ផ្សារទំនើបខ្នាតអន្តរជាតិ ដែលជាការវិនិយោគរបស់ជប៉ុន ដែលធ្វើបានទាក់ទាញចំណាប់អារម្មណ៍ ប្រជាជន​នៅ​ភ្នំពេញ បានបើកសម្ភោធជាផ្លូវការនៅក្នុងថ្ងៃនេះ។

ផ្សារទំនើប អ៊ីអន ម៉ល មើលពីក្រៅ។ (រូបថត ហ្វេសប៊ុក)

ផ្សារទំនើប - ក្រោយពីបើកដំណើរការសាកល្បង បានជាងមួយសប្តាហ៍រួចមក ផ្សារទំនើប អ៊ីអន ម៉ល ដែលជាផ្សារ​ទំនើប ធំជាងគេបំផុតនៅកម្ពុជាសម្រាប់ពេលបច្ចុប្បន្ន ត្រូវបានសម្ពោធដាក់ដំណើរការ ជាផ្លូវការហើយនៅថ្ងៃទី៣០ ខែមិថុនា ឆ្នាំ២០១៤នេះ។

ក្នុងការបើកសម្ភោធជាផ្លូវការនេះដែរ ក្រោមអធិបតីភាពលោក នាយករដ្ឋមន្ត្រី ហ៊ុន សែន និងលោក ហ្វូមីអូ គីស៊ីដា រដ្ឋមន្ត្រីការបរទេសជប៉ុន។ ផ្សារទំនើប អ៊ីអន ម៉ល ជាផ្សាររបស់ជប៉ុនដំបូងបំផុតនៅកម្ពុជា ដែលបានបើកការដ្ឋាន​សាងសង់ កាលពីខែធ្នូ ឆ្នាំ២០១២ ក្នុងទឹកប្រាក់វិនិយោគប្រមាណ ២០០លានដុល្លារអាមេរិក។

ក្នុងផ្សារទាំងមូលមានហាងលក់ទំនិញ ភោជនីយដ្ឋាន និងកន្លែងកម្សាន្តផ្សេងៗប្រមាណ ជិត ២០០ និងមាន​ភោជនីយដ្ឋាន​អាហារចម្រុះជាតិសាសន៍ ហាងកាហ្វេ ហាងលក់សម្លៀកបំពាក់ម៉ាកល្បីៗមកពីប្រទេសជប៉ុន និង​ប្រទេសផ្សេងៗទៀត ហើយក៏មានកន្លែងកម្សាន្តជាច្រើនដូចជា កន្លែងកំសាន្តសម្រាប់កុមារ កន្លែងបោះបូលីង (Bowling) កន្លែងជិះស្គីលើទឹកកក (Ice Skating) រោងកុនខ្នាតធំចំនួន ៧ Screen ព្រមទាំងហាងលក់ផលិតផល​រក្សាសម្ផស្ស ហាងអ៊ុតសក់ និងរចនាម៉ូដក្រចកជាដើម។ ក្រៅពីនេះ នៅមានស្ថានីយទូរទស្សន៍ និងកន្លែងផ្ដល់​សេវាកម្មផ្សេងៗជាច្រើនទៀត។

អគ្គនាយកក្រុមហ៊ុន អ៊ីអន ម៉ល (ខេមបូឌា) ខូ អិលធីឌី លោក ម៉ាកូតុ យ៉ាជីម៉ា (Makoto Yajima) ធ្លាប់បញ្ជាក់ប្រាប់​សារព័ត៌មានក្នុងស្រុកមួយថា មូលហេតុដែលលោក ដាក់វិនិយោគនៅកម្ពុជា ដោយសារតែជប៉ុន​មាន​ទំនាក់ទំនង​យូរអង្វែង ជាមួយកម្ពុជា។ ម្យ៉ាងទៀតក្រុមហ៊ុន អ៊ីអន ម៉ល បានសង្កេតមើលពីការផ្លាស់ប្ដូរនៅកម្ពុជា និងភាពរីក​ចម្រើនជាវិជ្ជមាន ជាពិសេសកំណើនសេដ្ឋកិច្ចកម្ពុជា ដូច្នេះហើយបានជានៅឆ្នាំ២០១១ ក្រុមហ៊ុនមកវិនិយោគនៅ​កម្ពុជា។

លោកបានឱ្យដឹងទៀតថា ផ្សារទំនើបលំដាប់ថ្នាក់អន្តរជាតិមួយនេះ ជាផ្សារពិសេសជាងគេ នាំមកនូវអ្វីថ្មីៗ និងប្លែក​សម្រាប់អតិថិជន។ ឧទាហរណ៍ដូចជាហាងលក់សម្លៀកបំពាក់ ភោជនីយដ្ឋាន និងកន្លែងកម្សាន្តផ្សេងៗ គឺមាន​លក្ខណៈខុសប្លែកពីផ្សារទំនើបដទៃទៀត ដែលធ្លាប់មាននៅក្នុងប្រទេស កម្ពុជានាពេលកន្លងមក មិនថាការរចនា​ក្នុងហាង ឬការផ្តល់សេវាកម្មនោះឡើយ៕