រឿងដ៏កម្រមួយ បានបង្កើតឲ្យមានការនិយាយតៗគ្នា នៅក្នុងទីក្រុងតូចមួយនៅភាគខាងជើង នៃប្រទេសបារាំង។ សត្វឆ្កែមួយក្បាល ចេះរើសកំប៉ុង ឬសំបកដប ដែលមនុស្សគ្រវាត់ចោលនៅតាមដងផ្លូវ ហើយយកទៅទម្លាក់ចោល​ក្នុងធុងសម្រាម។

ពាំកំប៉ុងដែលគេបោះចោល មកដាក់ក្នុងធុងសម្រាម។ (រូបថតផ្តិតពីវីដេអូ)

ពីនេះពីនោះ - សារព័ត៌មាន «សម្លេងពីខាងជើង (La Voix du Nord)» របស់បារាំង បានធ្វើសេចក្ដីរាយការណ៍ អម​ដោយវីដេអូ នៅខាងក្រោម ពីករណីដ៏ពិសេសមួយ ដែលកម្រនឹងបានជួប មកបញ្ជាក់ថាបើសូម្បីតែឆ្កែ ក៏វាមាន​មាយាទ​របស់វាដែរ ប្រសិនជាគេបង្ហាត់បង្ហាញវានោះ។

រឿងបានចាប់ផ្ដើមពីប្រអប់ទឹកដោះគោខាប់ ដែលឆ្កែមួយក្បាលឈ្មោះ ណូក (Nouck) នេះ ចូលចិត្តបរិភោគដូច​មនុស្សអញ្ចឹងដែរ។ ដោយសារតែហេតុនេះ ទើបម្ចាស់វា លោក ក្លូដ រ៉ូក (Claude Rocq) អាយុ៧៤ឆ្នាំ រស់នៅក្នុង​ទីក្រុង ប៉ាឌឺកាឡេ (Pas De Calais) បានទុកនូវរាល់ប្រអប់ទឹកដោះគោខាប់ទាំងឡាយ ដែលគាត់ទទួលទាននៅ​សល់​ខ្លះ ដើម្បី​ឲ្យ​ឆ្កែរបស់គាត់លិតបង្ហើយ ហើយគាត់បានបង្រៀនវា ឲ្យចេះយកទៅដាក់ក្នុងធុងសម្រាម។

តាំងពីពេលនោះមក សុនខដែលមានអាយុ៧ឆ្នាំមួយក្បាលនេះ ទំនងជាសប្បាយចិត្តនឹងទង្វើដ៏ប្រសើរនេះ វាមិនបាន​នៅធ្វើត្រឹមតែប្រអប់ទឹកដោះគោខាប់នោះទេ តែថែមទាំងបានដើរប្រមូលទាំងអ្វីៗ ដែលធ្លាក់នៅតាមដងផ្លូវ ហើយ​យក​ទៅទម្លាក់ដាក់ក្នុងធុងសម្រាម។ នៅចំពោះអ្នកយកព័ត៌មានរបស់ «សម្លេងពីខាងជើង» សត្វឆ្កែដ៏ឆ្លាតវៃ បានដើរ​ទៅ​រើសកំប៉ុងទឺកក្រូច ទទេមួយយកមកទម្លាក់ចោល នៅក្នុងធុងសម្រាមសាធារណៈ ធ្វើបែបព្រងើយ។ បើសូម្បីតែឆ្កែ ក៏ចេះអញ្ចឹងហើយ រួចចុះមនុស្សមួយចំនួន ម៉េចក៏ពិបាកម្លេះ?

សូមទស្សនាវីដេអូ៖