោក​ខាង​លិច។

ក្រុមប្រទេសបស្ចឹមលោក ដែលច្រើនគិតគូរច្បាស់លាស់ តាមច្បាប់ទម្លាប់ និងតាមបែបវិទ្យាសាស្ត្រនោះ បាន​គិត​ថា មនុស្សកើតមក ទាល់តែគម្រប់៣៦៥ថ្ងៃ ទើបមានអាយុ១ឆ្នាំ។ បើមនុស្សនោះមានអាយុ៥ឆ្នាំ និង​៣ខែ គេនៅមិនទាន់​រាប់ថាមានអាយុ៦ឆ្នាំនៅឡើយ តែបានន័យថាមនុស្សនោះ មានអាយុគិតជាថ្ងៃ៖ ៣៦៥ថ្ងៃX៥ បូកថែមនឹង ៣០ថ្ងៃX៣ ស្មើនឹង ១៩១៥ថ្ងៃ។ បើគេរាប់តាមរបៀបខ្មែរ ដែលគិតថា មនុស្ស​នោះ​មាន​អាយុ​៦ឆ្នាំ​ទៅហើយនោះ បានន័យថា​បើ​គិតជាថ្ងៃ៖ ៣៦៥ថ្ងៃ X ៦ ស្មើនឹង ២១៩០ថ្ងៃ ដែលខុសពីការពិត ព្រោះ​មនុស្ស​នេះ​ទើបនឹងរស់មកដល់ពេលនេះ តែ​ត្រឹម ១៩១៥ថ្ងៃប៉ុណ្ណោះ។

ករណីអាយុនេះ ត្រូវបានអនុវត្តយ៉ាងខ្ជាប់ខ្ជួន នៅក្នុងប្រព័ន្ធច្បាប់ទម្លាប់នៃប្រទេសនានា នៅអ៊ឺរ៉ុប ឬនៅ​អាមេរិក ព្រោះបើច្បាប់កំណត់ត្រឹមអាយុ១៨ឆ្នាំឡើង ជាអាយុដែលត្រូវមានការទទួលខុសត្រូវខ្លួនឯង និង​ត្រូវ​ជាប់​ពន្ធនាគារ​នោះ តែបើនៅខ្វះតែ១ថ្ងៃ តុលាការឬនគរបាលគ្មានសិទ្ធិនឹងចាប់ជននោះ មក​ផ្ដន្ទាទោស​ទណ្ឌឡើយ។ បើ​តុលាការ​ឬនគរបាលមិនចេះរាប់អាយុ ហើយប្រព្រឹត្តិអំពើដោយជ្រុលជ្រោះនោះ ជនមិន​ទាន់​គ្រប់អាយុនេះ អាចប្ដឹង​ទាម​ទារ​ឲ្យគេគោរពអាយុរបស់ខ្លួនឡើងវិញ និងអាចប្ដឹងវាយបកពីការរំលោភ​ច្បាប់ របស់មន្ត្រីតុលាការ ឬនគរបាលនោះ​ថែមទៀត។

ដូច្នេះ អង្គអតីតព្រះមហាក្សត្រ ទ្រង់ប្រសូតនៅថ្ងៃទី៣១ ខែតុលា ឆ្នាំ១៩២២ និងបានសោយទីវង្គត់ នៅថ្ងៃ​ទី១៧ ខែ​តុលា ឆ្នាំ២០១២ ដែលបើតាមការរាប់របស់លោកខាងលិច ទាល់តែទ្រង់យាងមកដល់ ថ្ងៃទី៣១ ខែ​តុលា ឆ្នាំ២០១២​វិញ ទើបទ្រង់មានព្រះជន្នាយុ ៩០ព្រះវស្សា។ តែនេះនៅខ្វះ១៤ថ្ងៃទៀតឯណោះ បានន័យ​ថា​ទ្រង់ទើប​នឹងមាន​ព្រះ​ជន្នាយុ ៨៩ឆ្នាំ ១១ខែ និង១៧ថ្ងៃ នៅឡើយ។ លោកអ្នកអាចចូលទៅកាន់ទំព័រ Wikipedia ដែលថ្លែងសរសេរ​ពី​អតីតព្រះមហាវីរក្សត្រ (នៅគ្រប់ភាសា) ក៏បានបញ្ជាក់ច្បាស់ដែរ ថា​ព្រះអង្គ​មានព្រះជន្មត្រឹម៨៩ឆ្នាំ ប៉ុណ្ណោះ។

ទម្លាប់មួយទៀតក្នុងសង្គមខ្មែរ គឺការចូលចិត្តបញ្ជើចលើកសរសើរ ដោយចូលចិត្តឲ្យពរគ្នាថា «សូមឲ្យអាយុ​វែង»។ ដូច្នេះការរុញព្រះជន្មាយុ ឲ្យដល់៩០ព្រះវស្សានេះ ត្រូវបានគណនាដូចការរៀបរាប់ខាងលើផង និង​ក្នុងន័យថា ព្រះ​អង្គមានព្រះជន្មយឺន​យូរណាស់ រហូតដល់«ជាង»៩០ព្រះវស្សានោះផង។ ប៉ុន្តែសួរថា ហេតុអ្វី​បង្កើនអាយុឲ្យ​គ្នា​ចាស់ជាងចំនួនថ្ងៃ ដែលបានឆ្លងកាត់ពិតប្រាកដទៅវិញ? តាមពិតទៅ ជាតិសាសន៍ណា​ក៏​ដោយ សុទ្ធមិនចង់​ចាស់​ជាងអាយុ។ ដូច្នេះយើងគួរងាកមករកការពិត និងការរាប់អាយុ ប្រកបដោយ​វិទ្យាសាស្ត្រ​វិញ ប្រសើរជាការបញ្ចើច​បញ្ចើរគ្នា ឲ្យឆាប់ចាស់៕

Loading...

អត្ថបទទាក់ទង


មតិ-យោបល់


ប្រិយមិត្ត ជាទីមេត្រី,

លោកអ្នកកំពុងពិគ្រោះគេហទំព័រ ARCHIVE.MONOROOM.info ដែលជាសំណៅឯកសារ របស់ទស្សនាវដ្ដីមនោរម្យ.អាំងហ្វូ។ ដើម្បីការផ្សាយជាទៀងទាត់ សូមចូលទៅកាន់​គេហទំព័រ MONOROOM.info ដែលត្រូវបានរៀបចំដាក់ជូន ជាថ្មី និងមានសភាពប្រសើរជាងមុន។

លោកអ្នកអាចផ្ដល់ព័ត៌មាន ដែលកើតមាន នៅជុំវិញលោកអ្នក ដោយទាក់ទងមកទស្សនាវដ្ដី តាមរយៈ៖
» ទូរស័ព្ទ៖ + 33 (0) 98 06 98 909
» មែល៖ [email protected]
» សារលើហ្វេសប៊ុក៖ MONOROOM.info

រក្សាភាពសម្ងាត់ជូនលោកអ្នក ជាក្រមសីលធម៌-​វិជ្ជាជីវៈ​របស់យើង។ មនោរម្យ.អាំងហ្វូ នៅទីនេះ ជិតអ្នក ដោយសារអ្នក និងដើម្បីអ្នក !
Loading...