ប្រជាពលរដ្ឋមានទំនាស់ដីធ្លីខេត្តកំពង់ស្ពឺ ប្រមាណជាង៦០នាក់ តំណាងឲ្យប្រជាពលរដ្ឋជាង២៥០ គ្រួសារ មកពី​ស្រុក​ភ្នំស្រួច ខេត្តកំពង់ស្ពឺ ស្នើឲ្យសមាគមអាដហុកនៅភ្នំពេញជួយអន្តរាគមន៍ បន្ទាប់ពី«បរាជ័យ»​ជំនួនផ្នែកច្បាប់ ពីស្ថាប័នរដ្ឋាភិបាលទាំងថ្នាក់ក្រោមជាតិ រហូតដល់ថ្នាក់ជាតិ។

សន្និសីទកាសែត នៅទីស្នាក់ការសមាគមអាដហុក ថ្ងៃទី២៩ ខែឧសភា ឆ្នាំ២០១៤។ (រូបថត MONOROOM.info/ O. Vary)

សិទ្ធិលំនៅដ្ឋាន - នៅព្រឹកថ្ងៃទី២៩ ខែឧសភានេះ តំណាងប្រជាពលរដ្ឋមានទំនាស់ដីធ្លី បានមកប្រមូលផ្តុំគ្នា នៅទី​ស្នាក់ការធំរបស់សមាគមអាដហុកនៅភ្នំពេញជួយអន្តរាគមន៍ករណីទំនាស់ដីធ្លី តាំងពីឆ្នាំ២០០៥ ដែលត្រូវ​បាន​ក្រុមហ៊ុនម៉ាស្ទើរ (Master) រំលោភយក និងប្រើប្រាស់នូវកម្លាំងសន្តិសុខជាតិ វាយ បាញ់ ដែលបង្កឲ្យមានរបួសធ្ងន់ និងស្រាលជាង៣០នាក់។

ថ្លែងក្នុងសន្និសីទសារព័ត៌មាន នៅស្នាក់ការសមាគមអាដហុក ក្នុងរាជធានីភ្នំពេញព្រឹកនេះ តំណាងប្រជាពលរដ្ឋ​រង​គ្រោះដីធ្លី បានបង្ហាញនូវ«រូបភាព»ដីស្រែ និង«គល់ជ្រាំង» ដែលច្រូតរួច ក្នុងន័យថា ជា«ដីស្រែ» មិនមែនជា​«ព្រៃ​ស្រោង» ដូចដែលអាជ្ញាធរទាំងនោះលើកឡើងឡើយ។

ពួកគាត់បន្តថា ការលើកឡើងថា ដីស្រែទាំងនោះជាដីស្រោង របស់អាជ្ញាធរមូលដ្ឋាន ក៏ដូចជាភាគីពាក់ព័ន្ធ​មួយ​ចំនួនទៀត មានគោលបំណងតែមួយគត់ គឺលួចដីស្រែទាំងនោះ ទៅលក់ឲ្យក្រុបហ៊ុន ព្រោះតែភាពលោភលន់​របស់​ខ្លួន។

អ្នកមីង សុខ នីម ដែលជាតំណាងប្រជាពលរដ្ឋបានលើកឡើងថា ដំបូងឡើយការឈួសឆាយដីស្រែទាំងយប់នោះ ខាងក្រុមហ៊ុនបានប្រាប់ថា គ្រាន់តែសាកល្បងគ្រឿងចក្រទេ។ «ប្រជាពលរដ្ឋបានកាន់កាប់តាំងពីឆ្នាំ១៩៨៥ តរៀង​មក ហើយក៏បានស្ទួងស្រូវតាំងពីដើមមកដែរ ដែលមានរូបថតស្រាប់។ អ្វីដែលចំឡែកនោះ ក្រុមអាជ្ញាធរបែរ​ជា​លើក​ឡើងថា ដីនោះជាដីព្រៃល្បោះ ឬដីគម្របសត្វព្រៃទៅវិញ។ នេះជាមូលហេតុ ដែលនាំឲ្យប្រជាពលរដ្ឋបាត់បង់ដី។»

លោកតា គង់ សែម សាក្សីរស់ម្នាក់ ដែលបច្ចុប្បន្ននេះមានអាយុ៧៨ឆ្នាំ បានលើកឡើងថា ដីនេះ លោកតារួមនិង​អ្នកភូមិភាគច្រើន បានធ្វើ«ស្រែ»តាំងពីជំនាន់លោកតា ជំនាន់លោកយាយ របស់លោកតាមកម្លេះ មិនដែលលក់ ឬត្រូវបាត់បង់ទៅណានោះទេ។ ការលើកឡើងរបស់លោកតានេះ ចង់បង្ហាញឲ្យឃើញថា វាជាដីស្រែពិតប្រាកដ មិនមែនជាដីព្រៃល្បោះ ឬដីគម្របសត្វព្រៃ ដូចការលើកឡើងរបស់ក្រុមជំនាញនៃអាជ្ញាធរមូលដ្ឋាន ដែលបាន​លើក​ឡើងនោះឡើយ។

