«អភិវឌ្ឍន៍បៃតង» ដូចជាការដាំដុះបន្លែ កូនឈើ ការកាត់បន្ថយនូវឧស្ម័នពុល និងការរួមសហការ​ជាមួយ​ប្រជា​ពលរដ្ឋ​​ទាំងអស់គ្នា ធ្វើយ៉ាងណា ដើម្បីឲ្យមានប្រព័ន្ធនៃការអភិវឌ្ឍន៍បៃតងនៅកម្ពុជា។ នេះជាគម្រោងរបស់​រដ្ឋាភិបាលកម្ពុជា ដែលបានរៀបចំឲ្យមាន នូវគណកម្មការជាតិមួយ រួមនឹងអគ្គលេខាធិការដ្ឋានផង ដាក់​ឈ្មោះ​ថា​«អភិវឌ្ឍន៍បៃតង»។ ប៉ុន្តែការព្រួយបារម្ភនៅតែមាន ប្រសិនណាការកាប់ព្រៃឈើ និងការលប់បឹង​ធម្មជាតិ​មួយចំនួន នៅតែត្រូវបានធ្វើយ៉ាងអាណាធិបតេយ្យ គ្មានការត្រួតពិនិត្យនោះ។

សិក្ខាសាលាស្តីពីការអភិវឌ្ឍន៍បៃតង កាលានុវត្តភាព និងបញ្ហាប្រឈម ដែលរៀបចំដោយវេទិការនៃអង្គការ​មិន​មែន​រដ្ឋាភិបាលស្តីពីកម្ពុជា នៅសណ្ឋាគារកាំបូឌីយ៉ាណា កាលពីថ្ងៃទី៥ ខែធ្នូ ឆ្នាំ២០១៣។ (រូបថត MONOROOM.info/ O.Vary)

តំបន់បៃតង - ក្នុងសិក្ខាសាលាណែនាំស្តីពី«ការអភិវឌ្ឍន៍បៃតង កាលានុវត្តភាព និងបញ្ហាប្រឈម» ដដែល ដែល​រៀបចំដោយវេទិការនៃអង្គការមិនមែនរដ្ឋាភិបាលស្តីពីកម្ពុជា លោក ឈិត សំអាត នាយកប្រតិបត្តិអង្គការនេះ បាន​ពន្យល់ថា៖ «កម្ពុជា ជាប្រទេសមួយនៃបណ្តាប្រទេស ដែលងាយនឹងរងគ្រោះពីការប្រែប្រួលអាកាសធាតុ។ (…) កម្ពុជាត្រូវគិតគូជាយុត្តិសាសន៍ ពីរបៀបបញ្ជ្រាប (ដាក់ឲ្យជ្រួតជ្រាប) គោលនយោបាយអភិវឌ្ឍន៍បៃតង ទៅក្នុង​យុត្តិសាស្រ្តអភិវឌ្ឍន៍ជាតិ។» លោក ឈិត សំអាត បានបន្ថែមទៀតថា «ការអភិវឌ្ឍន៍បៃតងនៅកម្ពុជា ជាការ​ដោះ​ស្រាយនូវបញ្ហាប្រឈម នឹងការអភិវឌ្ឍន៍នាពេលបច្ចុប្បន្ន តាមរយៈការអនុវត្តសកម្មភាព ជាយុត្តិសាស្រ្តផ្សេងៗ ដែលមិននាំឲ្យកម្ពុជា បាត់បង់នូវធនធានធម្មជាតិ ប៉ះពាល់ដល់បរិស្ថាន ខាងបង់សេដ្ឋកិច្ចនិងសង្គម និងការធានា​នូវការអភិវឌ្ឍន៍ប្រកបដោយនិរន្តរភាព។»

លោក យិន គិមស៊ាង រដ្ឋលេខាធិការក្រសួងបរិស្ថាន ដែលមានវត្តមាននៅក្នុងសិក្ខាសាលានោះដែរ បានថ្លែងថា «ការយកចិត្តទុកដាក់ ចំពោះការអភិវឌ្ឍន៏តំបន់បៃតង មានសារៈសំខាន់ចំពោះកម្ពុជាខ្លួនផង និងសម្រាប់​ពិភពលោកទាំងមូលផង»។ ដោយហេតុនេះហើយ ទើបរដ្ឋាភិបាលកម្ពុជាបានសម្រេច បង្កើតនូវក្រុមប្រឹក្សាជាតិ​អភិវឌ្ឍន៍បៃតងថ្មី កាលពីថ្ងៃទី៨ ខែមករា ឆ្នាំ២០១៣ ក្នុងការជួយរៀបចំការអភិវឌ្ឍន៍តំបន់បៃតងនៅកម្ពុជា។ បើ​តាមលោក យិន គិមស៊ាង ដដែល ការបង្កើតនេះ ដោយសារតែបានមើលឃើញ ពីបញ្ហាប្រឈមមួយចំនូន​ទាក់ទងនឹងការយល់ដឹង និងការចូលរួមក្នុងការអភិវឌ្ឍន៍បៃតង រវាងស្ថាប័នថ្នាក់ជាតិ និងថ្នាក់ក្រោម ជាមួយនឹង​សាធារណៈជន ជាពិសេសបញ្ហាដែលជាប់ពាក់ព័ន្ធដ៏សំខាន់ៗមួយចំនួនទៀត។

