ឆ្លើយតបនឹងហានិភ័យ ដែលអាចកើតឡើងជាយថាហេតុ ក្រសួងធនធានទឹក និងឧតុនិយម បានព្រមានដល់ប្រជា​កសិករដែលមានផលដំណាំតាមមាត់ទន្លេ គប្បីប្រមូលផលឲ្យបានឆាប់ ដើម្បីជៀសវៀងមហន្តរាយទឹកជំនន់ ដែល​អាចបង្កការខូចខាតដល់ផលដំណាំជាប់មាត់ទន្លេ។

ទឹកជំនន់ល្ហាចល្ហឹម នៅតាមបណ្ដោយផ្លូវជាតិលេខ៦ ឆ្ពោះទៅកាន់ខេត្តកំពង់ចាម នៅថ្ងៃទី០៣ខែតុលា ឆ្នាំ២០១៣។ (រូបថត MONOROOM.info/ O. Vary)

គ្រោះធម្មជាតិ - ក្រសួងធនធានទឹក និងឧតុនិមយ បានឲ្យដឹងថា បន្ទាប់ពីខ្លួនតាមដានស្ថានភាពអាកាសធាតុ និង​ស្ថានភាពទឹកទន្លេមេគង្គរួចមក ក្រសួងធនធានទឹក និងឧតុនិយម វាយតម្លៃថា ឥទ្ធិពលរបស់ជ្រលងសម្ពាធទាប និង​បង្កឲ្យមានភ្លៀងធ្លាក់ច្រើន ជាបន្តបន្ទាប់នៅប្រទេសកម្ពុជា ពិសេសក្នុងអាងទន្លេងមេគង្គ នៅប្រទេសថៃ និងឡាវ។

បើតាមសេចក្តីជូនដំណឹងរបស់ក្រសួងធនធានទឹក និងឧតុនិយម ដែលផ្សាយឲ្យដឹងនៅថ្ងៃទី២៥ ខែមិថុនា ឆ្នាំ២០១៤ បានលើកឡើងថា នៅពេលស្ថានភាពភ្លៀងធ្លាក់ច្រើន កើតឡើង វានឹងបណ្តាលឲ្យ កំពស់ទឹកទន្លេមេគង្គ ទន្លេសាប ទន្លេបាសាក់ និងកំពស់ទឹកបឹងទន្លេសាប ចាប់ផ្តើមហក់ឡើងខ្ពស់ជាបន្តបន្ទាប់ តែក្នុងរយៈពេលពី៤ ទៅ៥ថ្ងៃ​ប៉ុណ្ណោះ។

សេចក្តីជូនដំណឹងដដែលនោះ បានសង្កត់ធ្ងន់ថា៖ «ទឹកនឹងអាចហូរចូលតំបន់​ទំនាបមួយចំនួន ដែលស្ថិតនៅតាមដង​ទន្លេទាំងនោះ ធ្វើឲ្យលិច និងប៉ះពាល់ដល់ផលដំណាំកសិផល របស់ប្រជាពលរដ្ឋដែលនៅជាប់តំបន់ទាំងនោះ។»

នៅចំពោះមុខបញ្ហានេះ អាជ្ញាធរដែនដី និងប្រជាពលរដ្ឋដែលរស់នៅតាមមាត់ទន្លេ ចាំបាច់ត្រូវរស់រាន់មានវិធានការ​ប្រមូលកសិផលឲ្យបានទាន់ពេលវេលា ហើយថាបើទោះពេលនោះទឹកជំនន់មិនទាន់ឡើងខ្ពស់ខ្លាំងក្តី ប៉ុន្តែចរន្តទឹក និងល្បឿនទឹកប្រាកដជាចាប់ផ្តើមប្រែប្រួល។ ដូច្នេះពលរដ្ឋ គម្បីមានការប្រុងប្រយ័ត្នខ្ពស់ ចំពោះបញ្ហាដែលអាច​នឹង​កើតឡើងភ្លាមៗ។ នេះជាការបញ្ជាក់របស់ក្រសួងធនធានទឹក និងឧតុនិយម៕