ចំណែកប្រធានផ្នែកស៊ើបអង្កេតសមាគមអាដហុកលោក នី ចរិយា ដែលទទួលពាក្កបណ្តឹងរបស់ប្រជាពលរដ្ឋ បាន​លើកឡើងថា លោករួមទាំងក្រុមការងារ នឹងចុះជួបជាមួយអាជ្ញាធរមូលដ្ឋាន ធ្វើការស្រាវជ្រាវនូវករណីនេះ ជាមួយ​នឹងជំនួយផ្នែកច្បាប់ ទៅដល់ប្រជាពលរដ្ឋរងគ្រោះដីធ្លីទាំងអស់នោះ។ ហើយលោកនឹងធ្វើការផ្សព្វផ្សាយបន្ត ជាមួយ​នឹងពាក្យបណ្តឹង ទៅកាន់ស្ថានប័នពាក់ព័ន្ធ ពិសេសរដ្ឋាភិបាលឲ្យបានដឹងលឺ ពីទំនាស់ដីធ្លីដ៏រាំរ៉ៃនេះ ដើម្បី​អន្តរាគម និងដោះស្រាយ។ «យោងតាមឯកសារដែលមាន ប្រជាពលរដ្ឋសុទ្ធតែមានសិទ្ធិទាំងអស់ ក្នុងការកាន់កាប់។ យើង​មានភស្តុតាងឯកសារជារូបភាព ទាំងសាក្សីរស់ដូចលោកអុំមានអាយុ ៧៨ឆ្នាំនេះ ដែលធ្លាប់ធ្វ់ស្រែចំការ​តាំងពី​ជំនាន់​ឪពុករបស់លោកមកម្លេះ មិនក្រោមពី១០០ឆ្នាំទេដែលបានកាន់កាប់។ (...) តាមច្បាប់ភូមិបាល​ ត្រូវតែឲ្យគាត់ដោយ​ស្វ័យប្រវត្តិ។»

ទស្សនាវដ្តីមនោរម្យ.អាំងហ្វូ មិនអាចទំនាក់ទំនង សុំការបំភ្លឺពីលោកមេឃុំតាំងសំរោងបានទេ។ តែតាមការអះអាង​របស់លោក នី ចរិយា បានលើកឡើងថា លោកមេឃុំតាំងសំរោងចាស់ បានបញ្ជាក់ថា ដីដែលមានទំនាស់​នោះបាន​«លួច»លក់ ទៅឲ្យក្រុមហ៊ុនមិនឲ្យប្រជាពលរដ្ឋដឹង តាំងពីឆ្នាំ២០០៥មកម្លះ។ «មានការធ្វើលិខិតស្នាម លួចលក់​តាំង​ពីឆ្នាំ២០០៥ និង២០០៦មកម្លេះ តែក្រុមហ៊ុនទើបតែធ្វើការឈូសឆាយក្នុងឆ្នាំ២០១០នេះទេ។»

ដោយឡែកក្រុមហ៊ុនម៉ាស្ទើរ ដែលប្រជាពលរដ្ឋចោទប្រកាន់នោះ ទស្សនាវដ្តីមនោរម្យ.អាំងហ្វូ មិនអាចទំនាក់ទំនង​បានឡើយក្នងថ្ងៃនេះ។ សេចក្តីជូនដំណឹង ដែលចេញដោយក្រុមប្រឹក្សាអភិវឌ្ឍន៍កម្ពុជា បានបង្ហាញថា ការ​វិនិយោគ​របស់ក្រុមហ៊ុនម៉ាស្ទើរ ត្រូវបានធ្វើឡើងក្នុងទីតាំងឃុំតាំងសំរោង និងឃុំក្រាំងដីវ៉ាយ ស្រុកភ្នំស្រួច ខេត្តកំពង់ស្ពឺ ដែល​មានទំហំដី៩៥០ហិចតា លើគម្រោងដូចជាបង្កើតកសិដ្ឋានដាំដំណាំកសិ-ឧស្សាហកម្ម ដាំដើមអាកាស្យា ដើមប្រេង​ខ្យល់ ដំឡូងមី និងស្វាយចន្ទីជាដើម។

សូមរំលឹកថា ប្រជាពលរដ្ឋជាង២៥០គ្រួសារ មកពីភូមិចំនួនបីក្នុងឃុំតាំងសំរោង ស្រុកភ្នំស្រួច បានជួបជុំគ្នា​នៅ​ទីស្នាក់ការ​សមាគមអាដហុក ស្នើឲ្យសមាគមនេះ ជួយអន្តរាគមន៍ទៅរដ្ឋាភិបាល ដើម្បីទាមទារយកដីស្រែ ចំនួន​៩៥០ហិចតា ដែលក្រុមហ៊ុនម៉ាស្ទើរ អ៊ិនធើនេសិនណលខបភើរេសិនគ្រុប(Master International Corporatoin Group Co,LTD) បាននឹងកំពុងប្រើ គ្រឿងចក្រឈូសឆាយយក។ ការឈូសឆាយនេះចាប់ផ្តើមតាំងពីឆ្នាំ២០១០ រហូត​ដល់បច្ចុប្បន្ន។ ឯប្រជាពលរដ្ឋវិញ ក៏បានដាក់ពាក្យបណ្តឹងជាបន្តបន្ទាប់ តាមរយៈអាជ្ញាធរមូលដ្ឋានថ្នាក់ក្រោម​ជាតិ រហូតដល់ថ្នាក់ជាតិ ដូចជាទីស្តីការគណៈរដ្ឋមន្ត្រី និងខុទ្ទកាល័យលោកនាយករដ្ឋមន្ត្រី ហ៊ុន សែន តែនៅតែគ្មាន​ដំណោះស្រាយ៕