តែយុត្តិសាស្រ្តរបស់រដ្ឋាភិបាល នៃការចូលរួមការអភិវឌ្ឍន៍តំបន់បៃតង ដែលបានលើកឡើងខាងលើដោយលោក យិន គិមស៊ាង នេះ ត្រូវបានប្រជាពលរដ្ឋ ក៏ដូចជាអង្គការសង្គមស៊ីវិលមួយចំនួន ដែលធ្វើការស្និតនឹងផ្នែកនេះ មើល​ឃើញថា មានការកាប់រានទន្រានដីព្រៃ ឬលប់បឹងធម្មជាតិ យ៉ាងអណាធិបតេយ្យពីសំណាក់ក្រុមហ៊ុនក្នុង និងក្រៅ​ស្រុក ក្រោមរូបភាពសម្បទានសេដ្ឋកិច្ចដីព្រៃនោះ តាំងពីមុននិងក្រោយការបោះឆ្នោត។ ការកាប់បំផ្លាញ​ទន្ទ្រាន បង្ហិនបង្ហោចទាំងនេះ ហាក់មិនមានវិធានការទប់ស្កាត់ណាមួយ ដែលមានប្រសិទ្ធិភាពពីរដ្ឋាភិបាលលោក ហ៊ុន សែន នៅឡើយទេ។

គេចពីការចោទសួររបស់អ្នកសារព័ត៌មាន?

បន្ទាប់ពីសំនួររបស់អ្នកសារព័ត៌មាន ដែលសួរថា តើការអភិវឌ្ឍន៍តំបន់បៃតង និងការទប់ស្កាត់ការកាប់ព្រៃឈើ​មួយ​ណាសំខាន់ជាង? លោករដ្ឋលេខាធិការក្រសួងបរិស្ថាន យិន គិមស៊ាង បែរជាបានបញ្ឈប់ការចោទ​សួររបស់​ក្រុម​អ្នកសារព័ត៌មាន ដោយបានឆ្លើយត្រឹមពាក្យយ៉ាងខ្លីថា «នាំគ្នាទប់ស្កាត់។ ធ្វើការរួមគ្នា។» (Sic)

ដោយឡែក លោក ឈិត សំអាត បានថ្លែងឆ្លើយទៅកាន់អ្នកសារព័ត៌មាន ទាក់ទងសំនួរដដែលថា ចំណុចទាំងពីរ​នេះត្រូវតែដើរទន្ទឹមគ្នា។ យ៉ាងណាក៏ដោយ ក៏ត្រូវមានការ«ទប់ស្គាត់» ជាជំហានទីមួយដែលត្រូវអនុវត្ត។ លោក​បន្តថា បញ្ហាខាងលើរដ្ឋាភិបាល ក៏បានឯកភាពជាមួយនឹងអង្គការសង្គមស៊ីវិលដែរថា នឹងមិនមានការបន្តរកាប់​បំផ្លាញព្រៃឈើតទៅទៀតនោះឡើយ។ ដូច្នេះការអនុវត្តច្បាប់ស្តីពីការទប់ស្កាត់ការកាប់ព្រៃឈើឲ្យពេញលេញ ព្រមទាំងចាប់អ្នកដែលបានប្រព្រឹត្តបទល្មើសមកផ្តន្ទាទោស ជារឿងដែលរដ្ឋាភិបាលត្រូវធ្វើ។ លោក ឈិត សំអាត បានបញ្ជាក់ថា «ទោះអភិវឌ្ឍន៍បៃតងប៉ុណ្ណាក៏ដោយ មិនអាចទប់ឈ្នះទេ ព្រោះតែការបំផ្លាញនេះវា ធំជាងការ​អភិវឌ្ឍន៍»៕

-----------------------------------
ដោយ៖ អ៊ុម វ៉ារី - ភ្នំពេញថ្ងៃទី៥ ខែធ្នូ ឆ្នាំ២០១៣
រក្សាសិទ្ធគ្រប់យ៉ាងដោយ៖ មនោរម្យព័ងអាំងហ្វូ