រដ្ឋមន្រ្តីក្រសួងមហាផ្ទៃ និងជាមន្រ្តីជាន់ខ្ពស់​គណបក្សប្រជាជនកម្ពុជា លោក ស ខេង បានថ្លែងឡើងថា បើ​គណបក្ស​សង្រ្គោះជាតិ និងគណបក្សប្រជាជនកម្ពុជា ផ្តើមចរចាជាមួយគ្នាឡើង វិញ គឺត្រូវចាប់ផ្តើមពីចំណុច​ដែលបាន​ព្រម​ព្រៀងគ្នា កាលពីពេលចរចាចុងក្រោយបំផុត។

ឧបនាយករដ្ឋមន្រ្តី និងជារដ្ឋមន្រ្តីក្រសួងមហាផ្ទៃលោក ស ខេង។ (រូបថតឯកសារ)

នយោបាយ - ថ្លែងប្រាប់អ្នកសារព័ត៌មាននៅមន្ទីររដ្ឋសភា ថ្ងៃទី២១ ខែឧសភា លោកស ខេង មន្រ្តីជាន់ខ្ពស់របស់​គណបក្សប្រជាជនកម្ពុជា បានអត្ថាធិប្បាយថា គណបក្សប្រជាជនកម្ពុជា មិនដែលបដិសេធការ​ចរចាជាមួយ​គណបក្ស​សង្រ្គោះជាតិនោះទេ ហើយក៏សង្ឃឹមថាគណបក្សសង្រ្គោះជាតិ គោរពកិច្ចព្រមព្រៀង ដែលបានឯកភាព ក្នុងពេលចរចាជាមួយគ្នា។

លោកស ខេង បញ្ជាក់ថា៖ «បើមានការបន្តចរចាគ្នា ជាមួយគណបក្សសង្គ្រោះជាតិនោះ គឺត្រូវតែបន្តនូវអ្វីដែល គណបក្សទាំងពីរបានឯកភាពជាមួយគ្នាកន្លងទៅ យកមកពិនិត្យពិភាក្សាជាមួយគ្នាបន្តទៀត។ ដូចជាការ​ព្រម​ព្រៀងជាមួយគ្នា នៅក្នុងជំនួបចរចា រវាងគណៈកម្មការចំរុះទាំងពីរគណបក្ស នៅព្រឹទ្ធសភា និងការព្រមព្រៀង​គ្នា​តាមទូស័ព្ទ រវាង លោក សម រង្ស៊ី ជាមួយ សម្តេចតេជោហ៊ុន សែន កាលពីថ្ងៃទី៩ ខែមេសា ឆ្នាំ២០១៤ កន្លងទៅ។»

ប្រធានគណបក្សសង្រ្គោះជាតិលោកសម រង្ស៊ី តាមរយៈសេចក្តីប្រកាសព័ត៌មានរបស់ខ្លួន ក្នុងពេលចុងក្រោយ​នេះ​ បានឲ្យដឹងថា៖ «កិច្ចព្រមព្រៀងយោគយល់ នឹងសម្រេចនាពេលឆាប់ៗនេះ ដើម្បីបំបែកភាពជាប់គាំងនយោបាយ​នាពេលបច្ចុប្បន្ន។ គណៈប្រតិភូនៃគណបក្សសង្គ្រោះជាតិ នឹងទៅជាមួយគម្រោងព្រាង​លើគោលបំណង​សំខាន់ៗ​លំអិត ដែលភ្ជាប់ជាមួយការអនុវត្ត លើអ្វីដែលធ្លាប់បានព្រមព្រៀងគ្នា រួចមកហើយ រវាងគណបក្សទាំងពីរ។»

ការបង្ហាញពីចេតនាបន្តចរចា និងការបង្ហើបឲ្យដឹង ពីចំណុចស៊ីសង្វាក់គ្នាច្រើន រវាងគណបក្សសង្រ្គោះជាតិ និង​គណបក្សប្រជាជនកម្ពុជា ក្នុងពេលចុងក្រោយនេះ ត្រូវបានមជ្ឈដ្ឋានអ្នកតាមដានស្ថានការណ៍នយោបាយកម្ពុជា សន្និដ្ឋានថា គណបក្សទាំងពីរ ទំនងជាមានការឯកភាគ្នា ស្ទើរតែមួយរយភាគរយទៅហើយ តាមរយៈការចរចា​សម្ងាត់ ហើយអ្វីដែលបង្ហាញឲ្យឃើញនៅពេលនេះ វាគ្រាន់តែជាឆាកល្ខោន សម្រាប់មតិសាធារណៈប៉ុណ្ណោះ។

ហើយមជ្ឈដ្ឋានដដែល ក៏បានកត់សម្គាល់ឃើញដែរថា ល្បឿននៃការចរចាឡើងវិញ ក្រោយការបោះដៃឲ្យ​គ្នាទៅ​វិញទៅមក រវាងគណបក្សប្រជាជនកម្ពុជា និងគណបក្សសង្រ្គោះជាតិ ក៏ស្របពេលប្រទេសជប៉ុន​ដែលបាន​ជំរុញ​ឲ្យគណបក្សទាំងពីរ បន្តការចរចាគ្នាឡើងវិញនោះ កំពុងដុតដៃដុតជើង ជួយជ្រោមជ្រែងដល់ការកែទម្រង់ ការបោះ​ឆ្នោតនៅកម្ពុជា តាមរយៈការសហការជាមួយភាគីពាក់ព័ន្ធ៕