បន្ទាប់ពីកងទ័ពថៃប្រកាសធ្វើរដ្ឋប្រហារយោធា ជាផ្លូវការមក រដ្ឋាភិបាលកម្ពុជា ក៏បានដាក់ចេញបទបញ្ជាភ្លាមៗ ដើម្បីគ្រប់គ្រង​ស្ថានការណ៍នៅកម្ពុជា ដោយសារតែរាជាណាចក្រទាំងពីរ ធ្លាប់មានអរិភាពនឹងគ្នា ជុំវិញបញ្ហាព្រំដែន​ដ៏ចម្រូងចម្រាស់។

ច្រកប៉យប៉ែត នៅព្រំដែនកម្ពុជាថៃ។ (រូបថត wikimedia.org)

សន្តិសុខជាតិ - យោងតាមបទបញ្ជាចេញដោយរដ្ឋាភិបាលកម្ពុជា នៅល្ងាចថ្ងៃទី២២ ខែឧសភា ឆ្នាំ២០១៤ ចុះ​ហត្ថលេខា​ដោយ​លោក ស ខេង ឧបនាយករដ្ឋមន្រ្តី និងជារដ្ឋមន្រ្តីក្រសួងមហាផ្ទៃ មានបីចំនុច ក្នុងនោះ៖

១. អគ្គមេបញ្ជាការកងយុទ្ធពលខេមរភូមិន្ទ និងអគ្គស្នងការនគរបាលជាតិ ត្រូវណែនាំដល់កងកម្លាំង ដែលឈរ​ជើង​តាមបណ្តោយព្រំដែនកម្ពុជា ត្រូវបន្តលើកកំពស់ កិច្ចសហការទំនាក់ទំនង ឲ្យបានល្អជាមួយភាគីថៃ និងមិនត្រូវធ្វើ​ការចល័តកម្លាំងឡើយ។

២. អភិបាលខេត្ត និងប្រធានគណៈបញ្ជាការខេត្តត្រូវបន្តទំនាក់ទំនង សហការជាមួយភាគីថៃ ដើម្បីរក្សាសន្តិសុខ សណ្តាប់ធ្នាក់តាមព្រំដែន និងលើកកំពស់ការគ្រប់គ្រងការចេញចូល ឆ្លងកាត់ព្រំដែន តាមច្រកទ្វារព្រំដែន នៃ​ប្រទេសទាំងពីរកម្ពុជាថៃ។

ការចេញបទបញ្ជារបស់រដ្ឋាភិបាលកម្ពុជា គឺបានកើតឡើងតែប៉ុន្មានម៉ោង ក្រោយរដ្ឋាភិបាលចាំផ្ទះប្រទេសថៃ ត្រូវ​បានទម្លាក់ ដោយរដ្ឋប្រហារយោធា និងបានដាក់ប្រទេសទៅក្នុងរបបគ្រប់គ្រងយោធាថ្មីមួយ  ក្រោយហេតុផល​រក្សា​សណ្តាប់ធ្នាប់ និងស្តាសន្តិសុខជាតិឡើងវិញ។

ចំពោះការធ្វើរដ្ឋប្រហារយោធាផ្តួលរំលំរដ្ឋាភិបាលស៊ីវិល ដែលកើតចេញពីការបោះឆ្នោត តាមបែបប្រជាធិបតេយ្យ​នៅប្រទេសថៃ បានបង្កកង្វល់ជាច្រើន មិនត្រឹមតែដល់ប្រទេសនៅក្នុងតំបន់ប៉ុណ្ណោះ ប៉ុន្តែមេដឹកនាំ​ប្រទេសធំៗក្នុង​ពិភពលោក បានចេញមកធ្វើការថ្កោលទោសជាបន្តបន្ទាប់។ ពួកគេជំរុញឲ្យមានរដ្ឋាភិបាលស៊ីវិល តាមបែបលិទ្ធិ​ប្រជាធិបតេយ្យឡើងវិញ និងដឹកនាំប្រទេសតាមបែបនិតិរដ្ឋឡើងវិញ៕