បន្ទាប់ការបណ្តេញចេញ ពីតំបន់ផ្លូវរថភ្លើង នៃសហគមន៍បឹងកក់ ក្រោមគម្រោងអភិវឌ្ឍន៍ របស់រាជរដ្ឋាភិបាលកម្ពុជា សហការជាមួយនឹង ធនាគារអភិវឌ្ឍន៍អាស៊ី(ADB) បានជម្លៀសប្រជាពលរដ្ឋ ពីកណ្តាលរាជធានីភ្នំពេញ ទៅទម្លាក់ ចោលនៅតំបន់នានាជាយរាជធានី ភ្នំពេញ។

កុមារី ពៅ វល័ក្ខ តំណាងជនរងគ្រោះវ័យក្មេង ដោយការបណ្ដេញចេញ។ (រូបថត MONOROOM.info/ S. Tith)

បញ្ហាសង្គម - ការរស់នៅជាមួយនឹងភាពខ្វះខាតទាំងទឹក ទាំងភ្លើង ក្រោមបរិយាកាសនៃបរិស្ថានមិនល្អ សាលារៀន​នៅឆ្ងាយ និងគ្មានមន្ទីរពេទ្យជាដើម។ បញ្ហាជីវភាព នៃប្រជាពលរដ្ឋដែលត្រូវបានរាជរដ្ឋាភិបាលជម្លៀសទាំងនោះ បានត្អូញត្អែពីការរកមុខរបរចិញ្ចឹមជីវិត ព្រោះតែភាពទីទាល់ក្រ និងផ្សារនៅឆ្ងាយពីលំនៅដ្ឋាន។ កត្តាទាំងនេះ បាន​បង្ខំ​ឲ្យគ្រួសារមួយចំនួន បានសម្រេចចិត្តបញ្ឈប់ការសិក្សារបស់កូន ដើម្បីជួយដោះស្រាយ និងភាពតានតឹងនៃ​ជីវភាព​រស់នៅប្រចាំថ្ងៃ ដូចជាជួយធ្វើការផ្ទះ ចាំផ្ទះ និងមើលប្អូនៗ និងដើរើសអេតចាយជាដើម។

បញ្ហានេះត្រូវបានបង្ហាញដោយ កុមារមួយចំនួន ដែលបានមកចូលរួមទាមទានូវសិទ្ធិលំនៅដ្ឋាន និងបញ្ហាដីធ្លីនៅ​មុខ​ធនាគារអភិវឌ្ឍន៍អាស៊ី កាលពីព្រឹកថ្ងៃទី១៦ ខែមិថុនានេះ។ បញ្ហាដែលប្លែកខុសពីសព្វមួយដង ការដាក់ញ្ញាតិនេះ មានវត្តមានកុមារជាច្រើនរូបបានចូលរួម។

កុមារី ពៅ វល័ក្ខ អាយុ១២ ឆ្នាំ រៀនថ្នាក់ទី៦ នៅសាលារៀនទួលសង្កែ បានផ្តល់កិច្ចសម្ភាស​ជាមួយទស្សនាវដ្តី​មនោរម្យ.អាំងហ្វូថា ពាក់ព័ន្ធកង្វះខាតក្នុងបញ្ហាជីវភាព បញ្ហាលំនៅដ្ឋាន និងបញ្ហាសាលារៀន។ កុមារីរូបនេះ បាន​សំណូមពរដល់រដ្ឋាភិបាល ក៏ដូចជាធនាគាអភិវឌ្ឍន័អាស៊ី យកចិត្តទុកដាក់ ចំពោះការរស់នៅរបស់កុមារក្រោយ​ការបណ្តេញចេញនោះផង។

សូមស្តាប់ និងទស្សនានូវកិច្ចសម្ភាសជាមួយកុមារី ពៅ វល័ក្ខ ដូចតទៅ៖

បានចូលរួមក្នុងការដាក់ញ្ញាត្តិនាព្រឹកនេះដែរ កុមារា សាន សត្យា អាយុ១២ឆ្នាំ មិនបានចូលរៀនដូចមុន ឬដូចក្មេងៗ​ដទៃទៀតឡើយ ព្រោះតែកង្វះបញ្ហាជីវភាព កំព្រាឪពុក រស់នៅជាមួយម្តាយ និងបងប្អូនតូចៗបួននាក់។ កុមារារូប​នេះ​បានបន្តថា សព្វថ្ងៃព្រោះតែជួយម្តាយ ខ្លួនត្រូវចេញដើររើសអេតចាយ ដើម្បីបានលុយកាក់ខ្លះជួយដោះបន្ទុកម្តាយ។

សូមស្តាប់ និងទស្សនានូវកិច្ចសម្ភាសជាមួយកុមារា សាន សត្យា ដូចតទៅ៖

សូមរំលឹកថា ក្នុងរយៈពេលប៉ុន្មានឆ្នាំនេះ ពលរដ្ឋកម្ពុជាប្រមាណជា៤០០០គ្រួសារ ដែលក្នុងនោះ ភាគច្រើន ជាអ្នក​ដែលមានជីវភាពក្រីក្របំផុត ត្រូវបានគេដេញចេញដោយ បង្ខំសម្រាប់យកទីតាំងនេះ ដើម្បីអភិវឌ្ឍផ្លូវរថភ្លើង។ គម្រោង​អភិវឌ្ឍន៍ផ្លូវរទេះភ្លើងនៅកម្ពុជា ADB និង រាជរដ្ឋាភិបាលកម្ពុជា បានដោះស្រាយគោលនយោបាយ ដល់​ប្រជាពលរដ្ឋ ដែលរស់នៅក្បែរផ្លូវរទេះភ្លើង ក្នុងមួយគ្រួសារៗទទួលបានលុយ៥០០ដុល្លារ និងដីឡូត៍សម្រាប់សង់​លំនៅដ្ឋានមួយកន្លែង ប៉ុន្តែគោលនយោបាយនេះ អ្នកភូមិភាគតិចណាស់ដែលបានទទួលយក និង ភាគច្រើន មិន​ព្រម៕