រឿង «2Brother (បងប្អូនប្រុស២នាក់)» គឺជាប្រភេទខ្នាតធំ សម្រាប់ចាក់នៅតាមរោងភាពយន្ត ដែលនាយពែកមី បាន​សហការជាមួយផលិតកម្មអ៊ិលឌី ភិកឈ័រ ក្នុងការផលិត។ ហើយខ្សែភាពយន្តនេះដែរ គឺជាខ្សែភាពយន្ដ​លើកទី១​របស់នាយពែកមី ដែលលោកជាអ្នកនិពន្ធផង អ្នកដឹកនាំរឿងដោយផ្ទាល់ផង និងជាតួសម្តែងដ៏សំខាន់ នៅក្នុង​រឿង​នេះផង។

លោក ពែកមី។ (រូបថត ហ្វេសប៊ុក)

ភាពយន្ត - ក្រោយពីទទួលជោគជ័យ លើអាជីពជាអ្នកកំប្លែង តារាចម្រៀង និងជាតារាសម្តែង ឥលូវនេះ តារាកំប្លែង​ដែលកំពុងមានប្រជាប្រិយភាព លោក ចែម ចាន់ដារ៉ា ហៅនាយ ពែកមី បានចាប់ផ្តើមអាជីពមួយទៀត៖ នោះគឺជា​អ្នក​ផលិតភាពយន្ត។ បច្ចុប្បន្ននេះតារាកំប្លែង ដែលប្រែក្លាយខ្លួន មកពីជាងសំណង់រូបនេះ កំពុងតែបោះទុនរកស៊ី ជាមួយ​ផលិតកម្មអ៊ិលឌី ភិកឈ័រ (LD Picture) ក្នុងការផលិតខ្សែភាពយន្ត ដោយគ្រោងចេញផ្លែផ្កា ក្នុងពេលឆាប់ៗនេះ។

ខ្សែភាពយន្តថ្មី ដែលគ្រោងនឹងចេញផ្លែផ្កាក្នុងពេលឆាប់ៗនេះ មានចំណងជើងថា «2brother» កំពុងត្រៀមរៀប​ក្រុង​ពាលី នៅថ្ងៃទី២១ ខែ មិថុនា ខាងមុខនេះ នៅផលិតកម្មអ៊ិលឌី ភិកឈ័រ។ ខ្សែភាពយន្ត លើកដំបូងរបស់ខ្លួននេះ គឺជា​ស្នាដៃនិពន្ធ និងដឹកនាំរឿងដោយលោក ពាក់មី ផ្ទាល់តែម្តង។ តួអង្គសំខាន់នៅក្នុងរឿងនេះ គឺលោក និងប្អូនប្រុស​របស់លោក នាយគ្រឿន និងរួមសម្តែងដោយតារាផ្សេង នៃសមាជិកមួយចំនួនទៀត ក្នុងក្រុមរបស់លោក។ ចំណែក​អត្ថន័យនៃសាច់រឿងនេះ មិនត្រូវបានតារាកំប្លែងប្រចាំស្ថានីយ៍ទូរទស្សស៊ីធីអ៊ិនរូបនេះ ទម្លាយឱ្យដឹងឡើយ ដោយទុក​ឱ្យទស្សនិកជន រងចាំតាមដានដោយខ្លួនឯង ពេលភាពយន្ដដាក់បញ្ចាំងនៅតាមរោង។

ក្នុងកិច្ចសម្ភាស ជាមួយទស្សនាវដ្ដីមនោរម្យ.អាំងហ្វូនៅថ្ងៃទី១៨ ខែមិថុនានេះ តារាកំប្លែងសំបូរវោហាស័ព្ទ​មិនចេះរីង​ស្ងួត នាយ ពែកមី បានឱ្យដឹងថា មូលហេតុដែលលោកចង់ផ្តើមអាជីពមួយទៀត ជាអ្នកផលិតភាពយន្ត ដោយសារ​លោកចង់ពង្រីកសមត្ថភាពផ្នែកផ្សេងទៀត ក្រៅអាជីពជាតារាកំប្លែង តារាចម្រៀងប៉ុណ្ណោះ។

ម្ចាស់បទ «ឱ្យប្រពន្ធស៊ីសៀង ឱ្យនាងស៊ីស៊ុប»រូបនេះ បានបង្ហាញមោទនភាព ជាមួយនឹងការចាប់ផ្តើម​អាជីពជា​ថៅកែ​កុនថា៖ «ធម្មតាយើងជាអ្នកនិពន្ធ ជាអ្នកធ្វើអ្វីមួយ តែងរំពឹងថានឹងទទួលបានជោគជ័យ ប៉ុន្តែការជោគជ័យមិនមែន​នៅលើយើងទេ និងនៅលើទស្សនិកជនជាអ្នកឱ្យតម្លៃ។ អ្នកធ្វើសុទ្ធតែមានឆន្ទៈ ថានឹងបានជោគជ័យហើយ បានជា​គេធ្វើ បើធ្វើមិនបានជោគជ័យ គេធ្វើនាំតែខាតអី?»៕